Echos 11:2-25 in Woun Meu

² Mag bĩi thʉnʉm ee, Pedro Jerusalén barbaimaawai ĩchab ag phöbör ee judionaan Jesús iek ʉ̈kha narr khʉʉnau sĩi amachig baarpi auwi irig magjierram aajem:

³ —¿Woun khan jãgwiata jãg maachjö judionaanjã khab sĩsidʉmta oon mawia warag am dʉ̈i thachpa khöbaadëjĩma? ajierram anʉm. Pua jãkhʉʉn dʉ̈i jãgju khaba sĩejim perá ajierram anʉm, maach jöoinau jãgpiba jaaujeewai.

⁴ Magbaawai Pedroou amag thumaa jaaubaadëjim aajem, warrjã jãga Ẽwandamau irig mag nem oopiwia judionaan khabam khʉʉn eejã ich i jaaumkhĩir i pʉ̈iju ajĩ.

⁵ Mag jaaumamua ich Pedrooucha, —Warrcharan mʉʉn Jope phöbör eeta chirajimgui ajim aajem, Ẽwandamag jëeuwai. Mag Ẽwandamag jëeu chirʉm eeta, dëgölp mʉ khãi athamjö abarm ee, sĩi dĩesjö nem pöm khẽupierr khẽu khõorjʉ̈jʉ̈ʉd simta edjã eemua mʉ chirʉm aig burr urajimgui ajim anʉm.

⁶ Magbaawai ag ee sim khap aag awi mua öbër oowai, ag ee nemchaain khĩirpierr thʉnaajimgui ajim anʉm: mʉg jẽb gayam bʉ̈ jayapam khʉʉn, pabʉ̈ eem chi dachʉphʉm, nemchaain jãau jẽedʉ nʉrrjëe aajem khʉʉn, maimua nem ichpan khĩir pogkhe.

⁷ Mag mua öbër oobaawai mag õor chukhu sĩerr eemuata mʉrʉg mʉ thʉ̈rcha thʉ̈rnaa ag eem nem inag thõonaa khöpi jaaujimgui ajim.

⁸ Magbaawai mua, “Señor, mua chan mʉg chitʉm aig mʉch erraawe nem parhoobam chan bʉ̈ʉrjã mʉch i ee auba chitʉm. Magʉm jãg maach inaam chará mua khöbamgui” a chirajim, “warrgarwejã maach jöoinau khöpiba jaaujerr aawai.”

⁹ Mua mag iekhabaawai deeu mag õor iekjö sĩerrau jũrr mʉrʉg, “Mua nem wajapha wautarr chan oob pua maach inaa sim a chiramgui” ajim ich Ẽwandamau mʉrʉg.

¹⁰ Mag nemchaain pos jojopkham biek thãrjup mʉrʉg oopiwia deeu ʉ̈gthaag edjã ee ëudʉ athamjö abaawai chukkhu aadëjim. Magta Pedroou ichdëu ootarr jaaujim aajem, ich khapeenag.

¹¹ Mag ichdëu nem ootarr jajawagmamua, ’Mag chi dĩes ʉ̈gthaa pabaadëm eeta, Cesarea phöbörmua woun ãb Cornelio anʉmua mʉ awaan mamkhĩir õor thãrjup pʉ̈itarr khʉʉn mʉ chirʉm di jʉr wëtumua mʉ aar barimajierramgui ajim anʉm.

¹² Mag am bardʉtkhabaimam ee, ĩchab Ẽwandam Akharau mʉrʉg bʉ̈ʉrjã magʉm aba am dʉ̈i mapi jaaubaawai chadcha mʉ am dʉ̈i majimgui a jaaumajim aajem ich Pedroou. Mag jajawagmamua, Mag mʉ mam dʉ̈i ĩchab ermanonaan seis aig narr khʉʉnjã mʉ dʉ̈i wëtjimgui ajim anʉm. Mag wëtwia mag woun Cornelio anʉm deg naaimajimgui ajim anʉm.

¹³ Mag maar bardʉtkhabaimaawai mag wounau jũrr mʉrʉg nem ĩgkhabaadëjimgui ajim anʉm, jãga Ẽwandam chog i aig bëewia, õor jʉr aupiwi, Jopeeg pʉ̈ipi jaaujĩ; ajapcharan mʉ jʉraanma.

¹⁴ Magá Ẽwandam chogau ich Cornelioogcha jaaujim aajem, mua maach peerdʉajem iek wajapha jaaubaawai peerdʉwi ĩchab thum i di aiguim khʉʉnjã peerdʉ nʉisiju.

¹⁵ ’Keena, magta chadcha mʉ i aar barwia mua Ẽwandam iek amag jawaagpajimgui ajim anʉm Pedro ich meeunag. Magnaa, Mag mawia amag jaaubaadëm eeta Ẽwandam Akhaar am gaai phẽs aichëjimgui ajim anʉm, na ar maach tagam judionaan chi ʉ̈kha nʉm khʉʉn dʉ̈imua nacha autarr edamjö.

¹⁶ Magbaawaita mua khĩir eyaa aadëjimgui ajim anʉm Pedroou, maach Pör Jesuu mʉchig, “Juan chi pör choomieun chadcha dödamaupai pãar pör choojieb mamʉ, mʉgtarr khur ich Ẽwandam Akhaarchata pãrau pãach gaai phẽs wai nʉisiju” a iekhatarr.

¹⁷ Magua keena, mua oowai mag ich Jesuucha magtarr aawaita mag edjã Cornelio dʉ̈i ãba narr khʉʉnagjã Ẽwandamau ich Akhaar deebajieb ajim anʉm amag, ar maachdëu Jesucristo iek ʉ̈khaawai maachig deetarrrjö. Keena, magtarr aawaita pöd mua Ẽwandam ichaaur aju aai khaba chirajimgui ajim anaabá Pedroou ich khapeenag jaaumamua.

¹⁸ Pedroou mag jaaumam ũrwia, Jerusalenpien chi ʉ̈kha narr khʉʉn sĩi warag khĩuu nʉisiwi, Ẽwandamag jëeuphöo thʉnʉmua, “Ʉ̈uchata jãgbarm Ẽwandam” ajierram aajem. “Magan judionaan khabam khʉʉnaujã amach khaibag thumaa ãsie ewag khĩirjuwia pʉrʉgta chugpaapi jëeu nʉm khʉʉnan ʉ̈u ĩchab ʉ̈gthar öbër wënʉrrajugui” ajierram aajem, mag warag Ẽwandamag jëeumamua.

¹⁹ Mag Esteban thõowia chi Ẽwandam iek ʉ̈kha durrum khʉʉn ẽudee ẽkha nʉm jaar, ãaur khʉʉn Feniciaag dʉr wëtjim aajem; maagwai ãaur khʉʉn, Chipreeg; maimua tagam khʉʉn, Antioquiaag. Mag wëtwi amach wënʉrrʉmpierr jaau wënʉrrajim aajem, jãga Ẽwandamau maach peerdʉ aaujẽ. Mamʉ mag jaau wënʉrrʉm chan parhoobam khʉʉnagjã jaauba, ãba judionaanagpaita jaaujeejim anaabá.

²⁰ Mamʉ mag dʉr wëttarr khʉʉn ee naajim aajem, Chiprepien Sirenepien dʉ̈i. Makhʉʉnaun chad Antioquía phöbör ee amach bardʉtkhaimaawai, parhooba griegonaanagpa maach Pör Jesús igwi thumaa jaauphöbaadëjim aajem, amjã peerdʉju aai nʉm a khap amkhĩir.

²¹ Maach Pör Jesuuta mag ich i jaaumkhĩir ich juapá amag dee sĩerr aawai chi ũr nʉm khʉʉn khapan warr amachdëu chadpii aajerr khĩirjug isegwi jũrr maach Pör Jesús iek jaau nʉmta ʉ̈khajierram aajem.

²² Antioquía phöbör ee mamagkham Jerusalenmua chi ʉ̈kha durrum khʉʉnau ũr athaawai am aar Bernabé pʉ̈ijierram aajem, khap oon mamkhĩir.

²³ Mag mawia chadcha Ẽwandamau mamaam khʉʉnjã ʉ̈u peerdʉ atham oobaimaawai Bernabé onee aadëjim aajem. Maimua warag thumaam khʉʉnag, “Ich jãg thãraucha warag maach Pör Jesús iek ʉ̈kha wënʉrrʉmua i gaaita ubʉ nʉisit” ajim aajem, am wawimamua.

²⁴ Ich Bernabejã woun ajapham ajim aajem. Magua irua ich gaai Ẽwandam Akhaarjã phẽsnaa ĩchab ãba Ẽwandam gaaipaita thãraucha ʉ̈khaajeejim aajem. Mag Ẽwandam Akhaar ich gaai phẽs wai simua jaaumam ũrwi warag khapankham khʉʉnau ʉ̈khawi maach Pör Jesús dënkhamaajeejim anʉm.

²⁵ Maig sĩi awi ich Bernabé jũrr Tarsoog majim aajem, Saulo jʉraan. Mag mawia aig oobaimaa, ich dʉ̈i ëeurrwi Antioquiaag arrjim aajem.

² Mag bĩi t'ʌnʌm hee, Pedro Jerusalén barbaimaawai hĩchab hag p'öbör hee judionaan Jesús hiek hʌ̈k'a narr k'ʌʌnau sĩi hamachig baarpi hauwi hirig magjierram haajem:

³ —¿Woun k'an jãgwiata jãg maachjö judionaanjã k'ab sĩsidʌmta hoon mawia warag ham dʌ̈i t'achpa k'öbaadëjĩma? hajierram hanʌm. Pua jãk'ʌʌn dʌ̈i jãgju k'aba sĩejim perá hajierram hanʌm, maach jöoinau jãgpiba jaaujeewai.

⁴ Magbaawai Pedroou hamag t'umaa jaaubaadëjim haajem, warrjã jãga Hẽwandamau hirig mag nem hoopiwia judionaan k'abam k'ʌʌn heejã hich hi jaaumk'ĩir hi pʌ̈iju hajĩ.

⁵ Mag jaaumamua hich Pedrooucha, —Warrcharan mʌʌn Jope p'öbör heeta chirajimgui hajim haajem, Hẽwandamag jëeuwai. Mag Hẽwandamag jëeu chirʌm heeta, dëgölp mʌ k'ãi hat'amjö habarm hee, sĩi dĩesjö nem pöm k'ẽupierr k'ẽu k'õorjʌ̃jʌ̃ʌd simta hedjã heemua mʌ chirʌm haig burr hurajimgui hajim hanʌm.

⁶ Magbaawai hag hee sim k'ap haag hawi mua höbër hoowai, hag hee nemchaain k'ĩirpierr t'ʌnaajimgui hajim hanʌm: mʌg jẽb gayam bʌ̈ jayapam k'ʌʌn, pabʌ̈ heem chi dachʌp'ʌm, nemchaain jãau jẽedʌ nʌrrjëe haajem k'ʌʌn, maimua nem hichpan k'ĩir pogk'e.

⁷ Mag mua höbër hoobaawai mag hõor chuk'u sĩerr heemuata mʌrʌg mʌ t'ʌ̃rcha t'ʌ̃rnaa hag heem nem hinag t'õonaa k'öpi jaaujimgui hajim.

⁸ Magbaawai mua, “Señor, mua chan mʌg chitʌm haig mʌch herraawe nem parhoobam chan bʌ̃ʌrjã mʌch hi hee hauba chitʌm. Magʌm jãg maach hinaam chará mua k'öbamgui” ha chirajim, “warrgarwejã maach jöoinau k'öpiba jaaujerr haawai.”

⁹ Mua mag hiek'abaawai deeu mag hõor hiekjö sĩerrau jũrr mʌrʌg, “Mua nem wajap'a wautarr chan hoob pua maach hinaa sim ha chiramgui” hajim hich Hẽwandamau mʌrʌg.

¹⁰ Mag nemchaain pos jojopk'am biek t'ãrjup mʌrʌg hoopiwia deeu hʌ̃gt'aag hedjã hee hëudʌ hat'amjö habaawai chukk'u haadëjim. Magta Pedroou hichdëu hootarr jaaujim haajem, hich k'apeenag.

¹¹ Mag hichdëu nem hootarr jajawagmamua, ’Mag chi dĩes hʌ̃gt'aa pabaadëm heeta, Cesarea p'öbörmua woun hãb Cornelio hanʌmua mʌ hawaan mamk'ĩir hõor t'ãrjup pʌ̈itarr k'ʌʌn mʌ chirʌm di jʌr wëtumua mʌ haar barimajierramgui hajim hanʌm.

¹² Mag ham bardʌtk'abaimam hee, hĩchab Hẽwandam Hak'arau mʌrʌg bʌ̃ʌrjã magʌm haba ham dʌ̈i mapi jaaubaawai chadcha mʌ ham dʌ̈i majimgui ha jaaumajim haajem hich Pedroou. Mag jajawagmamua, Mag mʌ mam dʌ̈i hĩchab hermanonaan seis haig narr k'ʌʌnjã mʌ dʌ̈i wëtjimgui hajim hanʌm. Mag wëtwia mag woun Cornelio hanʌm deg naaimajimgui hajim hanʌm.

¹³ Mag maar bardʌtk'abaimaawai mag wounau jũrr mʌrʌg nem hĩgk'abaadëjimgui hajim hanʌm, jãga Hẽwandam chog hi haig bëewia, hõor jʌr haupiwi, Jopeeg pʌ̈ipi jaaujĩ; hajapcharan mʌ jʌraanma.

¹⁴ Magá Hẽwandam chogau hich Cornelioogcha jaaujim haajem, mua maach peerdʌajem hiek wajap'a jaaubaawai peerdʌwi hĩchab t'um hi di haiguim k'ʌʌnjã peerdʌ nʌisiju.

¹⁵ ’Keena, magta chadcha mʌ hi haar barwia mua Hẽwandam hiek hamag jawaagpajimgui hajim hanʌm Pedro hich meeunag. Magnaa, Mag mawia hamag jaaubaadëm heeta Hẽwandam Hak'aar ham gaai p'ẽs haichëjimgui hajim hanʌm, na har maach tagam judionaan chi hʌ̈k'a nʌm k'ʌʌn dʌ̈imua nacha hautarr hedamjö.

¹⁶ Magbaawaita mua k'ĩir heyaa haadëjimgui hajim hanʌm Pedroou, maach Pör Jesuu mʌchig, “Juan chi pör choomieun chadcha dödamaupai pãar pör choojieb mamʌ, mʌgtarr k'ur hich Hẽwandam Hak'aarchata pãrau pãach gaai p'ẽs wai nʌisiju” ha hiek'atarr.

¹⁷ Magua keena, mua hoowai mag hich Jesuucha magtarr haawaita mag hedjã Cornelio dʌ̈i hãba narr k'ʌʌnagjã Hẽwandamau hich Hak'aar deebajieb hajim hanʌm hamag, har maachdëu Jesucristo hiek hʌ̈k'aawai maachig deetarrrjö. Keena, magtarr haawaita pöd mua Hẽwandam hichaaur haju haai k'aba chirajimgui hajim hanaabá Pedroou hich k'apeenag jaaumamua.

¹⁸ Pedroou mag jaaumam hũrwia, Jerusalenpien chi hʌ̈k'a narr k'ʌʌn sĩi warag k'ĩuu nʌisiwi, Hẽwandamag jëeup'öo t'ʌnʌmua, “Hʌ̈uchata jãgbarm Hẽwandam” hajierram haajem. “Magan judionaan k'abam k'ʌʌnaujã hamach k'aibag t'umaa hãsie hewag k'ĩirjuwia pʌrʌgta chugpaapi jëeu nʌm k'ʌʌnan hʌ̈u hĩchab hʌ̃gt'ar höbër wënʌrrajugui” hajierram haajem, mag warag Hẽwandamag jëeumamua.

¹⁹ Mag Esteban t'õowia chi Hẽwandam hiek hʌ̈k'a durrum k'ʌʌn hẽudee hẽk'a nʌm jaar, hãaur k'ʌʌn Feniciaag dʌr wëtjim haajem; maagwai hãaur k'ʌʌn, Chipreeg; maimua tagam k'ʌʌn, Antioquiaag. Mag wëtwi hamach wënʌrrʌmpierr jaau wënʌrrajim haajem, jãga Hẽwandamau maach peerdʌ haaujẽ. Mamʌ mag jaau wënʌrrʌm chan parhoobam k'ʌʌnagjã jaauba, hãba judionaanagpaita jaaujeejim hanaabá.

²⁰ Mamʌ mag dʌr wëttarr k'ʌʌn hee naajim haajem, Chiprepien Sirenepien dʌ̈i. Mak'ʌʌnaun chad Antioquía p'öbör hee hamach bardʌtk'aimaawai, parhooba griegonaanagpa maach Pör Jesús higwi t'umaa jaaup'öbaadëjim haajem, hamjã peerdʌju haai nʌm ha k'ap hamk'ĩir.

²¹ Maach Pör Jesuuta mag hich hi jaaumk'ĩir hich juapá hamag dee sĩerr haawai chi hũr nʌm k'ʌʌn k'apan warr hamachdëu chadpii haajerr k'ĩirjug hisegwi jũrr maach Pör Jesús hiek jaau nʌmta hʌ̈k'ajierram haajem.

²² Antioquía p'öbör hee mamagk'am Jerusalenmua chi hʌ̈k'a durrum k'ʌʌnau hũr hat'aawai ham haar Bernabé pʌ̈ijierram haajem, k'ap hoon mamk'ĩir.

²³ Mag mawia chadcha Hẽwandamau mamaam k'ʌʌnjã hʌ̈u peerdʌ hat'am hoobaimaawai Bernabé honee haadëjim haajem. Maimua warag t'umaam k'ʌʌnag, “Hich jãg t'ãraucha warag maach Pör Jesús hiek hʌ̈k'a wënʌrrʌmua hi gaaita hubʌ nʌisit” hajim haajem, ham wawimamua.

²⁴ Hich Bernabejã woun hajap'am hajim haajem. Magua hirua hich gaai Hẽwandam Hak'aarjã p'ẽsnaa hĩchab hãba Hẽwandam gaaipaita t'ãraucha hʌ̈k'aajeejim haajem. Mag Hẽwandam Hak'aar hich gaai p'ẽs wai simua jaaumam hũrwi warag k'apank'am k'ʌʌnau hʌ̈k'awi maach Pör Jesús dënk'amaajeejim hanʌm.

²⁵ Maig sĩi hawi hich Bernabé jũrr Tarsoog majim haajem, Saulo jʌraan. Mag mawia haig hoobaimaa, hich dʌ̈i hëeurrwi Antioquiaag harrjim haajem.