Hechos 7:2-26 in Achi

² Ire xu bij: —Nimak tak wachalal, nimak tak mamʼib, chin i ta na peʼ. I ka nim laj Dios, ujer xu cʼut rib che i ka mam, mam Abraham are ʼo pa jyub Mesopotámia. Are xu ʼan i Dios ile, i mam Abraham maja ca ʼe jeki pa jyub Haran.

³ I Dios xu bij che: “Cha canaj can a jyub, cha canaj can awachalal, y jat che jun jyub quin cʼut na chawe,” xu bij.

⁴ Are ʼuri i mam Abraham xel che i jyub Caldéa y xa ʼe jekel chila pa Haran. Xoʼon panok, xcam u kajaw, teʼuri i Dios xu cʼam li mam Abraham y xol jekel chi, pa oj ʼo wi woʼor.

⁵ I Dios n-xu ya ta che i mam Abraham we cu chap ni jyub waral, mi xa ta jubiʼ. Xu bij che chi coʼon panok i jyub-i re ni ire, xak que ni u muk u xiquin. Xui-ri, are xu ta i tzij-le, i mam Abraham n-ta racʼal.

⁶ I Dios, xak xu bij che chi u muk u xiquin que ʼe jekel na che jun tinimit naj, chi n-que taj. Xu bij chi quiqui tij ni uyej piquiʼab i winak chila; i winak-le quiqui ʼan che quib pacha je cajaw piquiwi. Queje ile quiqui tij ni cʼax cajib ciénto junab u wach.

⁷ “Xui-ri, i tinimit chi que u rajawij, quin ya na pa tojpen,” xu bij i Dios che. “Are que oʼtax a muk a xiquin, que ʼel chila y que pe chi, pa at ʼo wi, y quiqui coj in ʼij waral,” xu bij i Dios che i mam Abraham ujer.

⁸ Xak xu bij che chi chu ʼana retal che u chʼacul, ʼilbal-re chi lic re i Dios, xak ʼilbal-re chi Dios cu ʼan na pacha i u bim che. I retal-le, circuncision ca bix che. I mam Abraham, are xalax i racʼal, are ʼo chic wajxakib ʼij che, xak xu ʼan i retal che, pacha u bim i Dios. I racʼal, a-Isaac u bi. Are achi chic i ma Isaac, xak queje xu ʼan ire ile che i racʼal, chi a-Jacob u bi. Are achi chic i ma Jacob-le, xak queje xu ʼan ire ile chique i cablajuj racʼal chi xeʼelok je katit ka mam yoj.

⁹ Xoʼon panok, i racʼal i mam Jacob xpe coywal chirij i qui chaʼ, a-Jose, man ire mas cʼax ca naʼ rumal u kajaw. Rumal-i, xqui cʼayij bi i a-Jose che jun aj naj, chi xu cʼam bi ruʼ cʼa pa Egípto. Xui-ri, i Dios ʼo ruʼ i a-Jose,

¹⁰ y xresaj chi sak che niʼpa i cʼax xu tijo. Xu ya mas u nojbal i a-Jose, xak xu ʼan che i ʼatol tzij pa Egípto lic cʼax cu na ni a-Jose. I ʼatol tzij, ma Faraon ca bix che, ire xu ya i a-Jose puwi i tinimit, xak piquiwi i je ʼo pa rachoch ire.

¹¹ Xoʼon panok, xcʼun jun nim laj waʼjal; xqui tij uyej i winak pa Egípto, xak pa Canaan pa i je ʼo wi u kajaw i ma Jose, xak i ratz u chaʼ. I katit ka mam-le n-xqui rik taj wach quiqui tijo.

¹² I ma Jacob, are xu ta rason chi ʼo ixim chila pa Egípto, xe u tak bi u cʼojol chu tzucuxic. (Ique je are i katit ka mam yoj oj aj Israel winak.) Are i nabe cakan ʼuri pa Egípto.

¹³ Xoʼon panok, che ucamul cakan, i ma Jose xu bij chique chi ire are i qui chaʼ. Cʼa teʼuri i ma Faraon xu ta u be chi ma Jose aj Israel winak.

¹⁴ Teʼuri i ma Jose xu tak u cʼamic u kajaw, xak niʼpa i rachalal; i rachalal je seténta y cínco chic.

¹⁵ Are u ʼonquil ʼuri xqui ʼan i katit ka mam chi xe ʼe jekel cʼa naj pa tinimit Egípto. Xoʼon panok, xcam i mam Jacob chila, xak queje i ralcʼwal chi je katit ka mam, y xe muk na pa Egípto.

¹⁶ Xoʼon panok xquesaj li qui bakil y xqui cʼam li che i camposant re i ʼetz mam Abraham pa jyub Siquem. Oʼonom lok i mam Abraham u loʼom i jubiʼ jyub-le re u camposant; u loʼom chique i racʼal i ma Hamor chi je aj Siquem.

¹⁷ Xoʼon panok i aj Israel lic xqʼuiar qui wach chila pa Egípto. Lic je qʼui chic are ya cu rik i ʼij chi Dios craj que resaj piquiʼab i aj Egípto, pacha i u bim che i mam Abraham ujer.

¹⁸ Teʼuri xoc chic jun ʼatol tzij piquiwi i aj Egípto chi n-xretamaj tu wach i ʼetz ma Jose.

¹⁹ Ire n-ʼus ti xu ʼan chique i kach aj Israel; lic xu ʼan cʼax chique i katit ka mam. I xu ʼan i ʼatol tzij-le are iri: xu bij chi cacoʼtaj can i cacʼal cʼa je nochʼ, camsabal-que.

²⁰ Che tak i ʼij-le, xalax i ka mam, mam Moises. Ire, chom xa ʼiltaj rumal i Dios. I u kajaw u chuch xcuwaj oxib icʼ ruʼ ja.

²¹ (Are n-quiqui rik ta chic pa cacuwaj wi, xqui yijba jun ral chicach, xqui ya chupam, y xe ʼe qui ya chuwi ya) teʼuri i u miʼal i ʼatol tzij xu riko. Xu cʼam bic y xu qʼuitsaj; xu ʼan pacha racʼal che.

²² Rumal ʼuri, i aMoises, pa rachoch i ʼatol tzij xqʼuiy wi; xnawsax che, ronojel niʼpa i quetaʼam i nimak tak aj Egípto winak. Ire, xnimar u choʼab; niʼpa i cu bij, niʼpa i cu ʼano, ʼis ca tiqui che.

²³ Xoʼon panok, are ʼo chic cuarénta junab che, xu chʼob pu cʼux que ʼe rila i rach aj Israel; y xa ʼec.

²⁴ Chila xril wi jun aj Egípto ca tijin chu ʼanic cʼax che jun aj Israel. Xu to i rach aj Israel y xu camsaj i aj Egípto.

²⁵ Xu chʼob ire chi niʼpa i rach aj Israel quiqui ta ni u be chi ire are i tolque, chi rumal ire, i Dios que resaj ique pa cʼax piquiʼab i aj Egípto winak. Péro n-xqui ta tu be.

²⁶ Chucab ʼij, i ma Moises xe u rik chic queb aj Israel winak quiqui ʼan chʼoʼoj chiquiwach. Craj ire quiqui chomaj quib chiquiwach. Rumal-i xu bij chique: “Yix iwachalal iwib. ¿Wuchac ʼuri qui ʼan chʼoʼoj?” xu bij chique.

² Ekꞌu rire xubꞌiꞌij: «Alaq achijabꞌ y alaq nimaq winaq, chinta na pe alaq. Ri Dios, ri Jun lik kꞌo unimal chomalil rukꞌ, xuqꞌalajisaj ribꞌ chwach ri qaqaw Abraham echiriꞌ rire kꞌo pa ri luwar re Mesopotamia, waꞌ e echiriꞌ kꞌamajaꞌ keꞌjeqela pa ri tinamit Harán.

³ Xubꞌiꞌij ri Dios che: “Chatelubꞌi chupa ratinamit y chikixoꞌl rawatz-achaqꞌ; y jat kꞌu chwach rulew pa kankꞌut wi riꞌin chawe” xchaꞌ.

⁴ Ekꞌuchiriꞌ, xel bꞌi ri Abraham chwach rulew ke raj Caldea y xjeqiꞌ pa ri tinamit Harán. Chwi kꞌu rukamik ruqaw, xtaq lo ruma ri Dios chupa wa luwar pa jeqel wi alaq woꞌora.

⁵ »Pero ri Dios na xuya tane che ri Abraham kuꞌan rajaw waꞌ wuꞌlew, tobꞌ tane xa pa kuya wi juna raqan. Noꞌj xubꞌiꞌtisij kꞌu che tobꞌ ne rire kaminaq chik, waꞌ wuꞌlew kuꞌana na re y ke ri ralkꞌoꞌal kanoq; yey echiriꞌ xbꞌiꞌx waꞌ che ri Abraham, kꞌamajaꞌ ne kꞌo juna ralkꞌoꞌal.

⁶ Ekꞌu ri Dios xubꞌiꞌij che ri Abraham: Taq rawalkꞌoꞌal kanoq kebꞌeꞌjeqela na pa jun ulew na kulew taj. Y chiriꞌ kꞌu riꞌ kaꞌaniꞌ nibꞌaꞌibꞌ chike y keyaꞌiꞌ pa kꞌaxlaj chak kajibꞌ ciento junabꞌ kuma ri tikawex re ri tinamit pa kekꞌojiꞌ wi.

⁷ Pero In kinqꞌataw tzij pakiwi wa tinamit, ri kakiya pa kꞌaxlaj chak ri nutinamit. Tekꞌuchiriꞌ, ri nutinamit kebꞌel loq y ketzelej loq y kinkiloqꞌnimaj chupa wa luwar at kꞌo wi xchaꞌ.

⁸ »Ri Dios xuꞌan jun tzij rukꞌ ri Abraham, yey ri kꞌutubꞌal re waꞌ wa tzij e ri retalil re circuncisión. E uwariꞌche ri Abraham xukoj ri retalil re circuncisión che rukꞌajol Isaac echiriꞌ xukꞌis wajxaqibꞌ qꞌij ralaxik. Jekꞌulaꞌ xuꞌan ri Isaac che rukꞌajol Jacob. Y ri Jacob jelaꞌ xuꞌan chike ri kabꞌlajuj ukꞌajol, ri e qamam re ri qatinamit.

⁹ »Ekꞌu rike xok retzelal kꞌuꞌx pa kanimaꞌ chirij ri kichaqꞌ José. Ruma kꞌu riꞌ, xkikꞌayij bꞌi chaꞌ kakꞌam bꞌi Egipto. Pero ri Dios kꞌo rukꞌ ri José

¹⁰ y xresaj kꞌu chupa ronoje taq ri kꞌaxkꞌobꞌik xikꞌow wi. Xuya unaꞌoj y xuꞌan che lik xukꞌul upuwach ri faraón, ri taqanel re Egipto. Ma ri faraón xuya che ri José kataqan puwi ri tinamit re Egipto y xuya puqꞌabꞌ rire ronoje rubꞌitaq re.

¹¹ »Xpe kꞌu jun unimal numik chupa taq ronoje ri luwar re Egipto y re Canaán. Ruma kꞌu waꞌ xpe unimal kꞌaxkꞌobꞌik pakiwi ri qatiꞌ-qamam ma na jinta kakitijo.

¹² »Echiriꞌ ri Jacob xunaꞌbꞌej chilaꞌ Egipto kꞌo katijik, xebꞌutaq bꞌi rukꞌajol chaꞌ keꞌkiloqꞌo trigo chilaꞌ. Waꞌ e ri nabꞌe bꞌenam xkiꞌan ri qamam chilaꞌ Egipto.

¹³ Ekꞌu che rukalaj kibꞌenam, ri José xuqꞌalajisaj ribꞌ chikiwach ri ratzixelabꞌ. Jekꞌulaꞌ ri faraón xretaꞌmaj china taq ri e ratz-uchaqꞌ ri José.

¹⁴ »Yey ri José xutaq ukꞌamik ruqaw Jacob y konoje ri e ratz-uchaqꞌ. Ri kajlibꞌal rike chi konoje e setenta y cinco.

¹⁵ Jekꞌulaꞌ xeꞌjeqela ri Jacob pa ri tinamit Egipto. Chilaꞌ kꞌu riꞌ xkam wi rire y chilaꞌ xekam wi ri qamam.

¹⁶ Xkꞌam kꞌu bꞌi ri kibꞌaqil pa ri tinamit Siquem y xeyaꞌ pa ri muqubꞌal uloqꞌom kan ri Abraham rukꞌ ukꞌiyal puaq chike ri ralkꞌoꞌal kan ri Hamor, chilaꞌ Siquem.

¹⁷ »Yey ekꞌuchiriꞌ katajin roponik ri qꞌij echiriꞌ ri Dios kuꞌana na rubꞌiꞌtisim che ri Abraham, taq ri ralkꞌoꞌal rire lik xekꞌiyar chilaꞌ Egipto.

¹⁸ Tekꞌuchiriꞌ, xyaktaj jun chik rey chiriꞌ Egipto; ekꞌu rire na xretaꞌmaj ta uwach ri José.

¹⁹ Waꞌ wa rey xebꞌusok ri qatinamit ojertan. Lik xebꞌuya ri qatiꞌ-qamam pa kꞌaxkꞌobꞌik, ma xtaqan che kekamisax ri kichꞌutiꞌq e alabꞌo chaꞌ jelaꞌ na kakꞌiyar ta kiwach ri qatinamit.

²⁰ »Chupa taq kꞌu riꞌ laꞌ la qꞌij xalax ri Moisés y e jun chomilaj akꞌa chwach ri Dios. Ekꞌu rire oxibꞌ ikꞌ xchajix xa xeꞌlaqꞌay pa rocho ruqaw.

²¹ Pero echiriꞌ na utz ta chi kewax pa ja, xesax bꞌi y xeꞌriqitaj lo ruma rumiꞌal ri faraón; y waꞌli xukꞌiyisaj y xuꞌan pachaꞌ ralabꞌ che.

²² Jekꞌulaꞌ, ri Moisés xtijox puwi ronoje ri naꞌoj ke ri aj Egipto, y xuꞌana jun achi lik kꞌo uchuqꞌabꞌ che janipa taq ri kubꞌiꞌij y kuꞌano.

²³ »Echiriꞌ xukꞌis cuarenta junabꞌ, xalax pa ranimaꞌ keꞌbꞌina kukꞌ ri ratz-uchaqꞌ, ri e aj Israel.

²⁴ Y xril kꞌu riꞌ lik kaꞌan kꞌax che jun chike ruma jun aj Egipto. Xutoꞌ kꞌu uwiꞌ ri ratz-uchaqꞌ yey xukamisaj ri aj Egipto.

²⁵ E xuchꞌobꞌ rire, taq ri ratz-uchaqꞌ kakimaj usukꞌ e ruma rire kebꞌeresaj bꞌi ri Dios pakiqꞌabꞌ raj Egipto; noꞌj rike na je ta laꞌ ri xkimaj usukꞌ.

²⁶ »Chukaꞌm qꞌij kꞌut xebꞌuꞌriqa kaꞌibꞌ aj Israel kechꞌoꞌjin chikiwach y xraj kebꞌuya putzil chomal. Xubꞌiꞌij kꞌu chike: “Achijabꞌ, ralaq chaqꞌ ibꞌ alaq. ¿Suꞌchak kꞌu riꞌ kaꞌan kꞌax che ibꞌ alaq chiwach alaq?” xchaꞌ.

² Ecꞌu rire xubiꞌij: «Alak achijab y alak nimak winak, chinta na pe alak. Ri Dios, ri Jun lic cꞌo unimal chomalil rucꞌ, xukꞌalajisaj rib chwach ri kakaw Abraham echiriꞌ rire cꞌo pa ri luwar re Mesopotamia, waꞌ e echiriꞌ cꞌamajaꞌ queꞌjekela pa ri tinamit Harán.

³ Xubiꞌij ri Dios che: “Chatelubi chupa ratinamit y chiquixoꞌl rawatz-achakꞌ; y jat cꞌu chwach rulew pa cancꞌut wi riꞌin chawe” xchaꞌ.

⁴ Ecꞌuchiriꞌ, xel bi ri Abraham chwach rulew que raj Caldea y xjekiꞌ pa ri tinamit Harán. Chwi cꞌu rucamic rukaw, xtak lo ruma ri Dios chupa wa luwar pa jekel wi alak woꞌora.

⁵ »Pero ri Dios na xuya tane che ri Abraham cuꞌan rajaw waꞌ wuꞌlew, tob tane xa pa cuya wi juna rakan. Noꞌj xubiꞌtisij cꞌu che tob ne rire caminak chic, waꞌ wuꞌlew cuꞌana na re y que ri ralcꞌoꞌal canok; yey echiriꞌ xbiꞌx waꞌ che ri Abraham, cꞌamajaꞌ ne cꞌo juna ralcꞌoꞌal.

⁶ Ecꞌu ri Dios xubiꞌij che ri Abraham: Tak rawalcꞌoꞌal canok quebeꞌjekela na pa jun ulew na culew taj. Y chiriꞌ cꞌu riꞌ caꞌaniꞌ nibaꞌib chique y queyaꞌiꞌ pa cꞌaxlaj chac cajib ciento junab cuma ri ticawex re ri tinamit pa quecꞌojiꞌ wi.

⁷ Pero In quinkꞌataw tzij paquiwi wa tinamit, ri caquiya pa cꞌaxlaj chac ri nutinamit. Tecꞌuchiriꞌ, ri nutinamit quebel lok y quetzelej lok y quinquilokꞌnimaj chupa wa luwar at cꞌo wi xchaꞌ.

⁸ »Ri Dios xuꞌan jun tzij rucꞌ ri Abraham, yey ri cꞌutubal re waꞌ wa tzij e ri retalil re circuncisión. E uwariꞌche ri Abraham xucoj ri retalil re circuncisión che rucꞌajol Isaac echiriꞌ xuqꞌuis wajxakib kꞌij ralaxic. Jecꞌulaꞌ xuꞌan ri Isaac che rucꞌajol Jacob. Y ri Jacob jelaꞌ xuꞌan chique ri cablajuj ucꞌajol, ri e kamam re ri katinamit.

⁹ »Ecꞌu rique xoc retzelal cꞌuꞌx pa canimaꞌ chirij ri quichakꞌ José. Ruma cꞌu riꞌ, xquicꞌayij bi chaꞌ cacꞌam bi Egipto. Pero ri Dios cꞌo rucꞌ ri José

¹⁰ y xresaj cꞌu chupa ronoje tak ri cꞌaxcꞌobic xicꞌow wi. Xuya unaꞌoj y xuꞌan che lic xucꞌul upuwach ri faraón, ri takanel re Egipto. Ma ri faraón xuya che ri José catakan puwi ri tinamit re Egipto y xuya pukꞌab rire ronoje rubitak re.

¹¹ »Xpe cꞌu jun unimal numic chupa tak ronoje ri luwar re Egipto y re Canaán. Ruma cꞌu waꞌ xpe unimal cꞌaxcꞌobic paquiwi ri katiꞌ-kamam ma na jinta caquitijo.

¹² »Echiriꞌ ri Jacob xunaꞌbej chilaꞌ Egipto cꞌo catijic, xebutak bi rucꞌajol chaꞌ queꞌquilokꞌo trigo chilaꞌ. Waꞌ e ri nabe benam xquiꞌan ri kamam chilaꞌ Egipto.

¹³ Ecꞌu che rucalaj quibenam, ri José xukꞌalajisaj rib chiquiwach ri ratzixelab. Jecꞌulaꞌ ri faraón xretaꞌmaj china tak ri e ratz-uchakꞌ ri José.

¹⁴ »Yey ri José xutak ucꞌamic rukaw Jacob y conoje ri e ratz-uchakꞌ. Ri cajlibal rique chi conoje e setenta y cinco.

¹⁵ Jecꞌulaꞌ xeꞌjekela ri Jacob pa ri tinamit Egipto. Chilaꞌ cꞌu riꞌ xcam wi rire y chilaꞌ xecam wi ri kamam.

¹⁶ Xcꞌam cꞌu bi ri quibakil pa ri tinamit Siquem y xeyaꞌ pa ri mukubal ulokꞌom can ri Abraham rucꞌ uqꞌuiyal puak chique ri ralcꞌoꞌal can ri Hamor, chilaꞌ Siquem.

¹⁷ »Yey ecꞌuchiriꞌ catajin roponic ri kꞌij echiriꞌ ri Dios cuꞌana na rubiꞌtisim che ri Abraham, tak ri ralcꞌoꞌal rire lic xeqꞌuiyar chilaꞌ Egipto.

¹⁸ Tecꞌuchiriꞌ, xyactaj jun chic rey chiriꞌ Egipto; ecꞌu rire na xretaꞌmaj ta uwach ri José.

¹⁹ Waꞌ wa rey xebusoc ri katinamit ojertan. Lic xebuya ri katiꞌ-kamam pa cꞌaxcꞌobic, ma xtakan che quecamisax ri quichꞌutiꞌk e alabo chaꞌ jelaꞌ na caqꞌuiyar ta quiwach ri katinamit.

²⁰ »Chupa tak cꞌu riꞌ laꞌ la kꞌij xalax ri Moisés y e jun chomilaj acꞌa chwach ri Dios. Ecꞌu rire oxib icꞌ xchajix xa xeꞌlakꞌay pa rocho rukaw.

²¹ Pero echiriꞌ na utz ta chi quewax pa ja, xesax bi y xeꞌrikitaj lo ruma rumiꞌal ri faraón; y waꞌli xuqꞌuiyisaj y xuꞌan pachaꞌ ralab che.

²² Jecꞌulaꞌ, ri Moisés xtijox puwi ronoje ri naꞌoj que ri aj Egipto, y xuꞌana jun achi lic cꞌo uchukꞌab che janipa tak ri cubiꞌij y cuꞌano.

²³ »Echiriꞌ xuqꞌuis cuarenta junab, xalax pa ranimaꞌ queꞌbina cucꞌ ri ratz-uchakꞌ, ri e aj Israel.

²⁴ Y xril cꞌu riꞌ lic caꞌan cꞌax che jun chique ruma jun aj Egipto. Xutoꞌ cꞌu uwiꞌ ri ratz-uchakꞌ yey xucamisaj ri aj Egipto.

²⁵ E xuchꞌob rire, tak ri ratz-uchakꞌ caquimaj usucꞌ e ruma rire queberesaj bi ri Dios paquikꞌab raj Egipto; noꞌj rique na je ta laꞌ ri xquimaj usucꞌ.

²⁶ »Chucaꞌm kꞌij cꞌut xebuꞌrika caꞌib aj Israel quechꞌoꞌjin chiquiwach y xraj quebuya putzil chomal. Xubiꞌij cꞌu chique: “Achijab, ralak chakꞌ ib alak. ¿Suꞌchac cꞌu riꞌ caꞌan cꞌax che ib alak chiwach alak?” xchaꞌ.