27 Ya zee chiꞌh Felipe. Chin badzihn ba loh neziuh chi badxaꞌga ba tuhbi bwiinn Etiopía. Bwiinn chi naa ba nin badxiꞌba tihxi ñiꞌh nee naa za ba xcuxchiisi rreina Candace. Laꞌh ba rguꞌchaꞌyi garaa raꞌ xmweeyi reina Etiopía chi, ya Jerusalehn gwah ba tin riꞌchi riagasuꞌnllihbi ba loh Dxiohs.
28 Ya chin babiaꞌgarii ba para lahdxyi ba zohba ba laꞌn tuhbi garrehda zahcaru duxa cayuꞌlda ba dxihtsi nin bacaꞌh guehtu Isaías xchiꞌdxyi Dxiohs loh ñiꞌh.
29 Chiꞌchi rahbi Spíritu Saantu loh Felipe: ―Gwabiiga cweeꞌ garrehda ca.
30 Chin gwabiiga Felipe bihn ba cayuꞌlda daada chi dxihtsi nin bacaꞌh Isaías, chiꞌchi rahbi Felipe loh daada chi: ―¿Ta rahcabwaꞌ luꞌh nin caa loh dxihtsi nin cayuꞌlda luꞌh?
31 Chiꞌchi rahbi bwiinn Etiopía chi loh Felipe: ―¿Xa gacabwaꞌn ayi chyu guluuꞌyi naꞌh? Lwehgu rahbi daada chi loh Felipe: ―Gucah tin soobaa nuꞌh tuhsi juunta tin nnaa luꞌh xa naa dxyiꞌdxyi nin caa loh dxihtsi riiꞌ.
32 Ya nez hasta cayuꞌlda bwiinn Etiopía chi loh dxihtsi nin caa xchiꞌdxyi Dxiohs rñiꞌ squiiꞌ: Guhchi ba zigazi riah tuhbi lliꞌhyi hasta rahchi ma, ya biaꞌhan ba cun ayi guñiꞌ ba loh raꞌ nin basaꞌcazii laꞌh ba nicala ziꞌchi guzaꞌca ba ayiza guñiꞌ ba.
