HECHOS 2:5-36 in Huastec

⁵ Tam ti nixe’ xa q’uicha c’uajat ti Jerusalén i Israelchic ax in lej aynal an ts’ejcath cau binath c’al a Moisés. Che’necchic taja’ ma tim puhuel an tsabal.

⁶ Ani tamcun jaja’chic jaye tam tin ats’a’ nixe’ xi cahuithtalab tal ti eb. Uc’pinchabchic in tsalap cum in ats’alchic caunanchab in cuete’ cahuintal c’al axi yab pel in at juntal.

⁷ Jilc’on lej jic’paxchic. In ulu jun c’al axi jun: ―Patal jaja’chic ax u caunanchix pel i Galileajib ani yab i at juntal.

⁸ ¿Jant’ini’ in ejtohualchic tucu caunanchi i cahuintal huahua’ ax i caunamal ma ti tsacamtal?

⁹ Hua’ats jita’chic teje’ che’nec ma ti Partia, ani ma ti Media, ani ma ti Elam, ani ma ti Mesopotamia, ani ma ti Judea, ani ma ti Capadocia, ani ma ti Ponto, ani ma ti Asia.

¹⁰ Hua’ats jaye axi che’necchic ma ti Frigia, ani ma ti Panfilia, ani ma ti Egipto, ani ma ti Africa jum poq’ue’ ti Cirene. Jaye hua’ats axi che’necchic ma ti Roma ax in cua’alits in q’uima’ teje’ ti Jerusalén. Talchic xe’ jaja’ ax in t’ajtal ey pel i Israel ani talchic axi huenc’onenequits ti Israel quin ayna’ an ts’ejcath cau binath c’al a Moisés.

¹¹ Jaye hua’ats teje’ axi che’necchic ma ti Creta ani ma ti Arabia. Patal huahua’ teje’ c’uajat u lej tamculam. I ats’al ti cuete’ cahuintal u t’ilchab in jic’path t’ajbilchic a Dios.

¹² Jat’hua’ tim patal an tamcunel in lej jic’pal ani u uc’pinchab in tsalap. In conoyal: ―¿Jant’o in ey axe’ xi inicchic abal antsana’ u caunanchix c’al i cuete’ cahuintal huahua’?

¹³ Expith talchic ax u tilibnax toc’tsin antse’: ―Cum u uts’alits jaxtam u caunanchix c’al i cuete’ cahuintal.

¹⁴ Taley cubiy a Pedro c’al axi lajuj jun in abathualejil a Jesús tin tamet an tamcunel. In thajat ulu: ―At Israelchic ani c’al patal ax it c’uajil ti Jerusalén, ca lej alhua’ bina’ a xutsun ani ca lej alhua’ exbay jahua’ ne’ets tu ucha’chic.

¹⁵ Yab chubax u uts’al axe’ xi caunanchixchic jant’ini’ tata’ a ulalchic. Yabaye jant’ini’ ta ca uts’alin cum expith pel i beleu hora an thaju.

¹⁶ Lej inic tu caunanchixchic. Xo’ u putnalits jahua’ ti biyal an caulome c’al a Dios Joel in thucha’ jahua’ in ulu a Dios antse’:

¹⁷ Tam c’unelits an q’uij q’uicha ne’ets ca taley, tamna’ nan ne’ets cu abchi an Espíritu Santo patal an inicchic. An cuitolchic ani an ts’ic’ach ne’ets tiquin caunanchi u cahuintal. Ne’ets cu tsu’binchi an c’uitolchic i tsu’bixtalab ejtil tam u huachbil. Ani ne’ets cu tejhua’methanchi jant’o an yejtselchic tam u huayal ani u huachbil.

¹⁸ Tam nihua’aquits a q’uicha ne’ets cu abchi an Espíritu Santo u t’ojnalilchic i inic ani i uxum. Ani jaja’chic ne’ets tiquin caunanchi jahua’ nan cu pitha’ quin cauna’.

¹⁹ Ti eb ne’ets cu t’aja’ i lej jic’path t’ajbilab. Ti tsabal ne’ets cu tejhua’methanchi an inicchic u tsap c’al i pulic tsu’bixtalab. Ne’ets cu tejhua’methanchi c’al i xits’, ani c’al i c’amal, ani c’al i pau.

²⁰ Ne’ets ca yic’utsin a q’uicha. A its’ ne’ets ca huenc’on ejtil i xits’. Antsana’ ne’ets ca t’ajan tam c’unatits ne’ets ca chich an Ajatic. Tam ojni’ al nixe’ xa q’uicha ne’ets quin tejhua’metha’ in lej tsap ani in lej ts’alat.

²¹ Ani patal jitats quim palenchi an Ajatic jats ne’ets ca jaluntha tam. Antsana’ a Joel in thucha’ jahua’ in ulu a Dios.

²² Cahue a Pedro in ulu: At Israelchic, ca lej alhua’ japiy a xutsun ca ats’a’ jahua’ nan ne’ets tu ucha’chic tin cuenta a Jesús Nazaretib. C’al im pulic t’ajbilchic tejhua’ abal tacuthits ani abathits c’al a Dios. A Dios ani a Jesús in mac’uchith t’ajamal ta tametchic i jic’path labith t’ajbilab ti tsu’bixtalab c’al in ey. Tata’chic a lej alhua’ tso’obits abal lej chubax anits.

²³ Aba ani’ antsana’ a tso’obnamalits, bel a bats’uchic a Jesús tam ti a Judas in tsinat bina’ ta c’ubac. A ne’tha’ ani a bina’ tin c’ubac i pojcax inicchic ca q’uet’ath tsemtha ti al an cruz, cum antsana’ q’uejab tsalpanchamejits c’al a Dios ca t’ajchin jant’inits im bijith le’nomtalits a Dios.

²⁴ Aba ani’ tsemtha, a Dios bel in ejtha’. Yab in jila’ ca ohuat co’oyat c’al in tsap an tsemla, cum ni abal jay yab ejtohuat ca lej atan c’al an tsemla.

²⁵ Jaxtam an ts’ale David ti biyal in olna’ i cau tin cuenta abal ne’ets ca ejtha a Jesús. Ejtil max a Jesús ax in taunamal a Dios. In ulu antse’: Dios, u exlal abal ets’ey it c’uajat utat c’al nana’. Jaxtam ni jita’ yab in ejtohual tiquin t’e’pinthanchi u ichich.

²⁶ Jaxtam jum putat culbel u ichich ani c’al u hui’ tu puhuethanchal a bij. Quin tsemets ne’ets quin coyots c’al u ichich thacat, cum tata’ ne’ets tiquin ejtha’ junil.

²⁷ Tata’ Dios, yab ne’ets tiquin ohuat jilchi u ejattal quin co’onchat c’al an tsemla. Cum nana’ pel tin T’ocat Tsacamil yab ne’ets tiquin jilchi ca c’atsey u inictal.

²⁸ Tata’ Dios, tin tejhua’methanchi jant’ini’ quin ets’ey c’uajiy c’al tata’. In jum putat culbel cum ne’ets tu tsu’chi a hual abal ets’ey. Antsana’ a Pedro in olna’ jant’o in ulu a David tin cuenta in ejthachtal a Jesús.

²⁹ Cahue a Pedro in ulu: At juntalabchic, ne’ets tu lejquith ucha’ jun i cau. I biyal juntal David lej chubax tsemets ani joliyat, ani ma xohue’its bel i ejtohual qui tsu’chi in jolimtal.

³⁰ A David pelac i caulome c’al a Dios. In alhua’ exla’ abal c’al ja in xits’al ne’ets ca hua’tsin a Cristo, ani ne’ets ca punuhuat ti Ts’ale ejtil jaja’. Antsana’ a Dios tim bijchith ulumalits ani in cuba’ tim ba’ abal chubax ne’ets ca t’ajan.

³¹ Jaxtam a David in q’uejab exla’ ani in q’uejab olna’ abal ne’ets ca ejtha a Cristo. In ulu abal a Dios yab ne’ets quin jilchi in ejattal ca co’onchat c’al an tsemla ani in inictal yab ne’ets ca c’atsey.

³² Ani chubax a Dios in ejtha’ a Jesús. Patal huahua’ i tsu’umal ejthachits ani i olnal abal anits.

³³ Xo’ punuthits tin huinab c’ubac a Dios jant’ini’ ti puhuethanchithits im bij. Ma tihua’ ti eb a Jesús tu abchamalits an Espíritu Santo jant’ini’ ti bijchith uchan c’al in Tata tucu abchi. Patal jahua’ talel a tsu’umalitschic ani a ats’amalitschic jats pel in t’ojlabil an Espíritu Santo.

³⁴ Aba ani’ yab c’athiy a David ti eb, bel in exla’ abal tihua’ c’uajat ti eb an Ajatic. In olna’ jant’o uchan an Ajatic c’al a Dios antse’: Quit buxcan tu huinab c’ubac.

³⁵ Teje’ quit buxcan ma nan tu pitha’ ta c’ubac a tomolnaxilchic abal ca tala’ ata’.

³⁶ Ja’its nixe’ a Jesús ax a q’uet’ath tsemtha’chic al an cruz. Xo’ patal tata’chic ax it Israel in tomnal ca alhua’ tso’obna’ abal lej chubax a Dios im punumalits ti eb ti lej Ajatic ani ti lej Ts’ale c’al patal an inicchic, in ulu a Pedro.

⁵ Tam ti jachanꞌ i kʼij, taꞌ ti kʼwajat ti kʼwajíltsik Jerusalén i judíotsik xin tʼajál tʼajat xan tin ulal nin belomtaltsik, xi táltsik túkʼi túkʼi tin putálíl an kʼayꞌlá.

⁶ Tam ti achʼatmé jachanꞌ, junkun jechéꞌ an atiklábtsik ani nibalich in choꞌóbtsik xantʼéy kin chalpay abal in achʼáltsik ti káw an belomtsik kʼeꞌetich kʼeꞌetich jelt xan ti jajáꞌtsik u káw.

⁷ Labnéktsik tʼajat ani u útsáxtsik jún ani jún enchéꞌ: ―¿Yabxeꞌ jaꞌich xu kʼwajíltsik Galilea xi jechéꞌ kʼwajat ti tʼilomtsik?

⁸ ¿Jantʼókʼi pé tám ti achʼáltsik ti káw jelt xan ti wawáꞌ u káw asta tu tsʼitsik?

⁹ Pos techéꞌ kʼwajat i atiklábtsik xi tál Partos, xi Medos, xi Elám, xi Mesopotamia, xi Judea, xi Kapadosia, xi Ponto ani xi táltsik ban chabál xi Asia.

¹⁰ Techéꞌ jeye kʼwajat xi táltsik Frijia, xi Panfilia, xi Ejipto ani xi ban chabáltsik xi Afrika xi kʼwajattsik más ów ké Sirene. Techéꞌ jeye kʼwajat i romanotsik xu kʼwajíltsik techéꞌ; taltsik xi jajáꞌtsik u judío ani taltsik yabaꞌ, por in wéwnantsámalichtsik tin belomtal an judíotsik.

¹¹ Techéꞌ jeye kʼwajat i atiklábtsik xi tál Kreta ani xi Arabia. Ani ejtal i achʼáltsik ti káw kʼal wawáꞌ i káwintal, tam ti kʼwajattsik in tʼilál an pakdhaꞌ labidhtaláb xin tʼajám na Dios.

¹² Ejtal labnéktsik tʼajat, yabich in choꞌóbtsik xantʼéy kin chalpay ani u kónóx jajáꞌkʼitsik enchéꞌ: ―¿Jantʼéy in léꞌ kin ulu ejtal jechéꞌ?

¹³ Por taltsik u labídhnax ani in ulaltsik enchéꞌ: ―U itelkʼitsik ti kʼwajat.

¹⁴ Kubey tám na Pedro junax kʼal xi lajujún an abatwáletsik ani in utsaꞌ kawidh enchéꞌ an atiklábtsik: ―At judíotsik xi ulnek techéꞌ Jerusalén ani ejtal xi kʼwajíltsik techéꞌ, ka choꞌóbnaꞌtsik jechéꞌ ani ka achʼaꞌtsik alwaꞌ xantʼéy neꞌech tu utsaꞌ.

¹⁵ Jechéꞌ an atiklábtsik yab u itel jelt xan ta chalpayaltsik, pos xowéy beléju i dhajaw.

¹⁶ Yab u iteltsik, jechéꞌ jaꞌich xowaꞌ xin ulúmal an tʼiltsix Joel, tam tin ulu enchéꞌ ijtsidh kʼal na Dios:

¹⁷ Na Dios in ulu abal enchéꞌ neꞌech ka támun tam u kʼunelich an pakwenib, neꞌech ku abtsi an tu Tʼokat Ejattal ejtalkʼi an atiklábtsik; an chakámlábtsik neꞌech ti tʼiltsix, xi yabéltsik lej pakdhaꞌ, neꞌech kin chuꞌu i xalkʼantsixtaláb ani an yejcheltsik neꞌech kin kóꞌoy i watsib.

¹⁸ Jachanꞌ i kʼij neꞌech ku pidhaꞌ tʼajat tu Tʼokat Ejattal an payꞌlomlábtsik ani an mímlábtsik xi tin tʼójontsal ani neꞌech ti tʼiltsixtsik.

¹⁹ Ban walkʼiꞌ neꞌech ku xalkʼaꞌ xowaꞌkich i labidh exóltsik ani ban chabál neꞌech ku xalkʼaꞌ i exóltsik: i xichʼ, i kʼamal ani i paw xi jelti tokow.

²⁰ Na kʼítsá neꞌech ka jikʼwchin ani na íchʼ neꞌech ka wenkʼon jelti xichʼ, tam yabél in bajúmal an kʼij xowkʼi ti neꞌech ka tsích an Ajátikláb, xi jaꞌich na kʼítsá xi púlek ani labidh.

²¹ Ani ejtal xitaꞌ kin konoy ka loꞌwat kʼal an Ajátikláb, neꞌech ka loꞌey.

²² ʼAt judíotsik, ka achʼaꞌ xantʼéy neꞌech tu utsaꞌtsik: Na Jesús xi Nasaret, jaꞌich jun i inik xi takudh kʼal a Dios ta tamét tatáꞌtsik abal kin tʼajaꞌ i pakdhaꞌ labidhtaláb, i labidh labandhaxtalábtsik ani i exóltsik xin tʼajaꞌ na Dios ba tatáꞌtsik kʼal na Jesúskʼi, jelt xan ta choꞌóbichtsik alwaꞌ.

²³ Por bélkʼi, tam ta pidhantsik an ta Jesús, jelt xan ti na Dios in koꞌolich kʼejle chalpadh, a júnaꞌtsik ti wikʼnél ani a pidhnaꞌ ban atʼax iniktsik abal ka chemdhá pajkʼidh ban peltsidh teꞌ.

²⁴ Por na Dios in ejdhaꞌ ti ít ani in átantsi tin awiltal an chemlá. Pos na Jesús yab neꞌech ka ejtowat ka átá kʼal an chemlá.

²⁵ A Jesús u tʼilnal kʼal an pulek takʼix Dabid tam tin ulu ti wejeꞌ enchéꞌ: Echʼekʼi u chuꞌtal an Okʼóxláb tu tamét; Jajáꞌ kʼwajat tu eját abal yab ku jikʼnaꞌ ni jun xataꞌ.

²⁶ Jaxtám ti kulbé tʼajat nu itsích ani jaxtám tu tʼilaꞌ i tʼilabtsik xi kʼijidh. Ani jaxtám jeye ti neꞌech kin koyóch u aytsím ke Jajáꞌ ti kin ejdhaꞌ ti ít;

²⁷ pos Tatáꞌ, tin Tʼokat Chakámil, yab neꞌech ka jilaꞌ nu ejattal bin takʼixtal an chemlá, nibal neꞌech ka walkaꞌ ka kʼachey nu tʼuꞌúl.

²⁸ Tin óltsámalich an ti bél abal ku elaꞌ an xeꞌchintaláb xi yab in koꞌol in okʼontal ani neꞌech tʼajat ti kin kʼijidhmédhaꞌ tam kin kʼwajách xon ta kʼwajat.

²⁹ ʼAt kidhábtsik, tsubax kʼejle ke ni wejeꞌ pakélil Dabid chemech ani jolyat, pos an jólimtaláb xon ti jolidh, techéꞌ bél kʼwajat kʼal wawáꞌ.

³⁰ Por na Dabid jaꞌich jun i tʼiltsix ani in choꞌób abal usnék tsubax tʼajat kʼal na Dios, ke jún ti éb nin kidhtaltsik jaꞌich neꞌech an ti Kristo xi neꞌech ka buxkan ti takʼix bin tʼokat kʼwajtalábil.

³¹ Jaxtám na Dabid, kom in choꞌóbich xantʼéy usnék kʼal na Dios, in ulu abal an Kristo neꞌech ka ejech ti ít ani in ulu jeye abal nin ejattal yab neꞌech ka jilkʼon bin takʼixtal an chemlá nibal neꞌech ka odhey nin tʼuꞌúl.

³² Pos na Dios in ejdhaꞌ ti ít jechéꞌ na Jesús ani ejtal jechéꞌ i chuꞌúmal ani i ulal abal tsubax lejtal.

³³ Pos Jajáꞌ dhayan kʼal in cháp nin eját kʼubak na Dios an Tátaꞌláb ani pidhan kʼál an ti Tʼokat Ejattaláb xi usnék neꞌech ku abtsin. Ejtal jechéꞌ xowaꞌ a chuꞌúmaltsik ani a achʼámal, tál ban Tʼokat Ejattaláb.

³⁴ Pos na Dabid yab jajáꞌ na kʼadhiy walkʼiꞌ, por jajáꞌ in ulu enchéꞌ: An Okʼóxláb in utsaꞌ enchéꞌ nu Ajátik: “Ki buxkan tu eját,

³⁵ asta tu átantsi an ti atiklábtsik xi ti tomnál.”

³⁶ ʼKa choꞌóbnaꞌtsik alwaꞌ, atiklábtsik xi Israel, ke jechéꞌ na Jesús xi tatáꞌtsik a chemdhaꞌ pajkʼidh ban peltsidh teꞌ, na Dios in kʼwajbaꞌ abal ti Ajátikláb ani ti Kristo.