7 Jato jaskátaanan, ja *tsinkíti xobomeax pikókaini, Ticio Justo janeya jonin xobon kaa iki. Ja iká iki Diossakin shinanni jaa joniribi; jawen xobo iká iki jain tsinkíti xobo patax.
8 Ja tsinkíti xobonkonia joni koshi iká iki Crispo. Ja joninra jawen xobon ikáboyaxonbi Cristo ikonhakana iki. Jatian ja Corintoainoa jonibaonribi ichaxon non Ibon joi ikonhakana iki. Jatianra jato bautizankana iki.
9 Jatian westíora yaméra, namá keska meranxon non Ibon, Pablo neskáakin yoia iki: “Rakéyamawe, jeneyamakin nokon joi jato yoireswe.
10 Eara miibetan iki, tsonbira mia jakonmaakin yoixon ramiati atipanyamake. Nato jemanra icha ea ikonhaabo jakanke”, akin.
11 Jaskáara Pablo westíora baritia wetsa iti pochínikon jain iká iki, jato Diossen joi yoii.
12 Ikaxbi Galión ja Acaya main joni koshi inontianra, judíobaon tsinkíxon Pablo jakonmaakana iki. Jaskáxon jakonmaakin yoinoxon Galiónhiba bokana iki.
13 Jain boxon Galión neskáakin yoikana iki: —Nato joninra akai, jaton akai keskáribiakin Dios rabikanon ixon, jatíbi jato axeakin, ja non esekan jaskáati yoiaimabi —akin.
14 Jaskákanketian moa Pablon jato yoii ikaibi, Galiónmanpari neskáakin jato yoia iki: —Nato jonin jakonmaira aká iketianra en mato axonkeanke.
15 Ikaxbi matora ja maton onanna join paranan, jainoax janebaon paranan, itan ja maton esekan parananbores, ikí iitai. Jaskara joibora maton ebé benxoati yamake. Matonbikaya, mato jaskataibo betan benxoakanwe —akin.
16 Jaskáaxon ja joi benxoati xobonkonia jato pikoa iki.
17 Jatian Sóstenes iká iki ja tsinkíti xobomea jaton koshi. Ja joni jatíxonbi yataanan, joni koshi Galión bebonxonbi rishkionkana iki. Jainxonra abákanon ixon Galiónman jato oinresa iki.
18 Jatian Pablo basichaapari, Corintoainbi iká iki. Jain iitibi moa wetsanko kakin, ja joi akaibo yoitaanan, moa Siriain kaai wapóronin naneta iki. Kaitian Priscila betan Aquilan chibana iki. Kaax Cencreas ikain nokotax, wetsanko kaai tekitamabi, jaskánoxon Dios yoia ikax, ja senenhai Pablo maxtani maxkoroota iki.
19 Jatian boax, Efesoain nokóxon, ja tsinkíti xobonko jikii kakin, Pablon ja Priscila betan Aquila potabaina iki. Jatian moa jikiax, jain tsinkíkana judíobo betan yoyo ika iki.
20 Jatian ja judíobaon yoikana iki, basichaapari jain jato betan iti, ikaxbi Pablo keenyamaa iki.
