Hechos 4:1-17 in Achi

¹ I ma Pédro, i ma Wan, cʼa que tijin chi tzij are xe cʼun li juban winak lic que oywaric. I winak-i je are jujun sacerdóte, xak i cajʼatzil i policía re i rachoch i Dios, xak jujun chique i aj Saducéo.

² Ique que oywaric man i ma Pédro i ma Wan que tijin chu cʼutic chique i winak chi i camnak ca cʼun chic sak chiquiwach. Quiqui bij chi ʼetamam ni ile man i Jesus walijnak chic che i camic.

³ I policía xe qui chap i ma Pédro i ma Wan y xe qui tzʼapij pa cárcel. Ya xkaj i ʼij, rumal-i cʼa chucab ʼij que ʼelsax-lok, (que yaʼ chuwach i ʼatbal tzij).

⁴ Xui-ri, je qʼui chique i xqui ta i qui tzij i ma Pédro i ma Wan, xqui cuba qui cʼux che i Jesucrísto. Rumal ʼuri xe qʼuiar i creyent, colo je joʼob mil achiab chique.

⁵ Chucab ʼij i cajʼatzil i aj Israel winak xqui mol quib pa tinimit Jerusalen junam cuʼ i nimak tak mamʼib, xak cuʼ i tijonel re i ujer ʼatbal tzij.

⁶ Xak xupon i mam Anas chi ʼatz laj sacerdóte, xak i ma Caifas, i ma Wan, i ma Alejándro, xak conojel i cachalal i cajʼatzil i sacerdóte.

⁷ Xqui tak qui cʼamic i ma Pédro, i ma Wan. Xe qui tacʼba chiquiwach, y xe oc chu tzʼonoxic chique: —¿Pachin xyaw ile piʼab? ¿Pachin xix takaw chu ʼonquil iri? —xe cha chique.

⁸ I ma Pédro, lic rumal i u Tewal i Dios ʼo ruʼ, queje iri xu bij chique: —Ix nimak tak kajʼatzil, ix nimak tak mamʼib quin ya rutzil i wach.

⁹ Yix quix tijin chi tacʼalem pa rakan wach u ʼonquil jun utzil chomal ʼantal che jun achi iwab. Qui tzʼonoj chake wach i utziric xu ʼano.

¹⁰ Woʼor caka ʼalijinsaj chiwe. Cakaj caquetamaj conojel i aj Israel winak chi xa rumal u ʼab i Jesucrísto aj Nazaret xutzir i achi-ri chi ʼo chiwach iwonojel; xa rumal i Jesucrísto, yijinak chic u chʼacul. Are i mísmo Jesucrísto chi xi camsaj yix chuwach cruz, chi xak xcʼastax u wach rumal i Dios, are ire ʼanawnak iri.

¹¹ Chupam u wuj i Dios cu bij: I abaj chi xi xutuj yix ix aj ʼanol ja, are i abaj-le chi xeʼelok mas nim ni u chac. (Queje ile tzʼibtal canok. Are i Jesus are i abaj-le chi xutux canok, xui-ri i Dios u ʼanom che chi nim u patan.)

¹² Xui i Jesus coj ʼelsaw chupam i ka mac; n-ta chic jun chic chuwach i jyub taʼaj. Xui ire-le yatal puʼab rumal i Dios chi coj u to —xu bij i ma Pédro chique.

¹³ I nimak tak mamʼib lic xqui bisoj are xquilo chi ma Pédro i ma Wan lic co qui cʼux. Xquil u be chi ne te tijojtalic, n-ti qui patan, toʼ je winak. Teʼuri xquil u be chi je rachiʼil can i Jesus (rumal-i n-quiqui xij ti quib; ʼis quilom niʼpa i xqui bij).

¹⁴ N-xui ta la ile, xak i achi chi utzirnak chic, tacʼal chila chiquiwach, rumal-i n-quiqui rik taj wach u laʼic u wach quiqui ʼano.

¹⁵ Xe qui tak bi i ma Pédro i ma Wan chi sak, teʼuri xe oc chu bixquil chiquiwach wach quiqui ʼano.

¹⁶ Xqui bij: —¿Wach caka ʼan chique i achiab-le? Conojel i winak waral pa Jerusalen quetaʼam wach i nim laj ʼanic xqui ʼano; n-ta queʼel wi we cakuwaj u wach.

¹⁷ ¿Wach caka ʼano chi n-ca pax ta rason chiquixol i winak? ʼUtz we que ka xibij; caka bij chique chi miqui lapla chic i Jesus chique i winak. (Queje xqui bij ile chiquiwach.)

¹ Kꞌa kechꞌaꞌt ne ri Pedro y ri Juan kukꞌ ri winaq, echiriꞌ xekꞌun lo raj chakunel re ri Rocho Dios, ri aj wach ke ri e chajinel re ri Rocho Dios y jujun saduceos.

² Rike lik kꞌo koyowal chikij ri Pedro y ri Juan ma kekꞌutun chikiwach ri tikawex puwi rukꞌastajibꞌal lo ri Jesús chikixoꞌl ri ekaminaq, jekꞌuwaꞌ kakibꞌiꞌij: «Rukꞌastajibꞌal ri Jesús e kꞌutubꞌal re, chiqawach apanoq ri tikawex kekꞌastaj lo chikixoꞌl ri ekaminaq» kechaꞌ.

³ Ekꞌu ri e aj wach re ri Rocho Dios xetaqan che kechap bꞌi ri Pedro y ri Juan. Yey ruma kꞌu lik bꞌenaq qꞌij chik, xebꞌeꞌkiyaꞌa pa cárcel chaꞌ kataꞌ kichiꞌ kꞌa chukaꞌm qꞌij.

⁴ Pero chike ri xetaw re ri xubꞌiꞌij ri Pedro, lik e kꞌi ri xkubꞌiꞌ kikꞌuꞌx rukꞌ ri Jesús; yey we kebꞌajilax xew ri achijabꞌ, laj e woꞌobꞌ mil xekojow re Rire.

⁵ Chukaꞌm qꞌij kꞌut xkimol kibꞌ pa ri tinamit Jerusalem raj wach ke raj judiꞌabꞌ kukꞌ ri nimaq winaq re ri tinamit y raj kꞌutunel re ri tzijpixabꞌ.

⁶ Kꞌo chiriꞌ ri Anás ri kajawal raj chakunel pa Rocho Dios; yey e kꞌo ri Caifás, ri Juan, ri Alejandro y jujun chik kꞌo chux chike ri kajawal raj chakunel pa Rocho Dios.

⁷ Xekiya kꞌu ri Pedro y ri Juan chikinikꞌajal y xkitzꞌonoj chike: —¿China xyaꞌw piqꞌabꞌ o china pubꞌiꞌ xiꞌan riꞌix waꞌ? —xecha chike.

⁸ Ekꞌu ri Pedro, rukꞌ ruchuqꞌabꞌ ri Santowilaj Ruxlabꞌixel ri Dios, xubꞌiꞌij chike: —Tape alaq, alaq aj wach re ri tinamit y alaq nimaq winaq re Israel,

⁹ ma e waqꞌij kataꞌ qachiꞌ puwi ri utz xꞌan che wa jun achi yewaꞌ chaꞌ ketaꞌmaxik suꞌanik xkunutajik.

¹⁰ Ekꞌu riꞌ woꞌora kaqaqꞌalajisaj chiwach onoje alaq y chikiwach konoje ri tinamit Israel: Waꞌ waꞌchi kꞌo chiwach alaq xkunutaj chupa rubꞌiꞌ ri Qanimajawal Jesucristo re Nazaret, ri xkamisaj alaq chwa cruz yey ri Dios xukꞌastajisaj lo chikixoꞌl ri ekaminaq.

¹¹ »E pachaꞌ ri kubꞌiꞌij Ruchꞌaꞌtem ri Dios: E rabꞌaj kꞌaqital kan kuma raj yakal ja, e abꞌaj waꞌ lik xajawaxik chaꞌ katikiꞌ lo ri ja kachaꞌ. Ralaq e alaq pachaꞌ wa e aj yakal ja yey ri Jesús e ri Abꞌaj.

¹² Xew kꞌu rukꞌ ri Jesús kariqitaj kolobꞌetajik, ma na jinta chi juna bꞌiꞌaj che ruwachulew yaꞌtal lo chike ri tikawex chaꞌ ruma riꞌ kojkolobꞌetajik —xchaꞌ.

¹³ Ekꞌu raj wach re ri tinamit xkilo ri Pedro y ri Juan na kakixiꞌij ta kꞌana kibꞌ ketzijon puwi ri Utzilaj Tzij, tobꞌ waꞌ waꞌchijabꞌ na e ta tijotal pachaꞌ rike yey xa ne e kukꞌil rachijabꞌ e aj chak re ri tinamit. Lik xkam kꞌu kanimaꞌ riꞌ chike y xkimaj usukꞌ e janipa taq ri kakiꞌano y ri kimajom ri Pedro y ri Juan, e ruma ri xekꞌojiꞌ rukꞌ ri Jesús, ri kitijonel.

¹⁴ Yey na utz tane kꞌu riꞌ kakibꞌiꞌij na kunutajinaq ta ri sik, ma waꞌ waꞌchi takꞌal chiriꞌ chikiwach kukꞌ ri Pedro y ri Juan.

¹⁵ Ekꞌu ri xkiꞌano e xetaqan che chaꞌ ri Pedro y ri Juan kebꞌel bꞌi joqꞌotaj pa ri luwar re ri qꞌatbꞌal tzij, y xew kꞌu xekanaj raj qꞌatal tzij chaꞌ kechꞌaꞌt chikiwach.

¹⁶ Jekꞌuwaꞌ xkibꞌiꞌij chikiwach: «¿Saꞌ ri kaqaꞌan chike waꞌchijabꞌ? Ma ri kꞌutubꞌal re kunanik ꞌanatal kuma rike, lik qꞌalajininaq chikiwach konoje ri ejeqel Jerusalem yey lik na utz taj kaqewaj.

¹⁷ Ri qaꞌanaꞌ e qaxibꞌij kipa chaꞌ na ketzijon ta chi kꞌana chwach junoq chupa rubꞌiꞌ wa jun achi, y jelaꞌ na keꞌek ta chi utzijoxik waꞌ» xechaꞌ.

¹ Cꞌa quechꞌaꞌt ne ri Pedro y ri Juan cucꞌ ri winak, echiriꞌ xecꞌun lo raj chacunel re ri Rocho Dios, ri aj wach que ri e chajinel re ri Rocho Dios y jujun saduceos.

² Rique lic cꞌo coyowal chiquij ri Pedro y ri Juan ma quecꞌutun chiquiwach ri ticawex puwi rucꞌastajibal lo ri Jesús chiquixoꞌl ri ecaminak, jecꞌuwaꞌ caquibiꞌij: «Rucꞌastajibal ri Jesús e cꞌutubal re, chikawach apanok ri ticawex quecꞌastaj lo chiquixoꞌl ri ecaminak» quechaꞌ.

³ Ecꞌu ri e aj wach re ri Rocho Dios xetakan che quechap bi ri Pedro y ri Juan. Yey ruma cꞌu lic benak kꞌij chic, xebeꞌquiyaꞌa pa cárcel chaꞌ cataꞌ quichiꞌ cꞌa chucaꞌm kꞌij.

⁴ Pero chique ri xetaw re ri xubiꞌij ri Pedro, lic e qꞌui ri xcubiꞌ quicꞌuꞌx rucꞌ ri Jesús; yey we quebajilax xew ri achijab, laj e woꞌob mil xecojow re Rire.

⁵ Chucaꞌm kꞌij cꞌut xquimol quib pa ri tinamit Jerusalem raj wach que raj judiꞌab cucꞌ ri nimak winak re ri tinamit y raj cꞌutunel re ri tzijpixab.

⁶ Cꞌo chiriꞌ ri Anás ri cajawal raj chacunel pa Rocho Dios; yey e cꞌo ri Caifás, ri Juan, ri Alejandro y jujun chic cꞌo chux chique ri cajawal raj chacunel pa Rocho Dios.

⁷ Xequiya cꞌu ri Pedro y ri Juan chiquinicꞌajal y xquitzꞌonoj chique: —¿China xyaꞌw pikꞌab o china pubiꞌ xiꞌan riꞌix waꞌ? —xecha chique.

⁸ Ecꞌu ri Pedro, rucꞌ ruchukꞌab ri Santowilaj Ruxlabixel ri Dios, xubiꞌij chique: —Tape alak, alak aj wach re ri tinamit y alak nimak winak re Israel,

⁹ ma e wakꞌij cataꞌ kachiꞌ puwi ri utz xꞌan che wa jun achi yewaꞌ chaꞌ quetaꞌmaxic suꞌanic xcunutajic.

¹⁰ Ecꞌu riꞌ woꞌora cakakꞌalajisaj chiwach onoje alak y chiquiwach conoje ri tinamit Israel: Waꞌ waꞌchi cꞌo chiwach alak xcunutaj chupa rubiꞌ ri Kanimajawal Jesucristo re Nazaret, ri xcamisaj alak chwa cruz yey ri Dios xucꞌastajisaj lo chiquixoꞌl ri ecaminak.

¹¹ »E pachaꞌ ri cubiꞌij Ruchꞌaꞌtem ri Dios: E rabaj cꞌakital can cuma raj yacal ja, e abaj waꞌ lic xajawaxic chaꞌ catiquiꞌ lo ri ja cachaꞌ. Ralak e alak pachaꞌ wa e aj yacal ja yey ri Jesús e ri Abaj.

¹² Xew cꞌu rucꞌ ri Jesús carikitaj colobetajic, ma na jinta chi juna biꞌaj che ruwachulew yaꞌtal lo chique ri ticawex chaꞌ ruma riꞌ cojcolobetajic —xchaꞌ.

¹³ Ecꞌu raj wach re ri tinamit xquilo ri Pedro y ri Juan na caquixiꞌij ta cꞌana quib quetzijon puwi ri Utzilaj Tzij, tob waꞌ waꞌchijab na e ta tijotal pachaꞌ rique yey xa ne e cuqꞌuil rachijab e aj chac re ri tinamit. Lic xcam cꞌu canimaꞌ riꞌ chique y xquimaj usucꞌ e janipa tak ri caquiꞌano y ri quimajom ri Pedro y ri Juan, e ruma ri xecꞌojiꞌ rucꞌ ri Jesús, ri quitijonel.

¹⁴ Yey na utz tane cꞌu riꞌ caquibiꞌij na cunutajinak ta ri sic, ma waꞌ waꞌchi tacꞌal chiriꞌ chiquiwach cucꞌ ri Pedro y ri Juan.

¹⁵ Ecꞌu ri xquiꞌano e xetakan che chaꞌ ri Pedro y ri Juan quebel bi jokꞌotaj pa ri luwar re ri kꞌatbal tzij, y xew cꞌu xecanaj raj kꞌatal tzij chaꞌ quechꞌaꞌt chiquiwach.

¹⁶ Jecꞌuwaꞌ xquibiꞌij chiquiwach: «¿Saꞌ ri cakaꞌan chique waꞌchijab? Ma ri cꞌutubal re cunanic ꞌanatal cuma rique, lic kꞌalajininak chiquiwach conoje ri ejekel Jerusalem yey lic na utz taj cakewaj.

¹⁷ Ri kaꞌanaꞌ e kaxibij quipa chaꞌ na quetzijon ta chi cꞌana chwach junok chupa rubiꞌ wa jun achi, y jelaꞌ na queꞌec ta chi utzijoxic waꞌ» xechaꞌ.