7 Leettsa mroo nee yez Tiro mzin nee yez Tolemaida tyatha ngoo nee bark, ne or mzin nee tya mni re nee Paba “diox” lo re zha kuu nyelaaz Jesús, ne mlet nee lo re zha thibka wiz.
8 Lee tedib wiz mroo re nee Paba tya, tsa mzin nee yez Cesarea. Tsa ngwa nee liz Lip kuu ndaa kwent xkiiz Jesucrist, kuu nak thib re gaz zha kuu mli zha par tsow ayud re apóstl, ne mlet nee liz Lip.
9 Zha ree nap thap rtsaap kuu mndyeen, ne re nzaa ree nak profet chaan Diox.
10 Ne leettsa ndaʼa wiz ndo nee tya, tsa mzin Agabo thib profet chaan Diox, zha ree ndyaad yezlyu Judea.
11 Ne or mzin zha lo nee, tsa mzhen zha sinch Paba ne mliib zhay yaa zha ne ni zha, tsa mne zha: ―Lee Mbi Nayon ne, tenzhee liib zha bzhaan sinch ree yez Jerusalén, ne taa zha zha lo re zha kuu nagt zha Israel.
12 Or mbin re nee kon re zha kuu nyelaaz Jesús kuu nzo yeza kona, tsa nzhab nee lo Paba yat Paba Jerusalén.
13 Per lee Paba mkab: ―¿Chebee nzhonn goo ne ntsow goo nabil nyoo leettsoon? Per na yent kwan nda leettsoon, tegal liib zha na o kuth zha na yez Jerusalén, kwent chaan Jesús Zha Nabee lo reʼaa.
14 Per or mne nee mtsowt nee gan gatekweet nee Paba, tsa mlaa nee ndya zha, ne nzhab nee lo zha: ―¡Gake taxal nlaaz Zha Nabee!
15 Or ngwalo mriid wiza mdexkwaa nee tsa ndya nee Jerusalén.
16 Ne noga chop tson re wets zha Cesarea mtsow company nee, ne xid re zha nzo thib zha Chipre kuu le Mnasón, zha kuu ndala nyelaaz Jesús ne liz zha mlet nee.
17 Leettsa mzin nee Jerusalén, kwathoz laz re zha kuu nyelaaz Jesús mkayaa zha nee.
18 Lee tedib wiz ngwatwii re nee Paba lo Santiag ne tya nzi re zha gol kuu nabee lo re zha kuu nyelaaz Jesús.
19 Or ngwalo mni nee “diox” lo re zha, tsa mndelo Paba mndaa kwent thibga thibga re kuu mtsow Diox por Paba lo re zha kuu nagt zha Israel.
20 Or mbin re zha kona, tsa mndelo re zha mbil zha lo Diox. Tsa nzhab re zha lo Paba: ―Wets Paba, wii xid re zha Israel kwaro zha ngwalaaza Jesús ne reta zha mbez ndobloka gon re men diiz lo ley chaan Moisés.
21 Ne mbin re zha leeʼa ngeloo lo re zha Israel kuu nzot Israel, tsa gont raa zha diiz lo ley chaan Moisés, noga mbin zha nzhaba ndechet raa kee zha seny re xgann zha, ne tsowt raa zha re kuu mloo re teyaa.
22 Lee nal, ¿kwan tsowaa nal? Tak reta zha Israel ne leeʼa ndyaad.
