3 Ya loh zezahnee barcu chi laꞌhnu bidiaꞌha nu isla nin laa Chipre nin rii loh ñihsadoꞌ; lahdu rabwehsa biaꞌhan isla chiꞌchi gudiiꞌdxinee barcu laꞌhnu riꞌchi, ya zootiiꞌ nu hasta estadu Siria, ya coma nahpaa basiaꞌhan raꞌ ba carga nin nuꞌa barcu chi pwertu xteenn Tiru.
4 Ya guihdxyi Tiru chi badxiꞌloh nu xpwiinn raꞌ Jesucristu nin nuu raꞌ guihdxyi chi, ya bidxiaꞌhannee nu laꞌh raꞌ ba riꞌchi gahdzi dxyih, ya baluuꞌyi Spíritu Saantu laꞌh raꞌ ba guñiꞌ raꞌ ba loh Pahblu tin ayi chee ba para guihdxyi Jerusalehn.
5 Ya chin bazaaꞌ gahdzi dxyih, chiꞌchi bagazunehza raꞌ ba laꞌhnu ndxiꞌhw gunnaꞌh raꞌ ba cun neezaa lliiꞌn raꞌ ba, ya loh plahyi xteenn rwaaꞌ ñihsadoꞌ chi bazuꞌnllihbi nu tin gudihdxyi-gunaaba nu loh Dxiohs tin gacanee Ñiꞌh laꞌh raꞌ garaa nin naa raꞌ xpwiinn Ñiꞌh.
6 Chiꞌchi bagahpaa Dxiohs lasaaꞌ nu, ya seguihdu bacah nu laꞌn barcu ya laꞌh raꞌ xpwiinn Jesucristu nin biaꞌhan raꞌ riꞌchi gubiaꞌgarii raꞌ ba para rwaaꞌ yihdzii raꞌ ba.
7 Ya chin guluhlla xpiahje nu nin zioꞌpa nu loh ñihsadoꞌ hasta guihdxyi Tiru cun guihdxyi Tolemaida, chiꞌchi biodiaꞌha nu cuun raꞌ xpwiinn Jesucristu nin nuu raꞌ guihdxyi chi, ya bidxiaꞌhannee nu laꞌh raꞌ ba tuhbi dxyih.
8 Ya chin barah gueꞌla zoonee nu Pahblu para guihdxyi Cesarea, ya chin badzihn nu rwaaꞌ yihdzi Felipe tuhbi daada nin guleꞌhelah raꞌ ba Felipe Evangelista, naa za ba tuhbi ndxiꞌhw nin naa loh gahdzi ndxiꞌhw raꞌ nin rahcanee laꞌn guidoꞌ ya bidxiaꞌhan nu rwaaꞌ yihdzii ba.
9 Nuu tahpa lliiꞌn dxaꞌpa Felipe nagahdxi guchinaa raꞌ bi, ya ruluuꞌyi raꞌ bi xchiꞌdxyi Jesucristu.
10 Ya ziahanla dxyih dxuu nu rwaaꞌ yihdzi Felipe chin badzihn tuhbi daada nin zeꞌ nez guihdxyi Judea naa ba tuhbi profeta laa ba naa Agabo,
11 chiꞌchi gucaꞌha Agabu xsindohra Pahblu, tin bachiꞌbi Agabon ñaaꞌ ba cun naa ba, chiꞌchi nah ba: ―Nah Spíritu Saantu Dxiohs: squiiꞌ guchiꞌbi raꞌ bwiinn Israel raꞌ nin nuu guihdxyi Jerusalehn laꞌh ndxiꞌhw nin naa xteenn Ñiꞌh sindohra riiꞌ tin gutiꞌdxi raꞌ ba laꞌhba lahtsi naa raꞌ bwiinnziitu.
12 Chin bihn nu dxyiꞌdxyi raꞌ chi, gunaaba duxa nu loh Pahblu cun neezaa bwiinn raꞌ nin nuu raꞌ riꞌchi tin ayi chee ba guihdxyi Jerusalehn,
13 chiꞌchi nnaa Pahblu loh nu: ―¿Xi naa ruꞌn tu cun rguuꞌlaasa tu stoꞌn? Naꞌh dispwestu nuuꞌhuhn ayi tansola dxiꞌh guchiꞌbi raꞌ ba naꞌh nicla nee gachiꞌhn guihdxyi Jerusalehn pur xcweenta xchiꞌdxyi Xtaada Jesucristu nuꞌh.
14 Ya cun ayiru chyu guiñiꞌ chin bihn nu guñiꞌ Pahblu ziꞌchi mejor bidiꞌtsii nu: ―Mas chaꞌyi chaꞌloh ziga naa xigaaba Dxiohs.
15 Ya chin gudiiꞌdxi dxyih raꞌ chi, biluuꞌchaꞌyi nu xixteenn nu, ya seguihdu bariaꞌh nu guihdxyi Cesarea chi, chiꞌchiyi zoo chiꞌh nu para guihdxyi Jerusalehn.
16 Ya cun nee raꞌ paaldaa xpwiinn Jesucristu nin naa raꞌ bwiinn guihdxyi Cesarea bagasiaꞌhan laꞌhnu guihdxyi Jerusalehn, loh raꞌ ba dxaꞌga tuhbi bwiinn Chipre nin laa Mnasohn, bwiinn chi naa tuhbi xpwiinn zaꞌca Jesucristu desde chieempa rooꞌ ya gwanee raꞌ bwiinn Cesarea chi laꞌhnu rwaaꞌ yihdzi Mnasohn tin biaꞌhan nu rwaaꞌ yihdzii ba.
17 Ya chin badzihn nu guihdxyi Jerusalehn, biahxi duxa raꞌ xpwiinn Jesucristu nin nuu raꞌ riꞌchi.
18 Ya chin barah gueꞌla bionee nu Pahblu tin biodiaꞌha nu xa nuu Jacobo, ya riꞌchi rii raꞌ za bwiinn guhla nin rnabwaꞌ raꞌ laꞌh raꞌ xpwiinn Jesucristu nin rii guihdxyi Jerusalehn.
19 Ya chin guyaꞌloh bagahpaa Dxiohs Pahblu laꞌh raꞌ ba, chiꞌchi bwiiꞌyidxyiꞌdxyi ba xcweenta cada tuhbi dziꞌn nin guhcanee Dxiohs laꞌhba bwiꞌhnn ba lahdxi raꞌ bwiinnziitu.
20 Ya chin guyaꞌloh bihn raꞌ ba garaa raꞌ dxyiꞌdxyi nin guñiꞌ Pahblu, chiꞌchi rahbi raꞌ ba pur chuhla naa Dxiohs nin nuu nabahan dxibaaꞌ, chiꞌchi rahbi raꞌ ba loh Pahblu: ―Yuꞌbiluꞌh, lasaaꞌ nu laꞌluꞌh naann loh raꞌ bwiinn Israel dxaꞌga raꞌ ziahan duxa raꞌ bwiinn nin riachii stoꞌ raꞌñiꞌh xchiꞌdxyi Jesucristu, ya garaa raꞌ ba xclaaꞌdzi raꞌ ba cheezah raꞌ ba cun xlehyi Moisehs.
21 Ya rahbi raꞌ ba yiꞌh ruluuꞌyi luꞌh garaa raꞌ bwiinn Israel nin nuu raꞌ loh guihdxyi xteenn raꞌ bwiinnziitu ruuꞌyidxyiꞌdxyi raꞌ ba ruluuꞌyi luꞌh ayi gucaꞌh raꞌ ba bwaꞌ nin laa circuncisión tihxi lliiꞌn raꞌ ba nee ayiza cheezahnee ru raꞌ ba costumbre raꞌ nuꞌh.
22 ¿Xa niꞌca guidiꞌhnn nuꞌh? Nahpaa dxihnn raꞌ ba laꞌluꞌh nuu riiꞌ.
23 Mas chaꞌyi guunn luꞌh ziga guiñiꞌ nu loh luꞌh: nuu tahpa ndxiꞌhw loh nu riiꞌ nin nahpa guzaꞌloh dxyiꞌydxyi nin biaꞌhannee raꞌ ba Dxiohs.
24 Gwanee raꞌ ba tin gulguiꞌhnn para dxiaa tu nee gudxihlli xgaxtu raꞌ ba tin guigah yihca raꞌ ba; ya garaa raꞌ ba zahcabwaꞌ raꞌ ba cun sehn chi ayi guchii dxiꞌh dxyiꞌdxyi mahla nin rñiꞌ raꞌ ba pur yiꞌh sino que guunn raꞌ ba lligaaba nee yiꞌh ruzoꞌbadxiahga luꞌh xlehyi Moisehs.
25 Ya laꞌhnu bacaꞌhla dxihtsi loh raꞌ bwiinnziitu tin ayi xi lligaaba guunn raꞌ ba pur xcweenta xlehyi Moisehs, nadamas nin ayi nuu guunn raꞌ ba ayi nuu gahw raꞌ ba cohsa raꞌ ziga guhn nin rianee raꞌ bwiinn loh raꞌ bwiinn gulaala, nee cun rihn za ayi gahw raꞌ ba, cun neezaa bweꞌhla guꞌa rihn, nee ayiza chuunee raꞌ ba nin ayi naa cheꞌhla raꞌ ba nomas niꞌchi si bacaꞌh nu loh dxihtsi ayi guunn raꞌ ba.
26 Ya seguihdu zeꞌnee Pahblu ndxiꞌhw raꞌ chi tin guunn raꞌ ba ziga caa loh xlehyi Moisehs, ya chin barah gueꞌla gwaguihtsi raꞌ ba loh bixohza nin rnabwaꞌ laꞌn xquidoꞌ raꞌ bwiinn Israel raꞌ chi xi dxyih chenee tuhbigah raꞌ ba tuhbi maan nin cwachiguhn raꞌ ba loh Dxiohs.
