Hechos 2:7-42

⁷Cadxelojreni räjpreni: ―¡Bahuilaare! ¿La et beṉ Galileedi renani canii, ä?

⁸¿Xhoxh riejn diajgnu caniireni xtiidxpacnu si'ctis ni rniinu laadxnu, ä?

⁹Najcnu beṉ nacióṉ Partia, beṉ nacióṉ Media, beṉ región Elam, beṉ Mesopotamia, beṉ Judea, beṉ estad Capadocia, beṉ región Ponto, näjza beṉ Asia.

¹⁰Najczanu beṉ distrit Frigia, beṉ estad Panfilia, beṉ nacióṉ Egipto, näjza bejṉ ni siääd stelaad Cirene, te estad neṉ Africa. Loj rebejṉ ni siääd Roma yu' reni najc xpejṉ Israel, yu'za reni bazuxhijb lo Dios sa'csi rililajzreni si'cni rililajz rexpejṉ Israel.

¹¹Yu'za beṉ Creta. Yu'za beṉ nacióṉ Arabia. Guiragajcnu riejn diajgnu caniireni xtiidxpacnu si'ctis ni rniinu laadxnu. Caniireni loonu xcuent recosroduxh ni cayujn Dios.

¹²Bidxeloduxh rebeṉ xhidaalga, dijiejṉ xhi xhigab gunreni. Räjpreni lo sa'reni: ―¿Xhi säloj dee?

¹³Dxejcti guyu' rebejṉ ni baxhiznäjreni, räjpreni: ―Agusojz redee.

¹⁴Dxejcti gusulii Pedr näjza tzubiteeb sa'ni, guredxa'ni guniini lo rebeṉ xhidaalga: ―Guejbtu, rexpejṉ Israel, nani rbäjz distrit Judea näjza guedx Jerusalén. Coḻcuadiajg diidx nani guiniä.

¹⁵Xhet sojzdinu si'cni cayujntu xhigab. Rsilru ṉaj, entis gojl rcagaa.

¹⁶Dxejc scree gunii Joel che guniini xtidx Dios agujc xchero.

¹⁷Räjp Dios: Sidzujṉ dxej che guxhaḻä Xsprit Dxanä cuääzni neṉ lastoo guiraa rebejṉ. Rexingaantu näjza rexindxa'ptu sinii xtidxä xcuent recos ni gajd gac. Rexi'ntu sinixcaḻ, rextadgoldootu suluiloj bacaḻ recos nani guluiä lojreni.

¹⁸Guxhaḻä Xsprit Dxanä loj guiraa reni siädnajl narä. Siniireni rediidx ni gudedä lojreni xcuent recos nani gajd gac.

¹⁹Suluiä lojtu balti senro xhaguibaa näjza lo guedxliuj. Resenro ni gac najc rejn con guiboo, luxh guxh sire' si'c te za.

²⁰Sicäjy loj gubijdx, sajc bäii si'c rejn. Sajc guiraa recosre, dxejcru sidzujṉ dxeduxh che jiälsacä narä, Dios.

²¹Dxejc guiraa rebejṉ nani cueedx guiniab gacnäj Diosreni, reni'c siḻiaa lo dojḻ.

²²Räjp Pedr lojreni: ―Rexpejṉ Israel, coḻcuadiajg xtidxä. Dios baluii Jesucrist, beṉ Nazare't, lojtu por recosro, remilagwr, reseen nani bejnni nez lojtu. Lagajc Dios badeed yäḻrnibee loj Jesucrist te bejnni redzunroga. La'tu nancheetu dee.

²³Galooli ananchee Dios xhi guntu loj Jesucrist Xi'nni. Basaanza Dios bateedtu Jesucrist ladzṉaa rebeṉguijdx te bacuaareni Jesucrist lo crujz te bagu'trenini.

²⁴Baspaṉsac Dios Jesucrist, basḻaa Diosni ladzṉaa yäḻgujt, sa'csi di niajcdi nica' yäḻgujtni par tejpas, sa'csi laani rnibee lo yäḻgujt.

²⁵Che gubaṉsac Jesucrist, guzojb diidx ni bacuaa David lo guijtz xcuent Jesucrist. Räjp David lo Dios: Guira dxej ruhuiä lojlu, Dios. Suga'lu xladbeä cayacnäjlu narä te di guidxejb lastoä.

²⁶Ni'cni bibalajz lastoä, guniäza lojlu lacti rbaa lazä. Rbalazä sa'csi suhuiilu narä che guetä.

²⁷Dizalu gusaan jia'n xaimä neṉ baa. Dizalu gusaan gudx tiejxh xi'nlu nani sanälajzlu.

²⁸Abaluiilu loä xho guibaṉä par tejpas. Sibalazduxhä sa'csi guibaṉnää́ luj, si'c räjp David xcuent Jesucrist.

²⁹Räjp Pedr: ―Guyasi guiniä lojtu agujc xchero gujt David. Aguyutzu'tzni neṉ baa. Sajc guihuiinu baa cadro biga'tz David.

³⁰Gunii David xtidx Dios. Che nabajṉli David bia'n diidx gudeed Dios te xajgni ni guirilaj Crist, luxh laani gacni ṟeii si'cni gujc David.

³¹Sa'csi baluixgaa Dios recosre lo David, ni'c räjp David sibaṉsac Crist lo rebeṉgut sa'csi di Dios gusaan jia'n xaimni neṉ baa, dizani gusaan gudx tiejxhni.

³²Guläs Dios Jesucrist lo rebeṉgut. Nuure bahuiloonuni, najcnu testiigw gubaṉsacni lo rebeṉgut.

³³Gurejdx Dios Jesucrist. N̲aj nabajṉ Jesucrist xhaguibaa, nabejni xladbee Dios ro'c canibeeni. Badeed Dios Xsprit Dxanni loj Jesucrist si'cni bia'n diidx. N̲aj abaxhaḻ Jesucrist Sprit Dxan lo guedxliuj. Jesucrist cayujn guira'ti nani cahuiitu, nani cayejn diajgtu nadxej.

³⁴Di David nij xhaguibaa, sa'csi lagajc David räjp: Gunii Dios lo Dad nani rnibee loä: “Gurej xladbeä

³⁵che guidzujṉli dxej gudzugä guiraa reni rdxe'ch lojlu te gacbeereni luj rnibeelu guira'ti.”

³⁶’Rniliä́pac lojtu ―räjp Pedr―. La'tu bacuaatu Jesús lo crujz. Ni'cni, coḻgacbee, guiraatu xpeṉ Israel, abejn Dios gac Jesúsre Dad nani rnibee loonu.

³⁷Che biejn diajgreni laareni bacuaareni Jesús lo crujz, guc-huinduxh lajzreni. Räjpreni lo Pedr näjza lo reapost ni suga' ro'c: ―Aiilu, resa'nu, ¿xhini'c jiennu ṉaj?

³⁸Dxejcti räjp Pedr lojreni: ―Coḻgusiech lajztu, coḻguirobnisza, sa'csi ni'c najc te seen rlajztu chanajltu Jesucrist, te si'c jia xtojḻtu. Dxejc suniidx Dios Sprit Dxan cuääz neṉ lastootu.

³⁹Si'c rlajz Dios guniidx Xsprit Dxanni lojtu näjza loj rexi'ntu, näjza lo rebejṉ ni rbäjz zijtru, näjza loj guiragajc rebejṉ nani cueedxni ―si'c gunii Pedr lo rexpejṉ Israel.

⁴⁰Dxejcru gunii Pedr xhidajlru diidx, balijdxni rebejṉ: ―Coḻguirii loj rebeṉ latsiaj ni re' lo guedxliuj ṉaj, te ḻaatu lo dojḻ.

⁴¹Xhidajlreni huililajz rediidxga. Dxejcti gurobnisreni sa'csi huililajzreni xtidx Dios. Lagajc dxejga huililajz si'cti choṉ miḻ bejṉ.

⁴²Sanuutis rusoobreni diidx ni baluii reapost, bibalazduxhreni sa'csi bidxaag sa'reni con rexpejṉ Jesucrist, gudaunäj sa'reni si'c gudaunäj Jesucrist rexpejṉpacni, bidojpreni tejsi lajt te guniireni lo Dios.