34 Jayave peresorɨru iyandarecoa güɨraa jenta pe umɨngaru Pablo jare Silas. Jare jae jare opaete jenta pegua reta uyerovia ete. Echa'ã güɨrovia reta ma Tumpa re.
35 Jare cõe ma yave, mburuvicha reta ombou amocue sundaro reta jei vaerã: —Iyora jocua cuimbae reta.
36 Jare peresorɨru iyandarecoa umɨmbeu cua ñee Pablo pe. Jei chupe: —Mburuvicha reta ombou cheocui poyora vaerã. Jáeramo añave pepuere peẽ jare peo cavi.
37 Ẽrei Pablo jei sundaro reta pe: —Mburuvicha reta orenupaca opaete vae jovaque orereco mbae reve, jare oremɨingueca peresorɨru pe, yepe tẽi ore co jae romano reta. Jare añave uipota oreyoraca vɨari. Ndarau uyapo jucuarãi. Tuyugüeru jae reta etei oreyora vaerã —jei.
38 Jayave sundaro reta yugüɨraa umɨmbeu cua ñee mburuvicha reta pe. Jayave mburuvicha reta uquɨye, uicuaa yave jae reta romano reta co.
39 Jayave yugüeru peresorɨru pe ueca vaerã ñee cavi Pablo jare Silas pe. Jayave güɨnoẽ oca pe, jare umɨñera yugüɨraa vaerã tenta guasu güi.
40 Jayave Pablo jare Silas yugüɨraa peresorɨru güi Lidia jenta pe. Jare uecha upurugüɨrovia vae reta, jare umbɨaracuaa. Jayave yugüɨraa joco güi.
