11 Í̠na ina biamogo nabi kego irane agibe. Í̠ bame bira dege bidego agibe.
12 Anigo Ngode Datagaliwabe-o bambaore howa í̠ inanaga kini henego haabo kegoni. Í̠na pele ngiaabo harigola ina waime ba nabi harimagoni.
13 Í̠ninaga hongo timbuni gibihegome iba solowara timbuni bereagoha hanuni ina poloma̱yanaga iba bira migimigi bilarigoni. Iyibi agali wena timbuni solowaraha biraraligobi hearia bo wahai hari.
14 Ani bialu í̠na abagua ale timbuni mini Lebiadananaga haguaneru bo tagadaga birigoni. Ibunaga tingini dindi ko iba dalu naibaga wiagoha nogo gabua hearu nelo mirigoni.
15 Í̠na iba dindiha howa ibilarigola dugualu pugu biya. Iba timbuni pialu hearu hundu tegelope helaga birigoni.
16 Í̠na mbiraga horombela tu wialu ni egela hari daligaha helaga biriya.
17 Í̠na iba dindila tubari ngelalu bigi biriyagoni. Mali bibahendenaga gaea bulene horobi dalu ibulene horobi tuwu ngelariyagoni.
18 Anduane Homogo-o í̠na ani birigola í̠la waitigi bu karume í̠ hondo oba halu karuni mitangi bibe. Tini mini nawi kariane tigua mitangi bialu í̠ kego bame degeda lomanda bialu mege biaga ka.
19 Í̠naga wali agaliru hongo nahe bu kamagonigo waitigi bu karume ina bope halu mo ko holigo í̠na ina yu wa nahabe. Waitigi karume í̠naga wali agali kamaru mo ko halu kago í̠na erembira nangi ina mitangibu haabo habe laro.
20 Inanaga dindi lenelene ngamaru bibahendeha waitigime wai mo ko howaore biaga kago manda bialu í̠na habo nalolene bi ina baba lo wirigoni manda bibe.
21 Agali ko karume wali agali hongo nahe bo hengedene karu í̠na ti yu wanahabe. Wali agali yagibano burupale bu karume í̠naga mini mo yaraga halu helo í̠nime ti biamogo bigi bibe.
