3 Amqui tjappacha uc̈hum judionacz̈ cuzturumpinaca zumam zizza. Niz̈aza uc̈humpora c̈hjul puntu ch'aasaj, nii ch'aastanacami zizza amqui. Jalla niz̈tiquiztanaqui wejrqui ancha cuntintuc̈ha, am yujcquiz tjurt'izjapaqui. Zuma pasinsistanz̈ nonz̈nalla.
4 ‛Tjapa judionacaqui weriz̈ kamta zizza. Wejt yokquiz ojklaytami niz̈aza Jerusalén wajtquiz ojklaytami jaknuz̈ ocjalquiztanpacha kamiñtaz̈laja, nii zizza tjapa judionacaqui. Ninacz̈tan kamiñtac̈ha.
5 Tjowanstiquiztanpacha fariseo t'akquiz z̈ejlchinc̈ha. Nii fariseo t'akaqui uc̈hum judionacz̈ lii jarupan walja estricto kamñic̈ha yekja judionacz̈ t'akanacquiztan cjenami. Jalla nii az̈ktan zizza nii wejt quintra judionacaqui. Jaziqui ninacakaj declarla, declarz pecc̈haj niiqui.
6 Tuquiqui Yoozqui uc̈hum tuquita ejpnacz̈quiz taku ecchic̈ha, ticziquiztan jacatatz puntu, jalla nii. Jalla nii jacatatzpan tjewznuc̈ha. Jalla nuz̈ weriz̈ tjewztiquiztan, judionacaqui wejt quintra quijchic̈ha.
7 Pero Israel wajtquiziqui wejtnac tuncapan t'akanacaqui Yooziz̈ ecta taku cumplis zakaz tjewz̈a. Jalla niz̈tiquiztan Yoozquin rispitñic̈ha, niz̈aza majiñami weenami niiz̈quin sirwic̈ha. Wejt chawc jiliri, jalla niipan tjewzñiz̈ cjen judionacaqui wejt quintra tjojktichic̈ha.
8 Anc̈hucmi zakaz criic̈hani, Yoozqui ticziquiztan z̈oñinaca jacatatzquic̈ha, nii.
9 ‛Tuquiqui wejrqui pinsiñtac̈ha, nii Nazaret wajtchiz Jesusiz̈quin criichi z̈oñinacz̈ quintra c̈hjul anawalinacami paaz waquizic̈ha.
10 Jalla nuz̈ wejrqui criichinacz̈ quintra anawalinaca paachinc̈ha Jerusalén wajtquin. Uc̈hum timplu jilirinacz̈ mantita jaru walja criichinaca carsilquiz chawjcskatchinc̈ha. Niz̈aza criichinaca conajo, wejr zakal taku utchinc̈ha.
11 Niz̈aza kjaz̈ wilta criichi z̈oñinaca sufriskatchinc̈ha, Jesucristuz̈ quintra chiikatzjapa, niz̈aza Jesucristuz̈quiztan quejpskatzjapa. Wejrqui niz̈tapacha paachinc̈ha judionacz̈ ajcz kjuyquizimi. Niz̈aza walja z̈awjwiñtac̈ha nii criichinacz̈ kjutñi. Jalla nuz̈ z̈awjz̈cu wejrqui criichinaca tani ojklayiñtac̈ha yekja watjaranami.
12 ‛Jalla niijapa Damasco watja ojkchinc̈ha, timplu chawc jilirinacz̈ mantita jaru. Niz̈aza ninacaqui wejtquiz carta credencial tjaachic̈ha, nii criichi z̈oñinaca tanzjapa.
13 Jiczquiz okan, taypur ora tiripintit arajpachquiztan tsjii wali pajk ispijuz̈takaz kjanz̈quichic̈ha, tjuñ siiquiztan juc'anti. Wejt muytatami wejt cumpant'iñi z̈oñinacz̈ muytatami kjanchic̈ha.
14 Niiz̈ cjen, wejrnacqui yokquiz tsucaña tjojtsinc̈ha. Nekztanaqui wejrqui tsjii jora nonzinc̈ha. Hebreo tawkquiztan wejtquiz paljayz̈quichic̈ha, tuz̈ cjican: “Saulo, Saulo, ¿kjaz̈tiquiztan am wejt quintramjo? Ampacha persun quintra paac̈ha. Tsjii wacaqui ar parz̈ quintra llawkz̈cu, persun janchiz̈ quintra paac̈ha, jalla niz̈ta irata am persun quintra paac̈ha”. Jalla nuz̈ paljayz̈quichic̈ha nii tsewctan chiiñi joraqui.
15 Nekztanaqui wejrqui pewczinc̈ha, tuz̈ cjican: “Wejt Jiliri, ¿ject amya?” Nekztan Yooz Jiliriqui wejtquiz cjichic̈ha: “Wejrtc̈ha Jesusitqui. Amqui wejt quintram paac̈ha. Wejrtc̈ha niitqui.
16 Z̈aaz̈na. Tsijtsna. Amqui wejr sirwaquic̈ha. Niz̈aza tii amiz̈ chertanacami declaraquic̈ha muzpa z̈oñinacz̈quiziqui. Wiruñaqui iyam cheraquic̈ha wejt puntuquiztan. Jalla nekztan tjapa wejt puntuquiztan parlaquic̈ha. Jalla niz̈tajapa am illzinc̈ha. Jalla nuz̈ cjen amquiz pariscuc̈ha.
