19 Ogoḡami taudia ida manau ai ba noho be namo; heaḡi taudia ida dadidadi kohudia ba haridia na dika.
20 Hereva e kamonaimu tauna ena namo baine bada; Iehova e abidadama heniamu tauna na e moalemu.
21 Lalona e aonegamu tauna na lalo-parara tauna e gwauraiamu, bona hereva namodia ese lalo-ani e habadaiamu.
22 Aonega na e lohilohiamu maurina, aonega tauna enai; a kavakava na mata-hakani ḡauna, kavakava taudia ediai.
23 Aonega tauna lalona ese ena hereva e hamaoromaorodiamu, bona bibinana na lalo-ani herevadia e hadibadiamu.
24 Hereva manadadia na bada-ranuna na heto; gaihona na lauma enai, bona goadana na tau-anina enai.
25 Tau ta ese dala ta baine haeroa, dala namona na heto; a ḡau be dokona na mase dalana.
26 Ḡaukara tauna na bogana helaoreana e ḡaukara goadamu; ia uduna ese e ha-uraiamu.
27 Bonegita tauna ese kara dika e laloa hatamu; ena hereva na lahi ḡaraḡara na heto.
28 Lalo gageva-gageva tauna ese heiri-heiri e havaraia rohorohomu; hemaunu tauna ese e hetura hehenimu taudia na e hapararadiamu.
29 Daḡedaḡe tauna ese ia dekena tauna e koiamu, bona dala dia namo ai e hakauamu.
30 Matana e hakunumaiamu tauna ese kara gageva-gagevadia e lalo hatamu; bibinana e hakapumu tauna ese kara dika e havaraiamu.
31 Hui buruka na havava ḡauna mai hairaina; noho maoromaoro dainai e varamu.
32 Badu ai e halahemu tauna ese goada tauna e hereaiamu, bona sibona lalona e biaguamu tauna ese hanua ta e hadarereamu tauna na e hereaiamu.
