HECHOS 9:2-25 in Tzotzil

² Ba sc'ambe tal sunal ti much'utic oy yabtelic te ti temploetic yu'un ti xchi'iltaque te ti jteclum Damasco sbi yu'un sc'an chba xchuc tal scotol ti much'utic xch'unojic ti lequil ach' c'ope, ti chcolic ti sventa ti Jesuse. Mi vinic mi ants chc'ot sta chic' tal ti Jerusalén. C'alal laj xa yich' ti sune, hech yu'un chbat ti Damasco.

³ C'alal nopol xa chc'ot ti Damasco, ti ora iquevan tal c'alal ti vinajel yo' bu ixanav batel ti be.

⁴ Hech ip'aj ti lum ti Sauloe. Laj ya'i oy much'u chc'oponat: ―Saulo, ¿c'u yu'un chacontrainun? ―x'utat.

⁵ Hech itac'av ti Sauloe: ―¿Much'uot, Cajval? ―xchi. ―Ho'on Jesusun. Ho'on ti chacontrainune. Hovil ti hech chapase. Ja' no'ox chlic avich' vocol ―x'utat.

⁶ Ich'ay yo'nton ti Sauloe. Toj xi'el ic'ot. Hech laj yal: ―Cajval, ¿c'usi chac'an ti jpas? ―xchi. I'albat yu'un ti Cajvaltique: ―Lican, ochan batel ti jteclum. Te chc'ot yalbot ava'i c'usi chapas ―x'utat.

⁷ Ti viniquetique ti xchi'il ti Sauloe, laj sva'an sbaic. Ich'ay yo'ntonic yu'un oy much'u ic'opoj laj ya'yic, muc xilic.

⁸ Ilic ti Sauloe. C'alal laj svic' sat, mu xa xil balumil ti Sauloe. Ja' nitbil xa i'och batel ti Damasco.

⁹ Oxib c'ac'al tup'en ti sate. Mu'yuc xa c'usi laj sve'. Mu'yuc xa c'usi laj yuch'.

¹⁰ Oy jun jch'unojel te ti Damasco, Ananías sbi. Ti Cajvaltique laj yac' sba ti q'uelel ti stojol ti Ananíase. Hech ic'oponat yu'un: ―¡Ananías! ―x'utat. ―Li'uni, Cajval ―xchi xtac'av ti Ananíase.

¹¹ Hech i'albat yu'un ti Cajvaltique: ―Batan ti bu Toj Calle sbi. Te ti sna ti Judase chc'ot ata jun achi'il, Saulo sbi. Liquem tal ti jteclum Tarso ti Sauloe. Te yac'oj sba chisc'oponun.

¹² Laj xa cac'be yil ti chc'o avac' ac'ob ti sjol yu'un hech chjam ti sate ―x'utat ti Ananíase.

¹³ Hech itac'av ti Ananíase: ―Cajval, ca'yojbe sc'opilal ti vinic ti chavale. Ep chilbajin scotol ti much'utic oyic ti atojole te ti Jerusalén.

¹⁴ Yich'oj mantal yu'un ti totil paleetique yu'un chchuc scotol ti much'utic chasc'oponote ―xchi ti stojol.

¹⁵ Hech i'albat yu'un ti Cajvaltique: ―Batan me. Ja' t'ujbil cu'un ti Sauloe yu'un chixcholbun jc'opilal ti stojol yanlum crixchanoetic xchi'uc ti stojol totil ajvaliletic xchi'uc ti atojolic uc ho'oxuc ti yol snich'onoxuc ti Israele.

¹⁶ Chcac'be sna' ti ep ch-ech' svocol ho'on ti jventa ―x'utat ti Ananíase. Ja' sc'opilal ti Sauloe.

¹⁷ Hech yu'un ibat ti Ananíase. I'och batel ti sna ti Judase. C'ot yac'be sc'ob ti sjol ti Sauloe. Hech c'ot yalbe: ―Hermano Saulo, laj stacun talel ti Cajvaltic Jesuse ti laj yac' sba ti q'uelel ti atojole ti c'alal naxanav talel ti bee. Ja' laj stacun talel yu'un chjam asat, yu'un chnoj ti avo'nton ti Ch'ul Espíritue ―xchi c'otel.

¹⁸ Ti ora ip'aj yalel ti c'usi macbil ti sate yu'un. Hech ijam ti sate. Lic ac'batuc yich' ho'.

¹⁹ Lic ve'uc, hech i'an yip. Te laj xchi'in chib oxib c'ac'al ti jch'unojeletique te ti Damasco.

²⁰ Hech yu'un ti ora lic xcholbe sc'opilal ti Cristoe te ti temploetic yu'un ti xchi'iltaque, ja' ti judioetique. ―Melel ti ja' Snich'on Dios ti Cristoe ―xchi.

²¹ Ich'ay yo'ntonic scotol ti much'utic laj ya'ibeic sc'op ti Sauloe. Hech laj yalic: ―Ti vinic li'to ja' ti much'u ep laj yilbajin scotol ti much'utic xch'unojbeic sc'op ti Cristoe te ti Jerusalén. Ja' yu'un ti ital li'to yu'un chchuc batel ti much'u hech xch'unojic li'i yu'un chbat sva'an ti stojol ti totil paleetique ―xchiic.

²² Manchuc mi hech yac'oj sba ch-albat sc'opilal yu'un ti xchi'iltaque, ech'em i'an yip yo'nton ti Sauloe. Ti sventa ti sc'op ti Sauloe hech más laj ya'ibeic sc'opilal ti Jesuse ti ja' ti Jcoltavaneje ti xchi'iltaque ti te nacajtic ti Damascoe. Hech yu'un mu xu' yu'unic chtac'avic xa.

²³ C'alal i'ech' xa ep c'ac'al, ja' ti xchi'iltaque, lic chapambatuc sc'opilal yu'un chmilat ti Sauloe.

²⁴ Laj ya'i ti Sauloe ti hech sc'an spasique. Ti c'ac'al ti ac'ubal te va'ajtic ti ti'macte'ton yu'un ti jteclume, tsmalaic mi chloc' batel ti Sauloe yu'un tsc'an tsmilic.

²⁵ Hech yu'un ti ac'ubal ti jch'unojeletique laj yiq'uic batel ti Sauloe. Laj stiq'uic ti yut muc'ta moch, laj syalesic ti pat macte'ton yu'un ti jteclume. Hech icol batel ti Sauloe.

² La scꞌanbe sjunal ta sventa yoꞌ cꞌuxi oy lec stsatsal li cꞌalal chcꞌot yacꞌbe sqꞌuel li buchꞌutic sventainojic li chꞌulnaetic yuꞌun li schiꞌiltac ta israelal li te ta jteclum Damascoe. Yuꞌun chba sqꞌuel mi oy buchꞌutic yichꞌojic ta mucꞌ li Cajvaltic li te ta schꞌulnaique. Mi viniquetic, mi antsetic, scꞌoplal ta schucan ba ta Jerusalén. Cꞌalal laj yichꞌbe xa li sjunale, ibat ta Damasco.

³ Cꞌalal jutuc xaꞌox scꞌan xcꞌot ta Damascoe, ta ora noꞌox xlebluj talel xojobal ta vinajel, joybil icꞌot ta xojobal li Sauloe.

⁴ Iyal ta lum, te iyaꞌi ta xcꞌoponat: ―Saulo, ¿cꞌu chaꞌal chacontrainun? ―xꞌutat.

⁵ Itacꞌav li Sauloe: ―Cajval, ¿mi joꞌot? ―xi. Iꞌalbat yuꞌun li Cajvaltique: ―Joꞌon Jesusun. Joꞌon li chacontrainune. Altic ti jech chapase yuꞌun noꞌox chasaꞌ avocol atuc ―xꞌutat.

⁶ Inic ta xiꞌel li Sauloe. Xi laj yal: ―Cajval, ¿cꞌusi ti chacꞌan ta jpase? ―xi. Xi iꞌalbat yuꞌun li Cajvaltique: ―Lican, ochan batel ta Damasco. Te chaꞌalbat li cꞌusi ta jcꞌan ti chapase ―xꞌutat.

⁷ Li schiꞌiltac ta xanbal li Sauloe ivaꞌiic yuꞌun ixiꞌic tajmec. Yuꞌun iyaꞌiic ti oy buchꞌu icꞌopoje pero muc bu xilic.

⁸ Ilic li Sauloe. Cꞌalal la svicꞌ li sate, mu xa xil osil. Jech nitbil batel yuꞌun schiꞌiltac ti cꞌalal iꞌoch ta Damascoe.

⁹ Oxib cꞌacꞌal mu xil osil. Mu cꞌusi la slajes, mu cꞌusi laj yuchꞌ.

¹⁰ Te nacal ta Damasco jun vinic ti yichꞌoj ta mucꞌ li Cajvaltique, Ananías sbi. Li Cajvaltique laj yacꞌ sba ta ilel ta stojol li Ananíase, xi laj yalbe: ―Ananías ―xꞌutat. Itacꞌav li Ananíase: ―¿Cꞌusi? Cajval ―xi.

¹¹ Xi iꞌalbat yuꞌun li Cajvaltique: ―Lican, batan li yoꞌ bu Tuqꞌuil caya sbie. Te xabat ta sna Judas. Te chcꞌot ata jun achiꞌil, Saulo sbi, liquem talel ta jteclum Tarso. Yacal ta stael ta naꞌel Dios.

¹² Laj cacꞌbe yil ti chcꞌot avacꞌbe acꞌob ta sjole yoꞌ jech ta xjam o li sate ―xꞌutat li Ananías yuꞌun li Cajvaltique.

¹³ Cꞌalal iyaꞌi li Ananíase, xi laj yal: ―Cajval, oy ep buchꞌu yalojbecun li cꞌu sba scꞌoplal li vinic taje. Caꞌioj ti ta xilbajinan li buchꞌutic schꞌunojic li te ta Jerusalén ti joꞌot Yajcoltavanejicote.

¹⁴ Li avie yichꞌoj talel mantal ta sventa li banquilal paleetic ti ta schucan batel scotol li buchꞌutic schꞌunojic ti joꞌot Jcoltavanejote ―xi li Ananíase.

¹⁵ Pero jech iꞌalbat nojtoc yuꞌun li Cajvaltique: ―Batan. Yuꞌun li Sauloe tꞌujbil cuꞌun yuꞌun jaꞌ ta spuc batel jcꞌop ta stojol li buchꞌutic maꞌuc achiꞌiltac ta israelale, schiꞌuc ta stojol li mucꞌtic ajvaliletique, schiꞌuc ta atojolic eꞌuc, joꞌoxuc li coꞌol jꞌisraeloxuque.

¹⁶ Joꞌon chcacꞌbe snaꞌ ti ep ta xichꞌ vocol ta jventae ―xꞌutat li Ananíase.

¹⁷ Ibat li Ananíase. Te icꞌot ta sna li Judase. Cꞌalal iꞌoche, laj yacꞌbe scꞌob ta sjol li Sauloe, xi laj yalbe: ―Hermano Saulo, listac talel li Cajvaltic Jesuse, jaꞌ li buchꞌu laj yacꞌ sba ta ilel ta atojol li cꞌalal te xatal ta bee. Listac talel yoꞌ chjam o la asate schiꞌuc acꞌo sventainot li Chꞌul Espíritue ―xut cꞌotel Saulo li Ananíase.

¹⁸ Ilocꞌ ta ora li cꞌusi macbil o li sate, jech xil xa osil. Iꞌacꞌbat yichꞌ joꞌ.

¹⁹ Lic veꞌuc jech iꞌayan stsatsal. Te to la schiꞌin jayib cꞌacꞌal li buchꞌutic yichꞌojic ta mucꞌ li Cajvaltic li te nacalic ta Damascoe.

²⁰ Li Sauloe lic yal ta ora ta jujun schꞌulnaic li schiꞌiltac ta israelal ti melel jaꞌ Snichꞌon Dios li Jesuse.

²¹ Scotol li buchꞌutic iyaꞌiic li cꞌusi laj yal li Sauloe toj chꞌayel noꞌox yoꞌonic. Xi laj yalic: ―Li vinic liꞌi jaꞌ li buchꞌu laj yilbajinan li buchꞌutic te oyic ta Jerusalén ti yichꞌojic ta mucꞌ li Cajvaltique. Jaꞌ liꞌ xa talem nojtoc yuꞌun ta scꞌan ta schucan batel li buchꞌutic yichꞌojic ta mucꞌ li Cajvaltique. Te chcꞌot yacꞌ ta stojol li banquilal paleetique ―xiic.

²² Cꞌalal jech laj yalic li schiꞌiltaque, li Sauloe más to itsatsub yoꞌon ta yalel li scꞌop li Cajvaltique. Laj yacꞌanbe snaꞌ li schiꞌiltac li te nacalic ta Damascoe ti jaꞌ Jesús ti scꞌoplal onoꞌox chtal ventainvanuque. Jech xa noꞌox mu snaꞌic cꞌu sba ta xtacꞌavic.

²³ Cꞌalal oy xaꞌox scꞌacꞌalile, lic snopic li jꞌisraeletic li te nacalic ta Damasco li cꞌu sba ta smilic li Sauloe.

²⁴ Li cꞌusi iyalique iyaꞌi li Sauloe. Li schiꞌiltaque cꞌacꞌal acꞌubal te vaꞌalic ta jujun stiꞌ smacol li jteclume. Li smacol li jteclume meltsanbil ta ton. Te tsmalaic li Sauloe yuꞌun chac smilic.

²⁵ Li buchꞌutic yichꞌojic ta mucꞌ li Cajvaltique, ta acꞌubaltic la stiqꞌuic ta yut mucꞌta moch li Sauloe, la schechic yalel ta pat moc. Jech icol o batel li Sauloe.

² Bat scꞌanbe vunetic yoꞌ ta xacꞌbe yil ti paleetic ti oyic ta jujun chꞌul na ti ta jteclum Damascoe. Jech laj spas ti Sauloe yoꞌ jech xuꞌ ta stsacan talel ta chuquel cꞌalal to Jerusalén ti cristianoetic ti buchꞌutic xchꞌunojic ti lequil achꞌ cꞌope, viniquetic, antsetic.

³ Cꞌalal jech ta xanav batel ta bee, ti nopol xa scꞌan ta xcꞌot ta jteclum Damasco ti Sauloe, ta jech to yepal joyobtabil icꞌot ta xojobal luz ti ilic talel ta vinajele.

⁴ Jech ti Sauloe iyal ta lum. Laj yaꞌi ti oy Buchꞌu ta xcꞌopoj ti jech ta xale: ―Saulo, Saulo, ¿cꞌu chaꞌal ta xacrontainun? ―xi.

⁵ Jech laj sjacꞌ ti Sauloe: ―¿Buchꞌuot? ―xi. Ti Buchꞌu ta xcꞌopoje jech laj stacꞌ: ―Vuꞌun Jesusun, ti Buchꞌu ta xacrontaine. Ta xayayijes aba atuc jech chac cꞌu chaꞌal ti vacax ti ta syayijes sba stuc ti cꞌalal ta slic ta teqꞌuel ti yabtejebe ―xi.

⁶ Xnicnun xa ta xiꞌel lic sjacꞌ ti Sauloe: ―¿Cꞌusi ta xacꞌan ta jpas, Cajval? ―xut. Jech laj yal ti Cajvaltique: ―Lican, ochan batel ti ta jteclume. Tey ta xaꞌalbat ti cꞌusi xuꞌ ta xapase ―xi.

⁷ Ti viniquetic ti xchiꞌinojic ti Sauloe ixiꞌic ta jmec. Jaꞌ ti laj yaꞌiic ti oy Buchꞌu ta xcꞌopoje, pero muꞌyuc buchꞌu laj yilic.

⁸ Ti Sauloe lic vaꞌiuc ti tey puchꞌul ta lume. Cꞌalal ivaꞌie, mu xa xil ti osile. Jech o xal un, nitbil batel scꞌob yuꞌun ti schiꞌiltaque cꞌalal to jteclum Damasco.

⁹ Cꞌalal tey oye, oxib cꞌacꞌal macal ti sate. Muꞌyuc bu iveꞌ. Muꞌyuc cꞌusi laj yuchꞌ.

¹⁰ Ti ta jteclum Damascoe tey nacal jun jchꞌunolajel ti Ananías sbie. Ti Cajvaltique laj yacꞌ sba iluc ta stojol. Jech laj yal: ―Ananías ―xi. Jech laj stacꞌ ti Ananíase: ―Liꞌ oyun, Cajval ―xut.

¹¹ Ti Cajvaltique jech laj yalbe ti Ananíase: ―Lican, batan tey ta calle ti jaꞌ Tuqꞌuil calle sbie. Tey ta xajacꞌ ta sna ti Judase mi tey oy jun vinic ti liquem talel ta jteclum Tarso ti jaꞌ Saulo ti sbie. Yuꞌun ti Sauloe yacal ta scꞌopon ti Diose.

¹² Yuꞌun ti Sauloe iꞌacꞌbat xa yil ti ta xcꞌot jun vinic Ananías ti sbie, ti ta scajan scꞌob ta sbae yoꞌ jech ta xjam ti sate ―xi.

¹³ Cꞌalal jech laj yaꞌi ti Ananíase, jech laj yal: ―Cajval, ep ti buchꞌu yalojbun scꞌoplal ti vinic taje, ti toj chopol ti cꞌusi ta spase, ti ta xilbajin ti cristianoetic ti oy ta Jerusalene ti buchꞌutic ta xa xchꞌunote.

¹⁴ Aviloj, Cajval, ti ital liꞌ ta jteclum Damascoe, ti yichꞌojbe talel ye ti banquilal palee, yoꞌ jech tal xchucan batel scotol ti buchꞌutic ta scꞌanic coltael ta atojole ―xi.

¹⁵ Ti Cajvaltique jech laj yal: ―Batan ta stojol ti vinic taje. Yuꞌun tꞌujbil xa cuꞌun yoꞌ ta xalbun ti jcꞌoplal ta stojol ti jyanlum cristianoetique schiꞌuc ti ajvalil yuꞌunique, schiꞌuc ti jꞌisraeletique.

¹⁶ Ta xcacꞌbe yil ti vinic taje ti ep ta xichꞌ svocol ta jventae ―xi.

¹⁷ Jech o xal ti Ananíase ibat ta na ti bu tiqꞌuil ti Sauloe. Iꞌoch batel ta yut na. Icꞌot scajan scꞌob ta sba. Jech laj yalbe: ―Quermano Saulo, ti Cajvaltic Jesuse ti Buchꞌu laj yacꞌ sba iluc ta be ti cꞌalal latal liꞌe, laj yalbun talel ti liꞌ ta xital ta atojole, yoꞌ jech ta sjam ti asate, yoꞌ jech ta sventainbot avoꞌnton ti Chꞌul Espíritue ―xut.

¹⁸ Cꞌalal jech laj yal ti Ananíase, ta jech to yepal laj pochuc loqꞌuel ta sat jech chac cꞌu chaꞌal junuc smicꞌal choy. Jaꞌ o tey ijam ti sate. Jech o xal ti Sauloe lic vaꞌluc. Tey laj yichꞌ voꞌ.

¹⁹ Tsꞌacal to ti Sauloe lic veꞌuc. Itsatsub ti sbecꞌtale. Tey icom jun chib cꞌacꞌal ta stojol ti jchꞌunolajeletic ti nacalic ta jteclum Damascoe.

²⁰ Tsꞌacal to ti Sauloe tey lic yal ta jujun chꞌul na ti jaꞌ Snichꞌon Dios ti Jesuse.

²¹ Scotol ti buchꞌutic ti ta xaꞌibe scꞌop ti Sauloe toj elom noꞌox ta xaꞌi ta jmec. Jech ta xalbe sbaic: ―Ti vinic leꞌe, ¿mi mu jaꞌuc ti ta xilbajin ti buchꞌutic ta scꞌanic coltael ta stojol ti Jesús ti tey ta Jerusalene? Jaꞌ jech xtoc, ¿mi mu jaꞌuc ti tal liꞌ xtoc yoꞌ jech ta xchucan batel, yoꞌ jech ta xba yacꞌ ta stojol ti banquilal pale ti buchꞌutic ta scꞌanic coltael ta stojol ti Jesuse? ―xut sbaic.

²² Pero ti Sauloe muꞌyuc xiꞌel ta xaꞌi ta xacꞌ ta naꞌel ti jaꞌ Jcoltavanej ti Jesuse. Ti jꞌisraeletic ti nacajtic ta jteclum Damascoe mu stacꞌ aꞌyeluc ta xaꞌi cꞌusi xuꞌ ta staqꞌuic.

²³ Echꞌ xa ox jaylajuneb cꞌacꞌal, ti jꞌisraelal cristianoetique lic scomonopic ti ta smilic ti Sauloe.

²⁴ Cꞌalal jech ta snopic ti jꞌisraelal cristianoetique, laj yaꞌi ti Sauloe. Cꞌacꞌal acꞌobal ta smalaic tey ta jujun stiꞌ smacal ti jteclume yoꞌ ta smilic ti Sauloe.

²⁵ Pero ti jchꞌunolajeletique ta acꞌobaltic laj sjatbiltasic ti Sauloe. Laj stiqꞌuic ochel ta mucꞌ ta moch. Tey laj xchechic yalel ta chꞌojon ta pat moc ti jaꞌ smacoj ti jteclume. Jaꞌ jech icol batel.

² La sc'anbe svunal ta sventa ti oy lec stsatsal c'alal chc'ot yac'be sq'uel li boch'otic sventainojic li nail tsobobbailetic yu'un israeletic tey ta lum Damascoe. Yu'un chbat sq'uel me oy boch'otic xch'unojic Cajvaltic ti tey oy ta nail tsobobbail yu'unique. Me viniquetic, me antsetic, sc'oplal ta xchucan, ta xic' tal ta Jerusalén. C'alal laj xa yich'be lec svunale, ibat ta Damasco.

³ C'alal jutuc xa'ox sc'an xc'ot ta Damascoe, ta ora oy c'usi xleblej tal ta vinajel, joyibtabil ic'ot li Sauloe.

⁴ Iyal ta lum. Tey laj ya'i ic'opanat: ―Saulo, ¿c'u yu'un chacontrainun? ―x'utat.

⁵ Itac'ov li Sauloe: ―¿Boch'oot? Cajval ―xi. ―Vu'un Jesusun. Vu'un ti chacontrainune. Altic ti jech chapase yu'un ja' no'ox chasa' avocol atuc ―x'utat.

⁶ Tey inic ta xi'el li Sauloe. Jech laj yal: ―Cajval, ¿c'usi chac'an ta jpas? ―xi. Jech i'albat yu'un li Cajvaltique: ―Lican, ochan batel ta Damasco. Tey cha'albat c'usi chapas ―x'utat.

⁷ Li xchi'iltac ta xanubal Sauloe iva'iic yu'un toj xi'el ic'otic. Yu'un laj ya'yic ti xco'laj xchi'uc oy boch'o ic'opoje pero mu'yuc boch'o laj yilic.

⁸ Itots li Sauloe. C'alal la svic' sate mu xa xil osil. Jech nitbil xa batel yu'un xchi'iltac ti c'alal i'och ta Damascoe.

⁹ Oxib c'ac'al mu xil osil. Mu'yuc c'usi la sve', mu'yuc c'usi laj yuch'.

¹⁰ Oy jun jch'unolajel tey nacal ta Damasco, Ananías sbi. Li Cajvaltique laj yac' sba ta ilel ta stojol li Ananíase. Jech laj yalbe: ―Ananías ―xut. ―¿C'usi chaval? Cajval ―xi itac'ov.

¹¹ Jech i'albat yu'un li Cajvaltique: ―Lican, batan yo' bu Tuq'uil calle sbie. Tey ta sna Judas ta xc'ot ata jun achi'il, Saulo sbi. Tey liquem tal ta lum Tarso. Tey ta sc'opan Dios.

¹² Laj xa cac'be yil ti chc'ot avac' ac'ob ta sjole yu'un jech ta xjam o li sate ―x'utat.

¹³ C'alal laj ya'i li Ananíase, jech laj yal: ―Cajval, oy ep boch'o yalojbicun c'u x'elan sc'oplal li vinic le'e. Ca'yoj ti ta xuts'inta li boch'otic xch'unojic ta aventa tey ta Jerusalene.

¹⁴ Li' ta orae yich'oj tal stsatsal ta stojol banquilal paleetic ti ta xchucan batel scotol li boch'otic xch'unojic ta aventae ―xi li Ananíase.

¹⁵ Pero jech i'albat yu'un li Cajvaltique: ―Batan me. Yu'un li vinique t'ujbil cu'un yu'un ja' ta xchol batel jc'op ta stojol li boch'otic muc ja'uc achi'iltac ta israelale, xchi'uc ta stojol muc'tic ajvaliletic, xchi'uc ta atojolic ec, vo'oxuc ti co'ol israeloxuque.

¹⁶ Vu'un chcac'be sna' ti ep to ta xich' vocol ta jventae ―x'utat li Ananíase.

¹⁷ Jech ibat li Ananíase. Tey ic'ot ta sna li Judase. C'alal i'oche, laj yac' sc'ob ta sjol li Sauloe, jech laj yalbe: ―Quermano Saulo, la stacun tal li Cajvaltic Jesuse, ja' li boch'o la svinajes sba ta atojol c'alal laxanov tal ta bee. La stacun tal ta sventa yu'un jech chavil yan velta osil, xchi'uc ac'o sventainbot avo'nton li Ch'ul Espíritue ―xut c'otel.

¹⁸ Ta ora iloc' li c'usi macbil o sate jech laj yil xa osil. Tey xa i'ac'bat yich' vo'.

¹⁹ Tey lic ve'uc jech i'ayin lec stsatsal. Tey to la xchi'in jayibuc c'ac'al li jch'unolajeletic tey nacajtic ta Damascoe.

²⁰ Li Sauloe ta ora no'ox tey lic xchol ta nail tsobobbailetic yu'un xchi'iltac ta israelal ti ta melel ja' Xnich'on Dios li Jesuse.

²¹ Scotol boch'otic laj ya'yic c'usi laj yal li Sauloe toj labal sba laj ya'yic. Jech laj yalic: ―Li vinic li'i ja' ti laj yuts'intaan li boch'otic tey oyic ta Jerusalén ti xch'unojic Cajvaltique. Ja' li' talem noxtoc yu'un tsc'an ta xchucan batel li boch'otic xch'unojique, tey ta xc'ot yac'an ta stojol li banquilal paleetique ―xiic.

²² Ac'o me jech laj yalic li xchi'iltaque, pero más to itsatsub yo'nton ta xcholel li Sauloe. Li xchi'iltac tey nacajtic ta Damascoe laj yac'be sna'ic ti ja' Jesús ti sc'oplal ono'ox chtal ventainvanuque. Jech muc xa xtac'ovic ic'otic.

²³ C'alal ech'em xa'ox ep c'ac'ale, lic xchapan sbaic li israeletic tey nacajtic ta Damascoe yu'un tsc'an ta smilic li Sauloe.

²⁴ Li c'usi la xchapanique laj ya'i li Sauloe. Li xchi'iltaque ta c'ac'al ta ac'ubal tey va'ajtic ta jujuch'oj ti' corralton yu'un li lume. Tey tsmalaic li Sauloe yu'un tsc'an ta smilic.

²⁵ Li jch'unolajeletique ta ac'ubaltic la stiq'uic ta yut muc'ta moch li Sauloe, la xchechic yalel ta pat corralton. Jech icol o batel li Sauloe.

² Iscꞌan la vun yoꞌ oy xa o yortene, jaꞌ la chcꞌot yacꞌbe yil ti jmeltsanejcꞌopetic ta bicꞌtal temploetic yoꞌ bu chaꞌiic smantal Riox ti xchiꞌiltac ta israelal ta jteclum Damascoe. Yuꞌun la jaꞌ chba sqꞌuel mi oy muchꞌutic yichꞌoj ta mucꞌ Cajvaltic Jesucristo ta stemploique. Mi ants, mi vinic cꞌot stae, scꞌoplal la ti ta xchuc tal ta Jerusalene. Ti cꞌalal iyichꞌ ti vune, ibat la ta Damasco.

³ Ti cꞌalal poꞌot xaꞌox la xcꞌot ta Damascoe, oy la cꞌusi xlebluj tal xojobal ta vinajel yoꞌ bu li Sauloe.

⁴ Iyal la ta lum, iyaꞌi la ti icꞌoponate: ―Saulo, ¿cꞌu yuꞌun ti chacrontainon yaꞌele? ―xꞌutat la.

⁵ ―Cajval, ¿muchꞌuot cheꞌe? ―xut la. ―Voꞌon Jesuson ti chacrontainone. Ti xꞌelan chapase, avocol noꞌox chasaꞌbe aba ―xꞌutat la.

⁶ Li Sauloe xtꞌelelet xa la ta xiꞌel. ―Cajval, ¿cꞌusi chacꞌan ti ta jpase? ―xut la. ―Lican, ochan echꞌel ta Damasco. Tey chaꞌalbat ti cꞌusi chapase ―xꞌutat la.

⁷ Ti xchiꞌiltac xchiꞌinoj echꞌel li Sauloe vaꞌ xiic la yuꞌun la ixiꞌic tajmec. Iyaꞌiic la ti oy muchꞌu icꞌopoje pero muc la xilic.

⁸ Li Sauloe istam la sba. Cꞌalal isvicꞌ sate, mu xa la xil sbe. Nitbil xa la iꞌoch ta Damasco.

⁹ Oxib la cꞌacꞌal tupꞌem sat. Muc la xveꞌ, muc la xuchꞌ voꞌ.

¹⁰ Tey la nacal ta Damasco jun vinic ti yichꞌoj ta mucꞌ ti Cajvaltic Jesuse, Ananías la sbi. Ti Cajvaltic Jesuse iyacꞌ la sba iluc ta stojol ti Ananíase. ―Ananías ―xꞌutat la. ―Cajval ¿cꞌusi chaval? ―xut la.

¹¹ ―Batan yoꞌ bu Tuqꞌuil caya sbie. Tey xacꞌot ta sna Judas. Tey chcꞌot ata jun achiꞌil, Saulo sbi, liquem tal ta jteclum Tarso. Lavie xyaquet ta scꞌopon Riox.

¹² Icacꞌbe xa yil ti chcꞌot avacꞌ acꞌob ta sjole yoꞌ ti xchaꞌjam o li sate ―xꞌutat la ti Ananíase.

¹³ Ti cꞌalal iyaꞌi ti Ananíase ―Cajval, taje ep muchꞌutic yalojbon ti chilbajin ti muchꞌutic yichꞌojot ta mucꞌ tey ta Jerusalene.

¹⁴ Lavie yichꞌoj tal orten yuꞌun totil paleetic ti xuꞌ xchuc echꞌel li muchꞌutic yichꞌojot ta mucꞌ liꞌtoe ―xi la ti Ananíase.

¹⁵ ―Batan. Li Sauloe jtꞌujoj onox yuꞌun jaꞌ chalbe cꞌusi caloj li muchꞌutic maꞌuc achiꞌilic ta israelale, xchiꞌuc li preserenteetique, xchiꞌuc voꞌoxuc ti coꞌol jꞌisraeloxuque.

¹⁶ Ta xcalbe ti voꞌon ta jcoj ti ep ta echꞌel ta xichꞌ ilbajinele ―xꞌutat la yuꞌun Cajvaltic Jesucristo ti Ananíase.

¹⁷ Ibat la ti Ananíase. Tey la icꞌot ta sna ti Judase. Ti cꞌalal iꞌoch ta yut nae, cꞌot la yacꞌ scꞌob ta sjol li Sauloe. ―Saulo, liꞌ listac tal ti Cajvaltic Jesuse ti coꞌol quichꞌojtic ta muqꞌue, jaꞌ ti muchꞌu avil ta bee. Listac tal yoꞌ ti xchaꞌjam o lasate, yoꞌ ti xaslecubtasbe o avoꞌon ti Chꞌul Espíritue ―xut la cꞌotel li Sauloe.

¹⁸ Ora la ipꞌaj ti cꞌusi macal o toꞌox li sate, ijam la. Iꞌacꞌbat la yichꞌ voꞌ.

¹⁹ Ti cꞌalal iveꞌe, itsatsub la noxtoc. Tey la ixchiꞌin jayib cꞌacꞌal ti muchꞌutic yichꞌoj ta mucꞌ ti Cajvaltic Jesucristo ta Damascoe.

²⁰ Li Sauloe ora la lic yal aꞌyuc ta jujun templo yoꞌ bu chaꞌiic smantal Riox ti xchiꞌiltac ta israelale ti jaꞌ Xchꞌamal Riox ti Jesucristoe.

²¹ Scotol ti muchꞌutic iyaꞌiic ti jaꞌ xa yech chal li Sauloe, xchꞌayet xa la yoꞌonic. ―Li jchiꞌiltic leꞌe jaꞌ li muchꞌu iyilbajin ti muchꞌutic yichꞌoj ta mucꞌ ti Jesuse ti tey nacajtic ta Jerusalene. Liꞌ xa noxtoque yuꞌun tal xchuc echꞌel li muchꞌutic jaꞌ yech xchꞌunojique yuꞌun chba yacꞌbe entrucal ti totil paleetique ―xiic la.

²² Li Sauloe más to la itsatsub yoꞌon ta yalbel scꞌoplal ti Cajvaltic Jesuse. Iyalbe la yaꞌi ti xchiꞌiltac tey nacajtic ta Damascoe ti jaꞌ onox scꞌoplal chtal pasvanuc ta mantal ti Jesuse. Ti cꞌalal iyal chac taje, mu xa la snaꞌ cꞌuxi chtacꞌavic.

²³ Cꞌalal oy xaꞌox scꞌacꞌalil lic yalbe scꞌoplal Jesucristo li Sauloe, ti xchiꞌiltac ta jurioal ti tey nacajtic ta Damascoe, lic la snopic cꞌu xꞌelan ta staic ta milel.

²⁴ Ti cꞌusi isnopique iyaꞌi la li Sauloe. Ti crixchanoetique ta cꞌacꞌal ta acꞌubal la tey vaꞌajtic ta jujun stiꞌil smacol ti jteclume. Tey la ta smalaic mi chlocꞌ li Sauloe yoꞌ la staic o ta milele.

²⁵ Cꞌalal iꞌicꞌub ti osile, itiqꞌue la ta mucꞌta moch yuꞌun li muchꞌutic yichꞌoj ta mucꞌ ti Cajvaltic Jesuse. Ixchuquic la ta chꞌojon ti moche, cꞌuncꞌun la iyalesat ta pat corralton. Jaꞌ la yech icol li Sauloe.