Hechos 12:3-18

³iwa kemi okitak okiwilitakeh n judíojteh, noiwa okitsak n Pedro. Ni otlamochi itech ilwitl de Paskua ijkuak mokua n paj non amo kipia levadura.

⁴Ijkuak Herodes okikitski n Pedro, okitsak telpiloya iwa ompa okintlali nanawi soldadojteh para makimokuitlawijtokah. Herodes okimoliaya kikixtis ixpa n tlakah de non altepetl asta mapano n ilwitl de Paskua.

⁵Ijkó kiné, Pedro otsaktoka telpiloya iwa kuali okimokuitlawijtokah, pero akimeh okineltokayah Cristo Jesús nochipa omotiotsajtsiliayah por ye.

⁶Pedro okochtoka iwa oilpitoka ika ome kadenajteh, iwa tlanajnakastla ome soldadojteh. Noiwa oksikimeh soldadojteh okimokuitlawijtokah kaltempa. Non yúali Herodes okimoli kikixtis n Pedro ijkuak tlanesis, iwa kiteixpantis innawak n tlakah de non altepetl.

⁷Ijkuakó ompa kan otsaktoka n Pedro owalmonexti se iángel n Toteko Dios iwa se tláwili okintlawilnextili. N ángel okolini n Pedro kan ikespa, okijxiti iwa okili: —¡Ximejtiwetsi! Ijkuakó n kadenajteh non ika omailpitoka n Pedro, owetskeh.

⁸Iwa n ángel okili: —Ximotlajkoilpi iwa ximokakti. Ijkuak Pedro yomotlajkotelini iwa yomokakti, n ángel oksepa okili: —Xikmokenti mokapa iwa xiwiki nowa.

⁹Pedro oyá iwan ángel maya amo okimatia kox milák noso amo milák tlan okichiwaya n ángel. Ye okimoliaya chamo san tejtemiktok.

¹⁰Pero achto okimpanawijkeh sikimeh soldadojteh non ompa otlamokuitlawijtokah, otlanki okimpanawijkeh oksikimeh soldadojteh. Ijkuak okalakitoh kan sawa de tépostli non okatka itempa n ojtli iselti owalmotlapo, iwa ijkuak yonejnenkeh ok se ojtli sansikah, n ángel okikajte iselti n Pedro.

¹¹Ijkuakó Pedro okajsikama tlan opanotoka, iwa okijto: —Axa ya nikajsikamati n Toteko Dios, Ye Akin okwaltítlanki iángel, manechpalewiki imak Herodes iwa de nochi tlan judíojteh okinekiah nechtoktiskeh.

¹²Ijkuak kuali yokajsikama milák yokiski de kan otsaktoka, Pedro oyá icha n María, ina n Juan akin noiwa kinotsah Marcos. Ompa okatkah miakeh non omotiotsajtsilijtokah.

¹³Ijkuak Pedro otlakakálatski itech kaltentli non okatka kan patio, se íchpochtli non itoka Rode otlachiato akin otlakakalatoka.

¹⁴Pero ijkuak okitenkak n Pedro, mach otlatlapo iwa satlawel opaki. Yej omotlelo tlaijtik okimilito, Pedro tlakakalatok itech kaltentli.

¹⁵Yejwah okilijkeh: —¡San tikuamimiktik! Iwa maya ye okimiliaya milák Pedro okatka itech kaltentli, yejwah okijtoayah: —Mach ye, san iángel.

¹⁶Pedro omoka tlakakalatok, iwa ijkuak otlatlapojkeh iwa okitakeh, san omotlajtlachialtijkeh.

¹⁷Pero Pedro san okimanotski amo matlajtokah. Iwa otlanki opé kintlapowia kenijki Toteko Dios okikixti de kan otsaktoka. Iwa okinmili: —Nochi tlan onomechili, xikmatiltikah n Jacobo iwa n oksikimeh tokniwah. Ijkuakó okiski iwa oyajki oksika.

¹⁸Ijkuak otláneski, n soldadojteh opé motletleloah iwa mach okimatiah tlan kichiwaskeh porke amo okimatiah kan ik oyá n Pedro.