7 Nɛ bi hyonya thoho nɛ him bi bądi 'bɛ'a nam bøni, nɛ bin 'yɛ̨mb zɛhɛ ʉ: ―Hague án zä bin ja bʉ, bin 'yɛmp'ʉ. Ha hinga gue'ʉ yʉ mɛngu bʉ Galilea gätho i yą ua ya.
8 Hanja sä i sijʉ ma ndesɛhʉ n'da ngu n'dajʉ.
9 Nɛ nujʉ n'da'a n'danni bá nɛxhʉ, nɛ 'dajʉ, 'bʉ'i 'da bá nɛxpʉ Partia, nɛpʉ Media, nɛpʉ Elam, nɛpʉ Mesopotamia, nɛpʉ Judea, nɛpʉ Capadocia, nɛpʉ Ponto, nɛpʉ ra häi Asia.
10 Nɛpʉ Frigia, nɛpʉ Panfilia, nɛpʉ ra häi Egipto, nɛpʉ ra häi Africa jom bʉ Cirene. Nɛ nu'ʉ mi'da yʉ romanos ʉ, madague'bʉ gätho yʉ judío ʉ, nɛ nu mi'da ʉ gue ɛ̨c'yɛi tengugahʉ dyʉ judíohʉ, nɛ 'bʉh mi'da bá nɛxpʉ Creta, nɛpʉ Arabia.
11 Nɛ dí øhmbʉ i mam ma ndehʉ nangue yʉ́n t'øt'e gue i øt' rá ts'ɛdi Oją, bin 'yɛ̨mp'ʉ.
12 Nɛ gätho madi hyonya thoho, nɛ hingui pądi 'bɛ'a da bɛ̨ni. Nɛ n'da ngu n'da bi mansɛ ʉ: ―'Bɛ'a ní mba na in ja ya.
13 Pɛ nu'ʉ mi'da bi ma: ―Įti ʉ.
14 Nɛ nu ra Pedro bʉya 'darpʉ mí 'bähmbʉ ʉ mi 'dɛ'ma'da yʉ́ 'bäihʉ ra Cristo, nɛ nts'ɛdi bin yą, bi 'yɛ̨na: ―N'yohʉ ahʉ dyʉ judíohʉ nɛ gätho ahʉ guí 'bʉhmbʉ ua Jerusalén, dami 'yøhmbʉ xʉn ho 'bɛ'a ga xi ahʉ ya.
15 Nuje hin dí įtihe tengu guím bɛ̨mhbʉ, nguetho ja gʉto ya.
16 Pɛ nuna guehna gue bin ja ya, gue'a bi man ra Joel rá pøngahyą Oją, bi 'yɛ̨na:
17 Din ja bʉ n'da ra pa ba ɛ̨hɛ, ɛ̨n Oją, gue ga pɛn'nahʉ ma Hogandąhi gätho nangu yʉ ją'i 'bʉcua ja ra ximhäi. Nɛ nu'ʉ ni ts'ʉnt'ʉhʉ nɛ ni t'įxuhʉ dim pøngahyą. Nɛ ni ts'ʉnt'ʉhʉ da nu'ʉ yʉn t'uti tengu yʉ t'į nɛ ni dąc'yɛihʉ da 'uį yʉ t'į.
18 Nu'bʉ bin ja, nu'ʉ ma 'yɛ̨hɛ, yʉn 'yohʉ nɛ yʉ xisu, ga pɛnpä ma Hogandąhi ʉ, nɛ dim pøngahyą nanguecä.
