HECHOS 5:1-32 in Huastec

¹ Hua’ats jaye jun i ebchalab im bij Ananías in nuju in tsabalil. In tomquil pel a Safira.

² In canchi hue’ an tumin c’al ax ti jalbinchat c’al an tsabal, ani axi más jats im binanchi tin c’ubac an abathualechic. In ucha’ abal ja’its tim patal an tumin axi jalbinchame. Expith in tomquil jats in tso’obna’ abal yab chubax.

³ Tam uchan a Ananías c’al a Pedro: ―Tata’ ojni’ a hualca’ ta ba’ ti otsanchi ta ichich a Satanás abal ti t’ajchi quit janamcahuin. It hualbinenec c’al an Espíritu Santo cum a canchi hue’ an tumin jahua’ tit jalbinchame.

⁴ Nixe’ xi tsabal pel a lej c’al tam ti yabaye a nujumal, ani tam tit jalbinchamejits tam nixe’ xi tumin pel a lej c’al. A ejtohuamalac ca eyentha’ jant’inits a culbetal, ani yab quit janamcahuin. Xo’ ojni’ it janamcahuinits c’al a Dios, ani yab expith c’al huahua’ it janamcaunenec.

⁵ Tam tin ats’a’its antsana’ a Ananías, tam t’ajat ijcan tsemenec. Ani lej jiq’uey patal jitats in tso’obna’ abal antsana’ ti tsemetsits jun jic’tohual.

⁶ Chich i cuitolchic ani in thu’banchi in inictal, in ne’tha’ quin joliy.

⁷ Ox i hora talbel tam ti otsitsits in tomquil a Ananías. Yab in tso’bim max tsemenequits a Ananías.

⁸ Tam uchan c’al a Pedro: ―Tiquin ucha’ an chubaxtalab max jats antsana’ tin nujumal an tsabal a q’uimathil jant’ini’ tin olchamalits jaja’. Toc’tsin jaja’ in ulu: ―Ojni’ chubax ja’its antsana.

⁹ Tam uchan c’al a Pedro: ―¿Tata’ ojni’ jale’ a juncu an cau quit junax janamcahuin c’al a q’uimathil? It hualbinenecte c’al an Espíritu Santo. Te huichits an cuitolchic ax in ne’tha’ quin joliy a q’uimathil, ani tata’te ne’ets ti ne’tha’ quit jolin.

¹⁰ Ani tameq’ui ti t’ajat ijcan tsemenec jaye a Safira tin acan a Pedro. Otsits alta an cuitolchic ani in tsu’u mo’ol tsemenequits. In caltha’ in ne’tha’chic jaye ani in joliy utat jun ti jolithits in q’uimathil Ananías.

¹¹ Ani jats ti lej jiq’uey patal im bichohuil a Dios ani patal jitats in tso’obna’ abal antsana’ t’ajat tsemetsits a Ananías ani a Safira.

¹² An abathualechic in t’ajale yan i labith t’ajbilab ti tsu’bixtalab c’al an inicchic. Ani taley tamcun c’al jaja’chic yantalam i belom tin hueu cucu’il an tiyopan. Im bij nixe’ xi hueu cucu’lab Salomón.

¹³ Patal pel i belom axi tamcuth, cum axi yab belom in ts’ejnal ca tamcun. Aba ani’ yab in inicnal tim ba’ ca tamcun c’al am belomchic, bel in lej c’ac’nalchic.

¹⁴ Ani lej yanenel ne’ets am belom c’al an Ajatic, i inic ani i uxum.

¹⁵ U chi’thachicab ti bel yan i ya’ul c’al i lactem ani q’ue’at c’al i tseyte’ tat, ani u mo’cab jun ti ne’ets ca huat’ey a Pedro. Lej lequitsq’ui max ca huat’ey a Pedro ani ca tsalamliyat, c’al ca t’ajat jeltha.

¹⁶ Taja’ ti Jerusalén u ulelel yantalam i inic axi tal al i bichouchic axi utat. In chi’thachicalchic i ya’ul ani axi co’oyab c’al i at’ax teneclab. Tim patal u jelthathayab c’al an abathualechic.

¹⁷ Taley lej pa’ixnanchab in tsap an abathualechic c’al an ts’ale pale’ ani c’al an cuenel saduceo axi ts’at’at c’al jaja’ an ts’ale pale’.

¹⁸ Jaxtam yac’uanchic ani baliyat al an huic’axte’.

¹⁹ Ani taja a Dios in aba’ jun i ángel abal quin japchi in hui’lebil an huic’axte’ tam acal. In caltha’ an abathualechic ani in ucha’:

²⁰ ―Quit c’alechic ti al an tiyopan ani ca olchi an inicchic jant’ini’ ta ca it ejatliyat c’al an Ajatic.

²¹ Tam tin ats’a’its antsana’ an abathualechic, tam c’alechic ani otsits ti al an tiyopan ti exobchix. Thajuhuits tamna’. C’uajate ti exobchix an abathualechic ti al an tiyopan, ani an ts’ale pale’ ani in tolmihualchic in tamcuy an yejtselabchic Israel axi pel i cuenel ts’ejcom cau axi lej c’athpich exbath in ey. Cum in tsalpayalchic abal c’uajate an abathualechic ti al an huic’axte’ in aba’ i ic’tom ca ic’tatchic.

²² Tam ti ulitschic an ic’tom tihua’ al an huic’axte’ yab jita’ hua’ats. Huichits jaja’chic c’al an cuenel ts’ejcom cau quin olchi yab jita’ hua’ats.

²³ In ucha’chic: ―I tsu’u tocat mapuputhits an huic’axte’ ani lej alhua’ beletnanath c’al i soldadochic. Tam tu japchatits an hui’leb, ni jita’ yab hua’ats.

²⁴ Tam tin ats’a’its antsana’ an cau an ts’ale pale’, ani c’al an oc’lec c’al am beletnom tiyopanchic, ani c’al am pale’chic axi lej exbath, tam jilc’onchic lej c’upupul in tsalap. In uluchic jant’o hualam t’ajnenec ani ne’ets ca más t’ajane.

²⁵ Taley tameq’ui ulcan c’al jaja’chic jun i inic in ulu: ―An inicchic ax a baliyamal al an huic’axte’ tihua’ c’uajat ti al an tiyopan ti exobchix junil c’al an inicchic.

²⁶ Tam an oc’lec c’al am beletnom tiyopanchic, ani c’al nixe’ xi ic’tomchic c’alechic quin iq’ui’ an abathualechic c’al i lej c’aya’talab. Yab ic’tat c’al i othnaxtalab, cum an ic’tomchic in ts’ejnal max ca cui’iyat c’al i t’ujub c’al am bichou.

²⁷ In ultha’itschic tin tamet an cuenel ts’ejcom cau. Tam an ts’ale pale’ in ucha’ an abathualechic:

²⁸ ―Huahua’ tu lej tsapic uchamalits abal yabats jita’ ca más exobchichiquiy tin cuenta a Jesús. Bel a t’ajalchic, ma tim patal an c’uajilom teje’ ti bichou Jerusalén in ats’amalits a exobchixtal. Ani jaye a le’chic tucu jolbiy c’al in tsemtal a Jesús.

²⁹ Tam toc’tsin a Pedro ani axi q’ue’at an abathualechic in uluchic: ―Pel i uchbil qui oc’ox t’ajchi jahua’ tucu abatna’ a Dios. Yab qui t’ajchi jahua’ tucu abatna’ i inic max yab juncuth in tsalap c’al a Dios.

³⁰ Ojni’ tata’chic a tsemtha’ a Jesús ti al i pelc’oth te’, ani pel in Diosil i biyal at juntal c’al ti ejtha a Jesús tam ti tsemenequits.

³¹ Ja’its a Dios ax in c’uajba’ a Jesús tin huinab c’ubac jant’ini’ ti puhuethanchithits im bij. Im punuhuits ti Ts’ale Abatnom ani ti Jec’onthax c’al an inicchic. Xo’ a Dios in le’ abal huahua’ tu Israelchic cu jic’tson c’al i hualab ani cu paculanchat i hualab.

³² Lej chububul axe’ xi cau jahua’ i olnal, ani jaye an Espíritu Santo in olnal xe’. Ja’its jaja’ an Espíritu Santo u pithnal c’al a Dios jitats quin t’ajchi jahua’ a Dios in le’.

¹ Por jun i inik jeye xu bijyáb ta Ananías ani nin tomtal xin bij ta Safira, in nujutsik jeye jun i chabál.

² Jechéꞌ an inik, yab in pidhnaꞌ ejtal an tumín, in jilaꞌ wéꞌ ani xi más, in pidhaꞌ an abatwáletsik. Por jajáꞌ in pidhnaꞌ jachanꞌ an tumín jelti max ejtal xin bachʼu ani nin tomtal in choꞌób alwaꞌ ejtal jechéꞌ.

³ Utsan tám enchéꞌ kʼal na Pedro: ―Ananías, ¿jantʼókʼi ta walkaꞌ ti ki átantsi ta itsích an lej atʼax abal ti tʼajaꞌ ka kʼambiy an Tʼokat Ejattaláb ani yab ka pidhnaꞌ ejtal in jalbíl an chabál xa nujúmal?

⁴ ¿Yabxeꞌ tatáꞌ a dhabal jachanꞌ an chabál? Ani tam ta nujúch, ¿yabxeꞌ tatáꞌ a dhabal an tumín xa bachʼu? ¿Jantʼókʼi ta chalpay ka tʼajaꞌ anchanꞌ? Yab a kʼambiyámal i iniktsik, xitaꞌ a leꞌnámal ka kʼambiy, a Dios.

⁵ Tam tin achʼaꞌ jechéꞌ, na Ananías kwajlan ani chemech. Ejtal xin choꞌóbnaꞌtsik jechéꞌ, jikʼeytsik tʼajat.

⁶ Ulich tám cháb óx i kwitól iniktsik, in boliy an chemélom ani in júnaꞌtsik kin joliy.

⁷ Óx i ora más tayíl, ochich nin tomtal na Ananías ani jajáꞌ yab in choꞌób xantʼéy támnék.

⁸ Konyat enchéꞌ kʼal na Pedro: ―Ti kin utsaꞌ, ¿tsubaxxeꞌ lejtal anchanꞌ ta nujúmaltsik an chabál jelt xan ta ulúmaltsik? An mímláb tókʼon enchéꞌ: ―Anchanꞌ.

⁹ Utsan tám enchéꞌ kʼal na Pedro: ―¿Jantʼókʼi ta tʼajaꞌtsik i káw abal a leꞌnaꞌ ka kʼambintsi tin Tʼokat Ejattal an Okʼóxláb? Jachanꞌ tál eléb xi kʼaletsik kin joliy na tomkíl ani xoꞌ, tatáꞌ teye neꞌech ti ki júnaꞌ.

¹⁰ Támkʼi jachanꞌ, kwajlan jeye chabál na Safira ani chemech. Tam ti ochich an kwitól iniktsik, chemnekich tin elaꞌ; in káldhaꞌichtsik tám ani in júnaꞌ kin joliy tin wál xon ti jolidh nin tomkíl.

¹¹ Ejtal an atiklábtsik xu belomich ani ejtal jeye xin choꞌóbnaꞌtsik jechéꞌ, jikʼeytsik tʼajat.

¹² Yán i exóltsik ani i labidh labandhaxtalábtsik in tʼajál an abatwáletsik ban atikláb kʼal tin awiltal an Ajátikláb; ejtal an belomtsik u junkunal ban chakʼ xu bijyáb Salomón ani juniniꞌtsik nin chalab.

¹³ Yab u junkunal kʼal jajáꞌtsik ni jun xitaꞌ xi yab u belom, por u kʼakʼnábtsik tʼajat kʼal an atiklábtsik.

¹⁴ Tsudhey ka tsudhey más u yanel an atiklábtsik xin belálich an Ajátikláb, i payꞌlomlábtsik ani i mímlábtsik.

¹⁵ U káldháb an yaꞌultsik ban béltsik, u kʼwajbáb ban chéytsik ani ban chayteꞌtsik abal ka bajwattsik kʼal nin chalám na Pedro tam ka watʼey tajaꞌ.

¹⁶ U ulel jeye i atiklábtsik Jerusalén xu kʼwajíl ban kwentsaltsik xi tajaꞌ kʼunat. In tsiꞌdhál an yaꞌultsik ani xi kʼwajattsik jeye ochadh kʼal i atʼax ejattaláb ani ejtal u jeldhábtsik.

¹⁷ An okʼlek páleꞌtsik ani nin kidhtal an saduseotsik, xi taꞌ ti kʼwajattsik kʼal jajáꞌ, chakuytsik tʼajat abal in atʼál xowaꞌ in tʼajál an abatwáletsik

¹⁸ ani in júnaꞌ abal kin baliy ban wikʼaxteꞌ xon tu balyáb ejtalkʼitsik.

¹⁹ Por tam ti akal, jun in tʼokat abatwálejil an Ajátikláb in japiy in wiꞌlébil an wikʼaxteꞌ ani in káldhaꞌtsik. Tam ti exomich ti kalel, utsantsik enchéꞌ:

²⁰ ―Ki kʼaléchtsik ani tam i kʼwajattsik ban pulek atá xon tu kʼakʼnáb na Dios, ka tʼiltsi an atiklábtsik ejtal kʼal tin kwenta jechéꞌ an ít xeꞌchintaláb.

²¹ Tam tin achʼaꞌtsik jechéꞌ, jun tsudhelom dhajawe ti ochichtsik ban pulek atá xon tu kʼakʼnáb na Dios ani in tujutsik ti okʼtsix. Tam ti jachanꞌ, ulich an okʼlek páleꞌtsik junax kʼal xi taꞌ ti kʼwajattsik kʼal jajáꞌ, in kaniytsik xu takʼix ban Junkulom Awiltaláb ani ejtal jeye nin okʼlékil an israelitatsik. In abnaꞌ tám ka ikʼtat ban wikʼaxteꞌ an abatwáletsik.

²² Por tam ti ulich ban wikʼaxteꞌ an belkoltsik, yab in elaꞌtsik; ani tam ti witsiytsik,

²³ in ulu enchéꞌ: ―Mapupudh alwaꞌ ti elaꞌ an wikʼaxteꞌ ani an soldadotsik taꞌ ti kʼwajat eléb ti belkol ban wiꞌlebtsik; por tam tin japiy an wiꞌlebtsik, yab i elaꞌ ni jun xitaꞌ altá.

²⁴ Tam tin achʼaꞌtsik jechéꞌ nin okʼlékil an páleꞌtsik, nin okʼlékil xu belkoltsik an ti pulek atá xon tu kʼakʼnáb na Dios ani an ultaláb páleꞌtsik, u kónóxtsik xan ti neꞌech ka kʼale ti okʼnal jechéꞌ.

²⁵ Támkʼi jachanꞌ, ulich jun i inik ani utsantsik kʼál enchéꞌ: ―An iniktsik xa balyámaltsik ban wikʼaxteꞌ, taꞌ kʼwajattsik in okʼtsal an atiklábtsik ban pulek atá xon tu kʼakʼnáb na Dios.

²⁶ Kʼale tám nin okʼlékil xu belkoltsik an ti pulek atá, kʼál an yákʼwaltsik ani in tsiꞌdhaꞌtsik, por yab xataꞌ tin tʼajtsitsik abal in chʼejnál ka tʼujbayat kʼal an atiklábtsik.

²⁷ Tam ti uldhátsik, kʼwajbá tin tamét an Junkulom Awiltaláb ani utsantsik enchéꞌ kʼal nin okʼlékil an páleꞌtsik:

²⁸ ―Wawáꞌ i ulu alwaꞌ abal yabich i léꞌ ki chuꞌu ki okʼtsixintsik tin bij na Jesukristo. ¿Ani jantʼéy a tʼajaꞌtsik? Ejtal an atiklábtsik xi Jerusalén a okʼtsámalichtsik kʼal jachanꞌ an okʼtsixtaláb ani a léꞌtsik ti ku walbindhaꞌ kʼal nin chemtal jachanꞌ an inik.

²⁹ Tókʼon tám na Pedro ani xi más an abatwáletsik enchéꞌ: ―Wawáꞌ i choꞌób alwaꞌ ke yejat ki tʼajaꞌ xowaꞌ in ulal nin tsubaxtalábil na Dios ani yab, xowaꞌ in ulal an iniktsik.

³⁰ Nin Diosil ni wejeꞌ pakélil in ejdhaꞌ ti ít na Jesús, xi tatáꞌtsik a chemdhaꞌ pajkʼidh ban peltsidh teꞌ.

³¹ Na Dios in dhayaꞌ tʼekʼat, in kʼwajbaꞌ tin eját ani in kʼwajbaꞌ ti Okʼpidh Okʼlek ani ti Loꞌox. In tʼajaꞌ anchanꞌ abal kin pidhaꞌ bél ti kʼij an atiklábtsik xi Israel abal kin jilaꞌtsik ti walablom ani ka pakwlantsat tin walastalábiltsik.

³² Ejtal jechéꞌ i chuꞌúmal weye ani an Tʼokat Ejattaláb jeye. Jechéꞌ an Tʼokat Ejattaláb, jaꞌich xi na Dios in pidhámalich xu axtsinal kʼál tin tsubaxtalábil.