4 Manau bona Iehova igari-henina davadia na taḡa bona heimodai bona mauri.
5 Ginigini bona idoa na lalo-gagevagageva tauna ena dala ai mimia; a sibona e hegimamu tauna na dauhai baine noho.
6 Meromero bema rakalaia dalana na ba hadibalaia; bena baine buruka negana ai basine rakatania.
7 Taga tauna ese ogoḡami tauna e biaguamu, bona abi-torehai tauna ese e henia torehai tauna isiaina e lao heniamu.
8 Hahemaoro gageva-gageva e hadoamu tauna ese hahehisi anina baine abia, bona ena badu auna na baine kwaidu.
9 Ani gaga-isi tauna na bae hanamoa, badina be ana aniani na ogoḡami taudia ida e ania heboumu.
10 Ḡonaḡona tauna ba lulua lasi, bena heiri-heiri na baine ore, bona heai bona gwaugwau bae doko.
11 Lalo-ḡoevaḡoeva e ura heniamu bona e hereva manadamu tauna na hanua pavapavana turana ai bainela.
12 Iehovas matana ese lalo-parara e itaia taomu; a koikoi tauna ena hereva na ia ese e ḡiḡi dobimu.
13 Lahedo tauna na e tomu “Leona ta na murimuri ai; ariara ai baine alagu mase”.
14 Ariara hahinena uduna na guri dobu-hereana; Iehova ese e badu heniamu tauna na ia lalonai baine moru dobi.
15 Kavakava na meromero lalonai mia; a mata-hakani auna ese baine lulua lasi dauhai.
16 Ogoḡami taudia edia amo e dadidadimu, sibona ena taḡa ihabadana totona, eiava taḡa taudia e harihari henidiamu, tauna na do baine dabu mo.
