1 Lalo-hadai be taunimanima edia, a mala ena haere na Iehova ena amo.
2 Tau ta ena dala iboudiai na ḡoḡoeva, ia sibona vairanai; a Iehova ese lalo e tohodiamu.
3 Emu ḡaukara idounai na Iehova imana ai bavatoa, bena emu lalo-hata ḡaudia bae gini hedai.
4 Iehova ese ḡau iboudiai vada e kara, ta ta mai badidia; kara dika tauna danu vada e karaia, hekwakwanai negana ena.
5 Hekokoroku taudia iboudiai na Iehova ese e inai henidia badamu; ba diba momokani, idia ta na mata-hakani amo basine roho mauri.
6 Hebogahisi bona heabidadama daidiai kara dika na e herohomu, bona Iehova igari-henina ai tau ta na kara dika amo e raka ohomu.
7 Tau ta ena kara ese Iehova e hamoaleamu negana ai, ia na inaina ida e herohemainomu.
8 Kohu maraḡina mai kara maoromaorona ida be namo; kohu bada-hereadia kara gageva-gagevadia ida na dika.
9 Tau ta lalona ese ena dala e laloa hatamu, a Iehova ese ia aena e hakaudiamu.
10 Oru edia hereva na pavapava uduna amo e lasimu; hahemaoro ai ia uduna na se kereremu.
11 Hahetoho ḡauna bona metau idavarina ḡauna maoromaorodia na Iehova ena; hahetoho auridia moda ai mimia iboudiai na iena ḡaukara.
12 Pavapava ese kara dika ikarana e inai henia badamu, badina be terono na kara maoromaoro ai e ginimu.
13 Hereva maoromaoro bibinadia na hanua pavapavana ese e moalelaidiamu; ia ese hereva maoromaorodia e gwauraimu tauna na e lalokau heniamu.
14 Pavapava ena badu na mase ena gwaukau tauna; aonega tauna ese lalona baduna baine hakerua.
15 Pavapava vairana diarina ai na mauri; ena lalo-namo na medu gabedia e hadihodiamu dagadagadia na heheto.
16 Aonega iabina ese gold iabina e hereaiamu; lalo-parara abi-hidina ese silver iabi-hidula e hereaiamu.
17 Kara maoromaoro tauna ena dala avohana na kara dika amo e raka sirimu; ena dala nahuana e tohoamu tauna na sibona e hahemaurimu.
18 Heaḡi ese hahebuatari dalana e lailaiamu; hekokoroku ese moru dalana e lailaiamu.
19 Ogoḡami taudia ida manau ai ba noho be namo; heaḡi taudia ida dadidadi kohudia ba haridia na dika.
20 Hereva e kamonaimu tauna ena namo baine bada; Iehova e abidadama heniamu tauna na e moalemu.
21 Lalona e aonegamu tauna na lalo-parara tauna e gwauraiamu, bona hereva namodia ese lalo-ani e habadaiamu.
22 Aonega na e lohilohiamu maurina, aonega tauna enai; a kavakava na mata-hakani ḡauna, kavakava taudia ediai.
23 Aonega tauna lalona ese ena hereva e hamaoromaorodiamu, bona bibinana na lalo-ani herevadia e hadibadiamu.
24 Hereva manadadia na bada-ranuna na heto; gaihona na lauma enai, bona goadana na tau-anina enai.
