1 Yuda dindiha karu tigua Ngode Datagaliwabe ibu kaore lalu manda biai ho ka. Isaraele dindiha karubi tigua ibu mini leneore ka lalu mo yaraga haga ka.
2 Ibunaga anda Yarusalemeha ka. Ibu Hari Saiono kagoha haabo haga kagoni.
3 Ibu ogoniha howa ibugua waitigirunaga danda timuru bo gingirulo wahaya. Yandarerubi humbibi wai biagane ale dameneru bibahendeore ibugua bo gingirulo wahai haya.
4 Ngode Datagaliwabe-o í̠ wá holene taraore kegoni. Í̠ mini lene howa kini duniniore kegoni. Í̠ daligaore howa hari mini lene timbuni wedaru dindiha lowa í̠ bolanguahe daligaore kegoni. Hari uruniha howa í̠na waitigi baba wai bialu wayali halu dai bu kegoni.
5 Tigua ti baba wai bialu wayali hayarume ami agali hongohe hearunaga wai biagane mbirale karulo hayaru yu wahai hayiya. Ani bialu ti homaiore hayiya. Tinaga hongobi wai bulenaga mugube yu hayarubi bameore habane nabulene haya.
6 Yagabanaga Ngode Datagaliwabe-o í̠na tihondo bi hongo howa larigola tinaga nogo hosibi agali nogo hosini berearubi ti bibahende homai halu tingini dindini wima piyiya.
7 Anigo Ngode Datagaliwabe-o ina bibahende í̠hondo giore haga bu kamaruni ndobe. Í̠ keba ho kegola mbirali ai ibugua í̠naga deni íbu holobadabe. Mbirali naholebira ndobe.
8 Í̠ dahuliya andagaha howa wali agali ko birimi lalu latagi harigola ti bibahendeore hearume gi timbuni howa bi nale ema nabi haya.
9 Horo ogoningi wali agali marume mo ko hene hearu í̠na biamogo bule heyu hariya.
10 Agali keba timbuni haragome wali agali maru karu tigua í̠naga mini mo yaraga helo haga. Agali waiha homa nabi karume í̠ mitangi bialu lotu lolene ngadagua lalu holebira.
11 Tígua Anduane Homogo tínaga Ngode Datagaliwabehondo mbirale mbira mule lalu lo wirimidagua ibuhondo miaore bilimu. Wali agali tara tara dindi kawareni kamiru tíguabi ibuhondo mbiraleru turu halu milimu. Ngode Datagaliwabehanda wali agali ibuhondo gi helo mo gi haga ka.
12 Ibugua kini mine haga karu mo dindiha halu kini maru dindi tara tarani karubi ibugua ti mo gi haga ka.
