3 Ina waitigi bu hearume í̠naga anda hayago mo ko hai hayagoni. Mbirale mo ko hayadaruni í̠ni hondole ibabe.
4 Í̠la waitigi biarume í̠naga anda í̠ ina baba lola haga biagoha howa wai bi dalimu lalu mambolo balu mbirale wiaruni mebia haya. Í̠naga mbirale wiruni mo batagi halu tininaga mbirale wiaru wia aribia ka.
5 Agalime irabuha ayume ira dibu paya biagadagua tigua í̠naga andaha ani biyagoni.
6 Ira pelo mbaraleni giligili bialu kau wuwa anda ogoniha mo yaribiaho helaga bini hearuni waitigi biaru tigua ayume diba hamame bo giala bigi biya.
7 Tigua í̠naga anda biago giala baga bialu irame heda haya. Dindi andabi í̠ni holene lomabia ho wini biago tigua mebia hai haya.
8 Urunime ina bopeore holene mitangi bialu anidagua biya. Ina dindiha Ngode Datagaliwabe mitangi bialu lotu lolenaga loma biahene bibahende hearu anidagua biya.
9 Iname í̠ mitangi bulenaga manane waliaho wini biaru bibahende mo wahai haya. Í̠naga bi mana latagi haga agali mbira áyu nahe kamagoni ndobe. Ina ogonibi dege kamaore genda uruni angi ereba holobadabe ina kamarume manda bibe nahe kamagoni ndobe.
10 Ngode Datagaliwabe-o waitigi uruni tigua í̠ hondo oba halu lu agua holobadabe. Tigua í̠naga mini lo mege bialu bi ko lalu haabo holebirabe.
11 Í̠na ina biamogo nabi kego irane agibe. Í̠ bame bira dege bidego agibe.
12 Anigo Ngode Datagaliwabe-o bambaore howa í̠ inanaga kini henego haabo kegoni. Í̠na pele ngiaabo harigola ina waime ba nabi harimagoni.
