14 Ihcuac inon Pedro omotelquetz ihuan in oc mahtlactli huan se tetiotlatitlaniluan huan otlahto chicahuac huan oquiniluic: ―Tlacatzitzin den Judea huan in aquin nanmochantihtoque nican Jerusalén, xicmatican tlen quihtosnequi inin huan xicyecaquican in tlen niyau namechiluiya.
15 Tehhuanten ahmo tihuintihque quen namehhuan nanquinehnehuiliyahque, tleca hueloc chicnahue hora tlahca.
16 Tlen panohtica yeh in tlen oquihto in tetlayolchicau Dios itoca Joel queman oquihcuiloc:
17 Ijcon omihto in Dios; yimero ahsis queman tlalpolihuis. Huan niquinyoltlaxili in Notiotonaltzin nochin tlacamen mamocahualo inyolihtec. Huan namopiluan tlahtosque ica notlahtoltzin. In telpochten quiyolnehnehuilisque huan in tetecten motemiquisque.
18 Ipan inon tonali niquinyoltlaxili Notiotonaltzin ic mocahualos inyolihtec inon tlacamen huan sihuamen aquin quichihuasque notequiu, huan tlahtosque ica notlahtoltzin.
19 Tlacpac ipan in neluicactli huan tlatzintla ipan in tlalticpactli nictemacas tlachiuten tlen ic quichihuasque cuenta ayacmo huehcau itonal Totecohtzin.
20 Ipan inon tonali ompayes hueyi tetzahuitl; huan achto de ihcuac ahsis, tlalpa momanas yestli huan xotlas in tletl huan mahcocuis in poctli. Ic inon tlayohuas ica in tonaltzintli huan mopatlas in metztli cahso quen yestli.
21 Huan maquisasque nochten in aquin tetlatlautisque in Totecohtzin. Ijcon oquihcuiloc in Joel.
22 ’Xicaquican tel, tlacamen de Israel, tlen niyau namechiluiya. In Jesús tealtepeu Nazaret, Yehhuatzin se tlacatl oquitlapehpeniloc in Dios. Huan inon nanquiyecmatihque tleca oquimochihuili in hueyi tlaistlacolten huan in tlachiuten mahuestic huan in tlanextilisten ic maquinehnehuilican techicahualis in Dios.
