Hechos 26:3-16 in Achi

³ Quin quicotic, man yet lic awetaʼam ronojel i ka costúmbre yoj, oj aj Israel winak; xak awetaʼam tak i cʼutunic chi caka chap kib puwi. Rumal-i, quin tzʼonoj utzil chomal chawe, chin a ta ruʼ u nimal a cʼux.

⁴ Conojel i aj Israel winak quetaʼam, wach ʼax in ʼanom wi lok chiquiwach, cʼa are in ala. Quetaʼam wach in cʼaslemal che i jyub pa in alaxnak wi, xak wach in ʼanom pa Jerusalen.

⁵ Xak quetaʼam chi yin, cʼa in ala, xin ya li in wach cuʼ i aj Fariséo. We cacaj, chiqui bij ile chi katzij. Quetaʼam chi i je aj Fariséo lic quiqui coj u ʼij i ujer ʼatbal tzij tzʼibtal can rumal i mam Moises; mi jun chic tzobajil ca ʼanaw mas ile chakawach yoj, oj aj Fariséo.

⁶ Y woʼor quiqui tzʼonoj ʼatbal tzij chwij xa rumal cul in cʼux che, chi Dios cu ʼan na pacha u bim can chique i katit ka mam.

⁷ Niʼpa i je qui muk qui xiquin i cablajuj u cʼojol i mam Israel, xak coyʼem wach u sujum can i Dios; rumal-i quiqui ʼan qui patan che, chi paʼij chi chaʼab. Nim laj winak, rumal wach i quin tijin yin chu bixquil chirij ile chi u sujum i Dios, are i rumal-i i aj Israel que tijin chu cojic in mac woʼor —xu bij i ma Páblo.

⁸ Teʼuri xu bij chique conojel i je ʼo chila: —¿Xataba n-qui coj ti yix chi Dios cu cʼunsaj sak chiquiwach i je camnak? ¿Cʼax bawa u cojic ile? —xu bij.

⁹ Teʼuri xu bij: —Xak yin ujer xin chʼobo chi ca majawic quin ʼan chʼoʼoj chirij i cʼutunic re i Jesus aj Nazaret.

¹⁰ Queje ile xin ʼan pa Jerusalen. I cajʼatzil i sacerdóte xqui ya chwe chi que in chap i creyent y xe in tzʼapij je qʼui pa cárcel. Y are quiqui bij chi que camsaxic, yin xak xin ya in wach che.

¹¹ Qʼuial mul xin ʼan cʼax chique i creyent, ʼanbal re chique chi quiqui bij na chi n-quiqui coj ta chic i Jesus. Queje xin ʼan yin ile pa tak molbalʼib pa Jerusalen. Yin pacha xin chʼujer rumal i woywal chique; y xin terbej chiquij cʼa pa tak tinimit naj.

¹² Rumal-i xin maj bi in be pa tinimit Damásco chi qui tzucuxic i creyent. Wucʼam bi jun wuj yatal bi chwe cumal i cajʼatzil i sacerdóte, cʼutbal-re chi ʼo pinʼab que in chap i creyent.

¹³ Are coj tijin chi be, colo tiqʼuil ʼij, xwil jun nim laj ʼaʼ xtzak li chicaj, pacha u tzunbal i ʼij, xui-ri mas ca walchʼin chuwach ile. Xrepcan chikij chakawach cuʼ i wachiʼil.

¹⁴ Are ʼuri, konojel xoj tzak pulew, y yin xin ta jun chʼawbal. ʼO jun xchʼaw chwe pa ka chʼawbal oj aj Israel winak y xu bij chwe: “A-Sáulo, a-Sáulo, ¿wuchac ca ʼan chʼoʼoj chwij? Che awib yet ca ʼan wi i cʼax, pacha cu ʼan i boyex are cu coj akan, xa che u tzam i puyu cu coj wi. Xa queje ile cat tijin yet chu ʼonquil che awib,” xin utixic.

¹⁵ Teʼuri xin bij, “¿At pachin yet, Nim laj Winak?” xin cha. I Kajwal xu bij, “Yin in Jesus chi cat tijin chi chʼoʼoj chwij.

¹⁶ Xui-ri, chat walijok y chat tacʼalok; in cʼutum wib chawe man quin ʼan chawe at ajchac chwij. Ca lap na chique i winak wach awilom chwe yin woʼor, xak wach quin cʼut na chawe coʼon panok.

³ Lik kꞌu utz uꞌanom, ma rilal lik etaꞌam la puwi taq ronoje ri qakojobꞌal ri oj aj judiꞌabꞌ yey etaꞌam ne la saꞌ taq ri kaqachapalaꞌ qibꞌ riꞌoj puwiꞌ. Ruma kꞌu laꞌ, kantzꞌonoj ko cheꞌla, chinta ko la rukꞌ unimal kꞌuꞌxaj.

⁴ »Konoje raj judiꞌabꞌ ketaꞌam saꞌ ri nubꞌinik nusilabꞌik chwi lo in ala, ma xinkꞌiy chilaꞌ Jerusalem pa ri nutinamit Israel.

⁵ Yey we ne rike kakaj kakiqꞌalajisaj wa ketaꞌam, kakibꞌiꞌij kꞌu riꞌ, qatzij, riꞌin lik ojertan lo riꞌ xex wi in kukꞌil ri fariseos, ri lik qataqem ri kꞌutunik ke raj judiꞌabꞌ puwi ri taqanik re ri Moisés.

⁶ »Yey ekꞌu woꞌora, ruma ri nukubꞌam pan nukꞌuꞌx che ri bꞌiꞌtisinik xuꞌan ri Dios chike ri qatiꞌ-qamam ojertan, xa ruma waꞌ inyaꞌom pa qꞌatbꞌal tzij.

⁷ Waꞌ wa bꞌiꞌtisinik e qoyeꞌem riꞌoj oj kalkꞌoꞌal kan ri kabꞌlajuj ukꞌajol ri qamam Jacob ojertan, chaꞌ e kuꞌana qukꞌ janipa ri bꞌiꞌtisim chiqe. Ekꞌu uwariꞌche na kaqoqꞌotaj ta uloqꞌnimaxik ri Dios chipaqꞌij chichaqꞌabꞌ. Kambꞌiꞌij kꞌu riꞌ cheꞌla, lal rey Agripa: Xa ruma kꞌu ri nukubꞌam pan nukꞌuꞌx riꞌin che waꞌ wa bꞌiꞌtisinik, katzꞌaq nuchiꞌ kuma raj judiꞌabꞌ.

⁸ Kantzꞌonoj kꞌu che onoje ralaq alaq aj judiꞌabꞌ: Chiwach ralaq, ¿na puqꞌabꞌ ta nebꞌa ri Dios kꞌo wi kebꞌukꞌastajisaj lo ri ekaminaq?

⁹ »E ri petinaq loq, e chinuwach riꞌin e lik chirajawaxik chwe ri kanꞌan ukꞌiyal na utz taj chikij ri kikojom rubꞌiꞌ ri Jesús ri aj Nazaret.

¹⁰ Y jenewaꞌ xinꞌan pa ri tinamit Jerusalem. Lik e kꞌi ri xebꞌenuya pa cárcel ruma kikojom rubꞌiꞌ ri Jesús. Waꞌ xyaꞌ ne uwujil panuqꞌabꞌ kuma ri nimaq e aj chakunel pa Rocho Dios. Yey riꞌin xinya ne nuchꞌaꞌtem chikij chaꞌ kekamisaxik.

¹¹ Y pa taq ronoje ri sinagogas ukꞌiyal laj xebꞌenuya pa kꞌax re kanmin kiwach chupa chaꞌ kakikꞌaq bꞌi uqꞌij ri Jesús. Y ruma ri lik xinchꞌuꞌjer chikij rukꞌ woyowal, xebꞌeꞌnutzukuj ne kꞌa pa taq ri tinamit lik naj.

¹² »Ekꞌu in kꞌo wi riꞌ che waꞌ, numajom chi kꞌu bꞌi nubꞌe pa ri tinamit Damasco, wukꞌam uwujil yaꞌtal chwe kuma ri nimaq e aj chakunel pa Rocho Dios kꞌutubꞌal re intaqom bꞌi kuma rike chaꞌ kebꞌenuya pa kꞌax ri kikojom rubꞌiꞌ ri Cristo.

¹³ Kantzijoj kꞌu riꞌ cheꞌla, lal nimalaj taqanel, ri xinkꞌulumaj: Pa tikꞌil qꞌij e riꞌ numajom bꞌi ri nubꞌe, xinwil ruwonibꞌal jun aqꞌ xpe chilaꞌ chikaj. Yey waꞌ más ne kawolqꞌin chwa ruwonibꞌal ri qꞌij; ekꞌu riꞌ waꞌ xusutij wij kukꞌ konoje ri ebꞌenaq wukꞌ.

¹⁴ Xojtzaq kꞌu qonoje riꞌoj pulew, yey xinta jun qulaj kachꞌaꞌt wukꞌ pa ri chꞌaꞌtem hebreo, jewaꞌ kubꞌiꞌij chwe: “Saulo, Saulo, ¿suꞌchak katchꞌoꞌjin chwij? Atukel kaꞌan kꞌax che awibꞌ jelaꞌ pachaꞌ kuꞌan ri bꞌoyex echiriꞌ kuya aqan che ri puya kachꞌik lo che” xchaꞌ.

¹⁵ »Ekꞌu riꞌin ximbꞌiꞌij: “¿China rilal, Wajawal?” xinchaꞌ. »Yey ri Qajawal xubꞌiꞌij: “Riꞌin in Jesús, ri jun katchꞌoꞌjin chirij.

¹⁶ Pero woꞌora chatyaktajoq y chayijbꞌilaꞌ awibꞌ re kaꞌan ri katintaq che, ma e uchak waꞌ xinkꞌut wibꞌ chawach. Kanꞌan kꞌu waj chak chawe y katuꞌana at qꞌalajisay re ri kat-tajin che rilik woꞌora y ri kawil chiqawach apanoq echiriꞌ kankꞌut tanchi wibꞌ chawach.

³ Lic cꞌu utz uꞌanom, ma rilal lic etaꞌam la puwi tak ronoje ri kacojobal ri oj aj judiꞌab yey etaꞌam ne la saꞌ tak ri cakachapalaꞌ kib riꞌoj puwiꞌ. Ruma cꞌu laꞌ, cantzꞌonoj co cheꞌla, chinta co la rucꞌ unimal cꞌuꞌxaj.

⁴ »Conoje raj judiꞌab quetaꞌam saꞌ ri nubinic nusilabic chwi lo in ala, ma xinqꞌuiy chilaꞌ Jerusalem pa ri nutinamit Israel.

⁵ Yey we ne rique cacaj caquikꞌalajisaj wa quetaꞌam, caquibiꞌij cꞌu riꞌ, katzij, riꞌin lic ojertan lo riꞌ xex wi in cuqꞌuil ri fariseos, ri lic katakem ri cꞌutunic que raj judiꞌab puwi ri takanic re ri Moisés.

⁶ »Yey ecꞌu woꞌora, ruma ri nucubam pan nucꞌuꞌx che ri biꞌtisinic xuꞌan ri Dios chique ri katiꞌ-kamam ojertan, xa ruma waꞌ inyaꞌom pa kꞌatbal tzij.

⁷ Waꞌ wa biꞌtisinic e koyeꞌem riꞌoj oj calcꞌoꞌal can ri cablajuj ucꞌajol ri kamam Jacob ojertan, chaꞌ e cuꞌana kucꞌ janipa ri biꞌtisim chike. Ecꞌu uwariꞌche na cakokꞌotaj ta ulokꞌnimaxic ri Dios chipakꞌij chichakꞌab. Cambiꞌij cꞌu riꞌ cheꞌla, lal rey Agripa: Xa ruma cꞌu ri nucubam pan nucꞌuꞌx riꞌin che waꞌ wa biꞌtisinic, catzꞌak nuchiꞌ cuma raj judiꞌab.

⁸ Cantzꞌonoj cꞌu che onoje ralak alak aj judiꞌab: Chiwach ralak, ¿na pukꞌab ta neba ri Dios cꞌo wi quebucꞌastajisaj lo ri ecaminak?

⁹ »E ri petinak lok, e chinuwach riꞌin e lic chirajawaxic chwe ri canꞌan uqꞌuiyal na utz taj chiquij ri quicojom rubiꞌ ri Jesús ri aj Nazaret.

¹⁰ Y jenewaꞌ xinꞌan pa ri tinamit Jerusalem. Lic e qꞌui ri xebenuya pa cárcel ruma quicojom rubiꞌ ri Jesús. Waꞌ xyaꞌ ne uwujil panukꞌab cuma ri nimak e aj chacunel pa Rocho Dios. Yey riꞌin xinya ne nuchꞌaꞌtem chiquij chaꞌ quecamisaxic.

¹¹ Y pa tak ronoje ri sinagogas uqꞌuiyal laj xebenuya pa cꞌax re canmin quiwach chupa chaꞌ caquicꞌak bi ukꞌij ri Jesús. Y ruma ri lic xinchꞌuꞌjer chiquij rucꞌ woyowal, xebeꞌnutzucuj ne cꞌa pa tak ri tinamit lic naj.

¹² »Ecꞌu in cꞌo wi riꞌ che waꞌ, numajom chi cꞌu bi nube pa ri tinamit Damasco, wucꞌam uwujil yaꞌtal chwe cuma ri nimak e aj chacunel pa Rocho Dios cꞌutubal re intakom bi cuma rique chaꞌ quebenuya pa cꞌax ri quicojom rubiꞌ ri Cristo.

¹³ Cantzijoj cꞌu riꞌ cheꞌla, lal nimalaj takanel, ri xincꞌulumaj: Pa tiqꞌuil kꞌij e riꞌ numajom bi ri nube, xinwil ruwonibal jun akꞌ xpe chilaꞌ chicaj. Yey waꞌ más ne cawolkꞌin chwa ruwonibal ri kꞌij; ecꞌu riꞌ waꞌ xusutij wij cucꞌ conoje ri ebenak wucꞌ.

¹⁴ Xojtzak cꞌu konoje riꞌoj pulew, yey xinta jun kulaj cachꞌaꞌt wucꞌ pa ri chꞌaꞌtem hebreo, jewaꞌ cubiꞌij chwe: “Saulo, Saulo, ¿suꞌchac catchꞌoꞌjin chwij? Atuquel caꞌan cꞌax che awib jelaꞌ pachaꞌ cuꞌan ri boyex echiriꞌ cuya akan che ri puya cachꞌic lo che” xchaꞌ.

¹⁵ »Ecꞌu riꞌin ximbiꞌij: “¿China rilal, Wajawal?” xinchaꞌ. »Yey ri Kajawal xubiꞌij: “Riꞌin in Jesús, ri jun catchꞌoꞌjin chirij.

¹⁶ Pero woꞌora chatyactajok y chayijbilaꞌ awib re caꞌan ri catintak che, ma e uchac waꞌ xincꞌut wib chawach. Canꞌan cꞌu waj chac chawe y catuꞌana at kꞌalajisay re ri cat-tajin che rilic woꞌora y ri cawil chikawach apanok echiriꞌ cancꞌut tanchi wib chawach.