24 Sunkana kizkane, kajchi izmumikane usparuza anza ayukmal sɨpnat kit mittɨ tɨkulta nukninta.
25 Kakwamta panakima Pablokas Silaskas Diosta paikwamtuaiyasmin, Diosta kanta kiztuaiyasmin, mamaz sɨptɨt waruzne mɨara.
26 Suasne masain su ulmu amɨzta. Kajchi yal saktɨ kwisha tɨnta ulmalta. Sun urain wan pɨjta azkulara. Wan cadena kuhtɨttuz sɨpnaruza chɨhtkul kit taizara.
27 Sun kirɨkane, kajchi izmumikane sun kit aizpa izkulta. Kajchi pɨjta chɨhtkulara iztawane, usne paiña mashti pizta, usmin piantana. Maza sɨptɨtmika kajchiras puzkane, paiña mikwane, ussa kajchi izmumikasha, piantashina. Usne wan sɨptɨttuz kajchira waruza chɨhtaraka minta.
28 Pablone ussa kwianta: —Nua kwail kimun. Wan akki puramakpas.
29 Suasne izmumikane impil paikwat kit kajchira ayukta ãĩn ɨt kit napta. Ul kit ishkumtuasmin, Pablo tukinkas Silas tukinkas wakpuj wainta.
30 Usne usparuza tas ukkanat kit mɨmara: —Anpattuz. ¿Chima kinpai, Dios nawa watsat mɨlnapa?
31 Uspane sɨnkailta: —Anpat Jesucristora nijkultane, Diosne nua watsat mɨlnazi. Up kwaltakas watsat mɨlnanazi, kizara.
32 Pablokas Silaskas Anpatpa pit ussakas paiña yalkin uztuzakas kaizpailta.
33 Sun amtain izmumikane usparuza mamaz pɨjtamal mɨlnara, aim kirɨt kitna. Suasne uspane ussakas paiña kwaltakas munnanara.
34 Kwiztane paiña yalta mɨlnat kit kumira kwinara. Uskas paiña kwaltuzkas kwisha wat kulara, Diosta nɨjkulara akwa.
35 Tɨlawain tɨlawara mikwane policíaruza kajchi izmumikasha ɨninnara, paasta chɨhtnanapa.
36 Suasne kajchi izmumikane Pablora ɨt kit kaizta: —Mikwane nawa ɨninziish, umɨza chɨhtnapa. Une puzshinai, puñain ɨilnapa.
37 Pablone policíaruza kaiznara: —Mikwane aumɨza wan iztukin tɨkasa piannara. Au Roma pɨpulukis awa akwa, uspane amɨza sunkana kinchi. Aumɨza kwail kizarachasmin, uspane aumɨza kajchira sɨpparɨt. Mane uspane puintain aumɨza chɨhtashimtu. Sunkana kiasachi. Uspain anpa, aumɨza puzninnapa, kiznara.
38 Policíane mikwaruza sun kainanara. Roma pɨpulukis awara ilta akwa, uspane ishkuat
39 kit Pablorakas Silastakas ɨara, sun kwail kiarɨt kizna. Suasne kajchira aat kit usparuza paikwaara: “Pɨpulukis ɨrain.”
