1 Mana kome mini kowi karunaga bu miniha bi lamiaga. Mana ko biaga karume Ngode Datagaliwabehondo gi nahaga howa erembira mialu yo handaga ka.
2 Ko biaga uruni tigua mine howa tini lalu, I̱ duniniore mbirago kogoni, laga ka. Ngode Datagaliwabehanda tigua ko biyaru handa walia halu dabaki nabulebiralo manda biaga ka.
3 Horo bibahendengi ogoni ale biaga karume mana ko bulenenaga bi mo tene howa ke̱ halu bi laabo haga ka. Mana bayale bulenenaga mini bayale mbira tiha nawiore kagoni ndobe.
4 Dagiani u paluwa mana ko bulenenaga miniha mitangitangi bialu paliaga ka. Tigua mana ko bulenego bibe manga nahaga howa ko bulene ngagoha haabo haga ka.
5 Anduane Homogo-o í̠naga gubalini haabo holene emene ndoore hari daliga elahe wu kegoni. Í̠naga mini bilinahe ngego timbuni yangale howa hari mindini elahe wu kegoni.
6 Í̠naga mini tigabi timbuniore ngego dindi hari ngaru bolanguahe ngegoni. Í̠naga mana tigabiore mo dabaki haga ngegobi ina kamarume manda biai habe nahe kama. Ogoni iba solowara uli unuraore ngaligobi nge. Anduane Homogo-o í̠nime wali agalibi ema bialu piaga bedarubi nogo tara tarabi handayaho hai haga kegoni.
7 Ngode Datagaliwabe-o í̠naga gubalini haabo holene baya buruguleore ngegoni i̱ hame timbuni lo ko. Í̠ ogonibi kego wali agali bu karu tanabi ti í̠ni kegoha kaware ibiragola ega angibuninaga babaganeme igini dambiho paliagadagua í̠na ti dambiho haga kegoni.
8 Í̠ andaga tomo dewa bu payabu ngegome wali agali tomo garibi nale haga ka. Í̠naga turu holene iba bayale timbuni duguaragobi ngego wali agalime nelo miaga kegoni.
9 Ina bibahendenaga holene tene Anduaneore í̠ kegoni. Í̠ni wá taraore holene Anduane kegome í̠niha howa ina wá bayaleore de hondo kamagoni larama.
10 Wali agali í̠ mandabi karu í̠na ti gubalini ho haabo habe. Wali agali mini tigabi karu ti bayale haabo helo í̠nime ti biamogo bialu habe.
11 Agali mine haga bu karume i̱ bo hengedope holani handabe. Mini kowi bu karume i̱ bo batagi holani handabe.
