40 Joo cuéntá coo ndó a̱ ju̱ú ndoho ndó ña̱ na̱cachi na̱ profeta sa̱nahá tá na̱cachi na já:
41 Cuni jo̱ho va̱ha ndó, ndóhó na̱ sácu̱ ndaa i̱chi̱ ña̱ cáha̱n Ndióxi̱. Catóntó ndo̱ jáchi̱ cama chá ndihi sa̱ha̱ ndo̱. Jáchi̱ ye̱he̱ cúú Ndióxi̱ ta cája i̱ ña̱ náhnu ndiva̱ha, joo co̱ cándúsa ndó ña̱ cája i̱ va̱tí ndicani java na ña̱ nu̱ ndo̱, na̱cachi Ndióxi̱ sa̱nahá —na̱cachi Pablo xi̱hi̱n ná.
42 Ta tá na̱queta Pablo xi̱hín na̱ xíca xi̱hi̱n dá veñu̱hu na̱ Israel cán já na̱xi̱ca̱ ña̱yivi, na̱ co̱ó na̱quixi chi̱chi Israel ña̱ma̱ni̱ nu̱ dá ña̱ ná ca̱ha̱n da̱ xi̱hi̱n ná sa̱há tu̱hun Ndióxi̱ inga qui̱vi̱ ndíquehe ndée̱ ná.
43 Tá na̱quee ndihi na veñu̱hu cán já cua̱há na̱ Israel xi̱hín cua̱há na̱ tóho̱, na̱ cándúsa ley Moisés ta cája cáhnu na Ndióxi̱ na̱casáhá na̱ ndíco̱ na̱ ja̱ta̱ Pablo xi̱hín ja̱tá Bernabé. Ta Pablo xi̱hi̱n Bernabé jána̱ha̱ da̱ na̱ ña̱ ná candeé cáhnu ini na Ndióxi̱ já ná caja mé á ña̱ma̱ni̱ xi̱hi̱n ná.
44 Ta tá na̱xi̱nu̱ co̱o inga qui̱vi̱ ndíquehe ndée̱ ná já na̱taca tátu̱hun tócó ndihi ña̱yivi ñuu veñu̱hu cán ña̱ taa jo̱ho na tu̱hun Ndióxi̱ cúni̱ na̱.
45 Joo tá na̱xini na̱ na̱quixi chi̱chi Israel cán ña̱ na̱taca cua̱há ndiva̱ha ña̱yivi já na̱casáhá na̱ Israel cáhi̱hvi̱ ini na. Já na̱casáhá na̱ cáha̱n núu na sa̱ha̱ Pablo ta na̱cana̱há na̱ xi̱hi̱n dá.
46 Xi̱hín ña̱ cán na̱ndindeé chága̱ ini Pablo xi̱hín Bernabé já na̱casáhá cáchí da̱ já: —Jihna ñúhú ndítahan nu̱ú nde̱ ca̱xi tu̱hun nde̱ tu̱hun Ndióxi̱ nu̱ mé ndó, na̱ na̱quixi chi̱chi Israel. Joo sánde̱hé nde̱ ña̱ co̱ cúni̱ toho ndó ndiquehe ndó ña̱. Ta cája nde̱ cuéntá ña̱ co̱ó sa̱ha̱ ndó cu̱hu̱n ndó indiví. Sa̱há ña̱ cán quéa̱ va̱ha chága̱ ná cu̱hu̱n nde̱ ca̱ha̱n nde̱ tu̱hun Ndióxi̱ xi̱hín na̱ co̱ó na̱quixi chi̱chi Israel.
