Hechos 2:12-42

¹²Dutyara tunajatu bape bacuare eje bucha adebataqui ama jadya. Jadya tibudya tuna cabacaduratibarecuare: —¿Eje buchique ri riya jadya juyaque? —jadya ecana jubarecuare.

¹³Umaera bacue ijaribacuare jutidya Jesús queja ecatyati cuanaque. —Nijuqui tibu tuna jadya quisaratiniya, —jadyatu jucuare umae cuana.

¹⁴Pedrotu netitsuracuare ecuita cuana isara ishu. Peadya tunca peadya earacana Jesúsja ecuadisha cuanaque tuna tumebaedya tuhuadya jucuare. Etsuri jebuda tsehue tujatu isaratibunecuare israelita cuana, Jerusalénju aniya cuanaque tuhua jucuare cuanaque jadya: —Tata ecana, nebacacue ique. Nebacacue jida era cuejayaque.

¹⁵Nijuqui ama ecuana, micuanara inime tupuya bucha. Barepatya ama jari taa rique; las nueve pijidya taa rique. Ecuana israelita cuanaja tuque ecuanaja uva nacaca sasadaque iji baecua apudajudya cuita. Cuejaya micuana era, ecuana eje bucha juatsu jadya quisaratihuaque.

¹⁶Riyaqueri jadya juya, Yusura icueneta cueja acuareque Joel tuja quisarati cuejaqui eque:

¹⁷“Amena ishuque huecaca cuanaju tuque ecue Espíritu cuadishabuque yahuaju. Israelita cuanaja ishu camadya ama, israelita ama cuanaja ishu tumebaedya tuque cuadishabuque. Micuana eque juracanaya cuanaratu ecue quisarati tsapebuque. Ecuita cuanara, epuna cuanara jadyatu quisarati tsapebuque. Tahuijutu ecue Espiritura bahue amerebuque quisarati yunerique ehue ebari cuana, tumebaedya esiri cuanaque.

¹⁸Tumeque huecaca cuanaju tuque ecue Espíritu cuadishabuque ique merequi cuana queja, ecuita cuana queja, tumebaedya epuna cuana queja. Tunaratu cuejabuque ecue quisarati, era ecana jadya quisaratishabuque tibu.

¹⁹Barepaju tsehue tuna ecue dyaque casa aniyaque bamerebuque. Tumebaedya tuque ecue casa bamerebuque yahuaju cuana tsehue. Amitu juribuque. Etiquitu jujubuque. Huani misidaquetu netitsurabuque.

²⁰Ijetitu huecadama jubuque. Baditu ami bucha pudee jubuque. Jadyatu jubuque Ecuana Cuatsashaquique junanucama jariju, emuique, casadaque jadya cabameretima jariju.

²¹Dutya tuaqueja catsahuamereti ishu tuque bacaqui cuanaquetu einajaca jubuque,” jadyatu Yusura quisarati acuare tuja quisarati cuejaqui Joel eque.

²²Pedroratu tuhua jucuare cuanaque quisarati cuejanucacuare: —Micuana Israel eque ejuracana cuanaque, nebacacue era cuejanucayaque. Cuejaya micuana Jesús Nazaret juque eje buchique. Tuque riyaque yahuaju jarira tujatu jetiama acuare ejeque ecuitaja ataquique ama micuanaja yacuaju. Jetiama tujatu acuare micuanara bape bacuare cuanaque. Dutya riya cuanaquetu Yusura amerecuare tura tuque cuadishahuaque yunerinemere ishu.

²³Jadya ama buchatu micuanaradya inamerehua. Micuanaratu ecuita jidama cuana queja curusuju tatamerehua tuque iye ishu. Dutya riya cuanaquetu jadya judadihua Yusura inime pirehua equedya. Tuquetu icuenetadya bahue juhua micuanara jadya adadiyaque.

²⁴Jesús majuhuaju emajuquetu Yusura chacha nityatsuranucahua. Emajuque tujatu nityatsuranucahua, Jesús emaju eje bucha jarasiritaquima tibu.

²⁵Berutu ecuari Davidra huenecuare Jesús jadya ayaque: “Ique bahue Ique Cuatsashaquique dutya huecaca eatsehueque. Jacanime ama tuja ique. Tuque eatsehue tibu, bajida ama juya.

²⁶Jutaquijudya ique dyaque pureama juya. Pureama tsehue tuque ajacaya ama quisarati Yusu jidaque. Arepa ique majuya ama bucha, pana ejenedya tuque aya, dutya eje bucha judadiyaquetu ecue jida ishuque.

²⁷Pana ejenedya tuque aya, Ique Cuatsashaquira ique emajusiri ama huanabuqueque. Tuhuadya jutidya tura riri ishu huanasiribuque ama, ique tujaque, tuque merequique jadya juya tibu.

²⁸Eratu Yusu aya: ‘Mira ique bahue amerehua maju baecua ani ishu. Mira ique dyaque jida pureama amerehua, miatsehue ique anidirubuque tibu, Yusu’”, jadyatu Davidra béru huenecuare.

²⁹“Ecue ata cuana, pana cueja micuana aya Davidra huenecuareque. Tuta taca jadya catiyaque amatu jadya jucuare, ‘Huanasiribuque ama tura ique ecue ecuita riri ishu’ jadya huenetsu. Béru amena mara maratu ecuanaja ebaba David majucuareque. Majuhuajutu tuja ecuita ishatanacuare tumu caniju. Tuhuadya tujatu ecuita riricuare. Riya camatu narutanaya jaridya tuja uhuacuare tuque ishatanacuareque.

³⁰Chacha aniya jari tuputu Yusuja quisarati cueja juhua. ‘Peadya mique eque ejuracanaquetu Mesías jubuque, Ecue Emepeque. Mira israelita cuana naruya bucha, jadya naruedya tujatu ecue cuanaque abuque. Yuneridya mique jadya aya, era jadya adadiyaque’ jadya patu Yusura acuare.

³¹Jadya equetu David icueneta bahue jucuare Yusura Mesías cuadishadadiyaque. Tuquetu bahuedya jucuare Yusura Mesías emajuque nityatsuranucabuqueque. Jadya tibudyatu jucuare: ‘Emajuque caniju eishaquetu jarasiribuque ama, ni tuja ecuita riribuque ama’ jadya.

³²Yusuradyatu Jesús majuhuaque chacha nityatsuranucachine. Ecuanaratu bachine Jesús tuque netitsuranucahuaju. Iyacua micuana ecuanara yuneridya cuejaya tuque chachaque.

³³Yusuratu barepaju dujunucahua tuja yacuaju. Iyacuatu tuque muita ishuju Etataqueja jida eque amaca. Yusu patu jucuare: ‘Jesusratu ecue Espíritu cuadishaya tuaqueja catyatihua cuana queja’ jadya. Riyaque Yusuja Espíritu equedya ecuana iyacua quisaratiya. Micuanara petayaque, bacayaque jadyatu tura jadya amereyaque.

³⁴Davidja ecuita barepaju tsurama jarijudya. Jadya ama buchatu Davidra quisarati anucacuare béru: “Yusuratu Ique Cuatsashaquique jadya cuejacuare: ‘Anibutecue ecue jida eque amaca muita ishu,

³⁵era mique ujeu baqui cuanaque dutya ijahue atillaya tupu, Ique Cuatsashaquique’”. Jesús jadya ayaque tujatu jadya quisarati acuare.

³⁶“Nebacacue jari ique, dutya micuana Israel eque ejuracana cuanara. Jesús, micuanara curusuju tatamerechinequetu Yusura Mesías amerecuare. Tumebaedyatu Ecuana Cuatsashaquique amerehua, —jadyatu Pedrora cuejacuare tuhua jucuare cuanaque.

³⁷Jadya juya bacatsu tuna dyaque peya inime jucuare, jidama juhuaque caadebatitsu. —Ecuanaja ata cuana, ¿eje bucha ecuana jutaqui? —jadya tunajatu bacaduracuare Pedro, Jesúsja ecuadisha cuanaque peya cuana jadya.

³⁸Tume tuna Pedrora quemitsacuare: —Jesús queja catyatitsu necacuareticue inime, Yusuja biji eque ani ishu. Necutsamereticue Jesucristoja ebacaniju. Jadya nejucue Yusura micuanaja jucha cuana apupasha ishu. Turatu cuadishaya tuja Espíritu micuana tsehue anisiri ishu, micuana tsahua ishu.

³⁹Yusuratu tuja Espíritu cuadisha ana ahua micuana queja, micuana eque ejuracana cuana queja, riyaque yahuaju dutya queja aniya cuana queja jadya. Jadya eque tujatu cuadishahua dutya tura tuaqueja ihuaraya cuanaja ishu, —jadya tuna Pedrora acuare.

⁴⁰Nereda bucha cuejae tujatu ecana acuare yana muida tsehue: —Dutya jujeri iyacua aniya cuanaque tuna jidamaque inime cadujutiya. Tuna tuna Yusu queja judirunime ama. Necacuareticue inime tuna nerecaturatadadiya bucha nerecaturatae ejudadiu tibu, —jadya tuna Pedrora acuare.

⁴¹Pedrora cuejayaque bacatsu tuna jetiama inime cacuareticuare. Quimisha mil tuna inime cacuaretitsu Jesús queja catyaticuare. Cutsamereticuare ecana Jesúsja cuanaque jadya cabamereti ishu.

⁴²Jesúsja ecuadisha cuanara bahuityayaque pana baca aatsu tunajatu ejenejacacuare ama. Tunaja aniya cuanaque ecana dutya tupu catyatie jubarecuare. Casitatinicuare ecana Yusu tsehue quisarati ishu. Ecuana Cuatsashaquique adeba ishu araara ishu tuna yuhua cama casitati bahue jucuare.