6 Kini ibugua mana bayale biragome dalu ibuwa mabuni tomo hengedaru damume haragola tomo bayale anda hagadagua wali agali bu karu ibunaga maname anda helo í̠na kini kago mo bayale habe.
7 Ibu kini kangi wali agali bu karuha mana tigabi bulene dungume halu anda helo. Ege dalu kangi mbirale bigi birago lini dalu bayale haga bilo biamogo bibe.
8 Kini ibugua handame howa haru holenego wali agali iba solowara biru paluyu pedaru bibahendeoreyagi howa paluyu pialu solowara ange ederayagi karu bibahende ibugua handairi holebira. Wali agali dindini paluyu pedarubi bibahende iba Yuberedisi duguaragoria howa paluyu pialu dindi wia maroha wali agali palumaro bidagoria handairi holebira.
9 Wali agali dindi ko ege kelekele wini haga karume kini ogonihondo bulu palialu ti kini ogoni ibu andaneha holebira. Kini ogoni ibunaga waitigi karu tinime dindini mbala puwa mo ko howa palipe holebira.
10 Sebenanaga kini kagomebi kini maru iba solowara biruyu mabu bilowa dindi dombeneha ngarunaga karumebi tigua kini ogonihondo mbirale debene maru ibu mo turu halu mulebira. Arebia dindinaga kini kagomebi Idiobia dindinaga kini kagomebi libugua mbirale debeneru mo mogobu yalu ibuwa kini ogoni dege mulebira.
11 Kini bibahendeore karume ibu wanakuiha tinaga ge duli podalu bulu paliai holebira. Hameigini tara tara dindi bibahendeni hoyu pedaru bibahendeoreme kini ogoni ibunaga biabe bia hai holebira.
12 Ani bulebirago irane wali agali yagibano darabi karume kini ogoni olaragola ibugua tinaga bi hale halu biamogo biagaore ka. Wali agali maru buru paleore marume namiaga hondo wahene karu kini ogoni ibunime de handalu migi biaga ka.
13 Kini ogoni ibugua wali agali hongo naheru mbirale nawi yagibano darabi karu daraore halu ibunime ti biamogo biaga ka. Wali agali mbirale nawi buru paleore karu ibunime ti gi miaga ka.
14 Maru mini kowi karume wali agali darabi urunibi karu hengedope halu mo ko hole bialu karia kini ogoni ibunime ti gini miaga ka. Kini ibugua wali agali uruni gubalini timbuniore ho kagome ti ani biamogo biaga ka.
15 Ani biaga kago manda buwa kini baya ogoni ibuore ha ho wiaaboore helo hameledo. Muni ngoloru Arebia tawego kini ogoni turu halu milo hameore ledo. Wali agali bu karume kini ogoninaga Ngode Datagaliwabehondo bi la helo hameledo. Kini ogoni biamogo biaabo helonaga wali agali karume habe lalu lamulebira. Ani larago hale halu Ngode Datagaliwabe ibugua kini ogonihondo bayale dege bialu ibu bayale helo biamogo bilo hameledo.
16 Dindi bibahende ngaruha widi balirubi tomo nema maru alebi anda hagahaga bialu dindi bare bare ngaruni nema hangume andaho namu lelo. Lebanono dindiha mbira tomo anda haga ngadagua anda heloore hameledo. Tano ngaruha wali agali dewa palu to̱ lalu bo dene ngagoria dangi anda hagahagadagua anda halu to̱lotagi helo hameledo.
17 Wali agali bu karume kini baya ogoninaga miniore embeda nahelo. Ibunaga mana baya biaga kini ogoni ka lalu lolenego lairi nahe honani li harini daho ngadagua wali agalime kini ogoninaga mini mo yaraga haho wiaaboore helo hameledo. Ani bialu wali agali dindi tara tarani palu ngarume Ngode Datagaliwabehondo bi lamialu, Kini biagohondo bayale dege bialu bu anda helo mo bayale hiridagua inabi nde bayale holoma̱ya mo bayale habe, lalu lamigi bilo hameledo.
18 Anduane Homogo Isaraele wali agalinaga Ngode Datagaliwabe kago ibunaga mini mo yaragaore halimu. Ibuni hangume mbirale bayaleore turubi o laruruni bigi biaga kagoni.
19 Ngode Datagaliwabe ibunaga mana bayaore gibi biaga kago ibunaga mini baya taraore ogoni mo yaraga haho wiaaboboore wilo. Ibunaga mini mo yaraga holenemebi ibunaga wá holenemebi dindi bibahendeha dungume halu to̱lotagi heloore hameledo. Henene aniore bilo bi labe.
