23 Nokóxon, Diossen jatoki jakonhakin shinannai onanax, ikonbiresi Bernabé raroa iki. Jatíbira jato eseanan yoia iki, ponté shinanyaxon non Ibo chibankin jeneyamakin, jan yoiai keskábo senenhaxonkanon ixon.
24 Bernabé iká iki jakon shinanya joni, Diossen Shinan naikia itan oinxomabi, ikonhaax koshia joni. Jaskara iketianra, icha non Ibo ikonhaa jonibo kaikana iki.
25 Jaskata pekáo, Bernabé Tarsoain kaa iki, Saulo benai.
26 Jatian ja Antioquíainoa meraxon ioa iki. Jain westíora baritia senen joi akaibo betan ixon, icha joni jato esea iki. Ja Antioquíainxonra jaonmea onannaibo peokin janekana iki, Cristianos akin.
27 Ja netebaonribira, Jerusalénhainoax jaweti *profetabo Antioquíain bokana iki.
28 Jatian jato xaranmea Agabo janeya jonin Diossen shinanman onanmaa, jatíbiainoa jonibo jawékiatinin ikanti jato yoia iki. Jaskáakin jan yoiabora ikoni senena iki, ja Claudio icha mai iboaa apo inontian.
29 Jaskara iketian, Antioquíainoa joi akaibaon shinankana iki, judeainoa joi akaibo, westíorabaon jaton atipana senenbo jato jawékinin akinti.
30 Ikonkon jaskáakin akana iki, Bernabé betan Saulo kaaitian koríki bomakana iki, ja judeainoa iká *ancianoboki.
