14 Te ɨɨn ña nání Lidia jeē véji ña ñuu Tiatira, xíco ña sahma ndihí jéē yáhu ga ndeé. Te máá ña níní chíñúhún ña Yaā Dios. Te ni jini sōho ña jnūhun cánacani ná, te máá Jítoho yō Jesús ni sáha ya jeē ní candíje ña jnūhun jnáma ya ña jeē ni cáhān Pablo.
15 Te ni jendute ña nde jiín ñáyuu cáyūcú vehe ña, te ni cahān ndahú ña jíín ná: Núu cácucáhnu ni ni jéē candíje ndije ná máá Jítoho yō, te cuajeē ní coyūcu ní vehe ná, áchí ña. Te ni cana fuerza ña sāña jíjnáhan ná.
16 Te ɨɨn quɨvɨ̄ te cuangoo tucu ná suu lugar nuū jéngoo ñayuu cájicān tahú. Te ni canajnáhan ná jíín ɨɨn sūchi sɨ́hɨ́ jéē ñúhun tachī ini i, te máá un sáha jeē cahán i tācá ndese coo te cúndaā jeē cahán i. Te sūchí un ní cajeen patrón i, návāha nihīn de cuehē xūhun sɨ́quɨ̄ jeē cástūhún i nuū ɨɨn ɨɨn ñayuu ndese coo ichi núú.
17 Te sūchí un ndíquín i sāña jíjnáhan ná cána jee i: Tēe yáha cájejníñu de nuū Yaā Dios, Yaā cujéhnu téyɨ́, te cácastūhún de ndese cācu ní núū cuéchi ní jíjnáhan ní, áchí i.
18 Te cuehē quɨvɨ̄ ni cuu súcuan te nde ni jnaniní ni Pablo. Te ni ndió cóto de nuū i, te ni cahān de jíín táchī ún: Jíín poder maá Jesucristo ndácu ri jniñu nuū rō jeē na quénda ró ini i quihīn rō, achí de. Te hora un ní quenda‑ni cuahān.
19 Yūcuán na te ni cajini patrón i jeē ma níhín gā i xūhún cuu de, te jeē yúcuan ní cajnɨɨ de Pablo jiín Silas cuangoo jíín de nde vehe juzgado nuū cáyūcu tóhō.
20 Te ni cajeni ún de nuū juez, tēe cásándaā jniñu, te ni cacahān: Tēe hebreo cácuu tēe yáha, te cástónda de ñayuu ñuu yō cúvaā i.
21 Te cájequin de ɨnga costumbre jeē ma cúu cuatáhú cuɨtɨ yō, ni ma cúu sáha yó, chi tu jéhe ley nación yō jnūhun, chi ñayuu nación Roma cácuu yó, áchí.
