30 Kate' ba bebeje' ḻégake' ḻo liž yan', gože' ḻégake': —Ḻe'e, benne' ka', ¿biẕ žaḻa' gona' nich yelá'?
31 Ḻégake' belyi'e ḻe': —Bejḻé' che X̱anžo Jesús, Benne' Criston', na' yeló' le', na' ḻezka' yelagak benách ka' nníta'gake' ližo'.
32 Bcháḻjḻengake' ḻe' tẕen ḻen yógo'te benách ka' nníta'gake' liže', kan nak che x̱tiža' X̱anžon'.
33 Ḻa' na'ze, kate' ne nak žel, bennen' žsejwe' liž yan' ḻa' bche'tie' ḻégake', na' bejtibe' ḻégake' gan ẕíagake' we'. Wdé na', ḻa' bezoatie' nis, na' ḻezka' belzóa nis yógo'te benách ka' nníta'gake' liže'.
34 Naž bchi'e ḻégake' liže', na' bi'e da' we'j bdáwgake'. Žebele' tẕen ḻen yógo'te benách ka' nníta'gake' liže' dan' žejḻé'gake' che Dios.
35 Kate' za' ža'ní' ža na', benne' yolawe' ka' bséḻa'gake' ni'a ná'gake', na' belyi'e bennen' žsejwe' liž yan', na' wnnágake': —Bsan benne' ka'.
36 Naž bennen' žsejwe' liž yan' bzenle' Pablo da' ni, na' wnné': —Benne' yolawe' ka' góžgake' neda' wsana' ḻe'e. Na'a, le žoj, na' binlo le yeyéj gan zoale.
