6 Pero acxni̠ Pablo y Bernabé tacátzi̠lh huata mejor tú tatláhualh tatzá̠lalh y táalh nac Listra xa̠hua nac Derbe xmunicipio Licaonia, xa̠hua nac lactzu̠ ca̠chiqui̠ní̠n hua̠ntu̠ antá lacatzuní̠n xtahuilá̠nalh.
7 Antá xlacán lacaxtum taliakchuhuí̠nalh xtachuhuí̠n Jesús hua̠ntu̠ ma̠sta̠y laktáxtut.
8 Maktum quilhtamacú nac Listra Pablo xliakchuhui̠nama xtachuhuí̠n Jésús y antá culucs xuí cha̠tum chixcú hua̠nti̠ luu chunatuncán xlacachini̠t pi̠ ni̠lay xtla̠huán.
9 Amá chixcú luu cuentaj xtlahuani̠t hua̠ntu̠ xli̠chuhui̠namá̠calh y Pablo úcxilhli pi̠ antá culucs xuí y na̠ úcxilhli pi̠ xkalhi̠y taca̠nájlat xlacata nama̠tla̠nti̠y.