Hwan 8:4-18 in Central Cagayan Agta

⁴ “Mistro, neddatangan mi ye-yan na babbay ta pakikadallaw na.

⁵ A ta lintig ni Moses a nebar na ta mapatur ya kumanin addet ta masi, ammi damagan mi hapa ya uray mu tentu.” kunda.

⁶ Ammi inuhohug da yen te Hesus te pangparuba da tentu, talo am itta ya ibar na nga pangidaruman da sangaw tentu. Ammi te Hesus a nagtumag la nagkurkurnit ta lutak ta guramay na en.

⁷ A gafu ta netotoli da ya pohut da en tentu a nagtayuk hapa ta atubang da kapye na hapa naguhohug tekid. “Am itta ya awan seliwat tekamuy a yen mina ya imunnan mangpatur ta babbayina,” kunna,

⁸ kapye na nagtumag ha nagkurkurnit ta lutak.

⁹ Ammi ta nepakadangag da ta inuhohug na en tekid a nasesenut kid na nagtatugut namegafu ta kalalaklakayan, a intu la nasirak i Hesus ikid na babbayen nga imatayuk ta atubang na en.

¹⁰ A sangaw nagtayuk ha i Hesus kapye na naguhohug ta babbayen. “Anu awan kid? Awan hud ta nasirak nga mangpa-gang teko?” kunna.

¹¹ “Awan kad, Afu,” kunna hapa. “A maski teyak, bakkan ta iyak ya mangpa-gang teko, a e kan mantu, ammi awem na sangaw magliwat,” kun ni Hesus tentu.

¹² A sangaw ta mittan ta pagbida ni Hesus ta Pariseyu kiden a “Iyak ya zilag na Namaratu ewan nga mangpadakar ta tolay kiden. Am itta ya dumagdag teyak a awena sangaw magtugtugut ta sugiram, te itta tentu ya zilagen nga mangtolay tentu,” kunna.

¹³ Ammi ya tabbag da hapa tentu a “Awan haman ta kwenta na pangtistigum, te iko la tatakday ya mangtistigu ta barim,” kunda.

¹⁴ A ya bida ni Hesus tekid a intu yan: “Maski am iyak hapa la ya mangtistigu ta barik a kakurugan hala ya pangtistiguk, te amuk haman ya nagafun ken ikid na datangan ku. Ammi tekamuy a awemuy haman amu ya nagafun ken ikid na datangan ku.

¹⁵ Am ikamuy ya mangnonot ta kwenta na tolay a intu la nonot muy ya gagangayen nonot na tolay, ammi teyak a awek haman nonotan am anu ya kwenta na tolay.

¹⁶ Ammi maski am iyak mina ya mangnonot tekid a matunung hala ya nonot ku tekid, te awek haman maguray mangnonot am awa duwa kami ni Damakewan nga nangidob teyak.

¹⁷ Intu mina pagnonotan muy ya ibar na lintigen nga ikatalak muy, te am naggitta kan ya pangtistigu na duwa na tolay a matunung kan ya pangtistigu da.

¹⁸ A matunung mantu ya pangtistigu mi ni Damakewan, te ya pangtistiguk ta barikin a kumanen hala ya pangtistigu ni Damakewan teyak,” kunna tekid.