11 Aquit luu akatiyuj xacuí xaclacapa̠stacma túcu cahuá xuaniputún hua̠ntu̠ xacucxilhni̠t porque ni̠lay xacakata̠ksa acxni̠ tachilh kalhatutu lacchixcuhuí̠n antaní xacmákui, xlacán antá xca̠macamincani̠tanchá nac xaca̠chiquí̠n Cesarea la̠qui̠ naquintaputzay.
12 Y Espíritu Santo quima̠lacpuhuá̠ni̠lh xlacata pi̠ cacca̠tá̠alh a̠ma̠ko̠lh kalhacha̠xán nata̠lán xalac Jope. Acxni̠ antá ccha̠hu ctanú̠hu nac xchic cha̠tum soldado hua̠nti̠ huanicán capitán Cornelio hua̠nchú ti̠ xca̠macamini̠t a̠ma̠ko̠lh lacchixcuhuí̠n naquintaputzay.
13 Acxni̠ aya najatá xaccha̠ni̠táhu xlá quinca̠li̠ta̠kalhchuhui̠nán la̠ta lácu xtasiyunini̠t cha̠tum ángel nac xchic acxni̠ xlá xkalhtahuakanima Dios y chiné huánilh: “Caca̠ma̠lakacha nac xaca̠chiquí̠n Jope makapitzí̠n lacchixcuhuí̠n hua̠nti̠ nataán tahuaniy cha̠tum chixcú hua̠nti̠ huanicán Simón y na̠ li̠ma̠pa̠cuhui̠cán Pedro xlacata pi̠ naminá̠n ca̠ma̠kalhchuhui̠ni̠yá̠n,
14 la̠qui̠ xlá huá nahuaniyá̠n hua̠ntu̠ luu mili̠tlahuatcán la̠qui̠ nalaktaxtuya huix chu xli̠hua̠k hua̠nti̠ mili̠talakapasni.”
15 Pus aquit cajcu xactzucuni̠t ca̠li̠ma̠kalhchuhui̠ní̠y xtachuhuí̠n Jesús acxni̠ milh Espíritu Santo nac xokspu̠ncán na̠chuná cumu la̠ mini̠t acxni̠ huacu pu̠lh milh acxni̠ aquinín makamaklhti̠náhu.
16 Acxnituncán aquit clacapá̠stacli a̠má tachuhuí̠n hua̠ntu̠ quintica̠huanín Quimpu̠chinacán Jesús: “Huixinín catzi̠yá̠tit xlacata pi̠ Juan Bautista caj chúchut xlá liakmunú̠nalh, pero namín quilhtamacú acxni̠ xli̠hua̠k huixinín naca̠liakmunucaná̠tit Espíritu Santo.”
17 Pus luu li̠huana̠ calacapa̠stáctit eé tachuhuí̠n hua̠ntu̠ camá̠n ca̠huaniyá̠n: Cumu para huá Dios quinca̠ma̠xquí̠n xli̠tlihueke Espíritu Santo acxni̠ aquinín ca̠najlaníhu y li̠pa̠huáhu Jesús, y chú xlá na̠chuná ca̠ma̠xqui̠ma a̠ma̠ko̠lh cristianos hua̠nti̠ ni̠ judíos, ¿túcu aquit quinkásat para nacli̠huaniy Dios hua̠ntu̠ xlá tlahuama uú nac ca̠quilhtamacú?
18 Acxni̠ takaxmatko̠lh xtachuhuí̠n Pedro a̠ma̠ko̠lh nata̠lán xalac Jerusalén hua̠nti̠ xtali̠huanini̠t hua̠ntu̠ xlá xtlahuani̠t nac xlaksti̠pa̠ncán hua̠nti̠ ni̠ judíos, niajpara cha̠tum túcu huánilh huata caj tzúculh tapa̠xcatcatzi̠niy Dios, y chiné táhua: —Pus catzi̠yá̠hu chú pi̠ Dios na̠ ca̠ma̠xqui̠ni̠t quilhtamacú a̠ma̠ko̠lh cristianos hua̠nti̠ ni̠ judíos la̠qui̠ natalakpali̠y xali̠xcájnit xlatama̠tcán y chuná tla̠n natakalhi̠y a̠má latáma̠t hua̠ntu̠ ne̠cxni laksputa nac akapú̠n.
19 Ama̠ko̠lh cristianos hua̠nti̠ tatzá̠lalh acxni̠ makní̠calh Esteban lhu̠hua hua̠nti̠ tácha̠lh nac xaca̠chiquí̠n Fenicia, Chipre y Antioquía, y antá tzúculh taliakchuhui̠nán xtachuhuí̠n Jesús nac xlaksti̠pa̠ncán hua̠nti̠ judíos porque ni̠ xli̠hua̠k cristianos xca̠li̠ma̠kalhchuhui̠ni̠cán.
20 Pero makapitzí̠n nata̠lán xalac Chipre y Cirene tachilh nac xaca̠chiquí̠n Antioquía y xlacán tzúculh taliakchuhui̠naniy xtachuhuí̠n Jesús a̠ma̠ko̠lh cristianos hua̠nti̠ ni̠ judíos y lácu xlá ca̠ma̠lacnu̠niy naca̠ma̠akapu̠taxti̠y cati̠huá hua̠nti̠ natali̠pa̠huán.
21 Dios ankalhi̠ná xca̠makta̠yama y xca̠ma̠xqui̠ni̠t xli̠tlihueke porque lhu̠hua cristianos hua̠nti̠ talakmákalh hua̠ntu̠ ni̠tu̠ xli̠macuán xtasmani̠ncán y huá tali̠páhua Quimpu̠chinacán Jesús.
22 Ama̠ko̠lh apóstoles hua̠nti̠ xtahuila̠nanchá nac Jerusalén tacátzi̠lh hua̠ntu̠ xkantaxtuma nac Antioquía y tamáca̠lh Bernabé la̠qui̠ xlá li̠huana̠ naca̠ma̠kalhchuhui̠ni̠y hua̠nti̠ ni̠ judíos.
23 Acxni̠ cha̠lh Bernabé luu la̠n pa̠xúhualh acxni̠ úcxilhli hua̠ntu̠ Dios xtlahuani̠t nac xlatama̠tcán a̠ma̠ko̠lh cristianos xalac Antioquía; entonces xlá ca̠li̠ma̠kalhchuhuí̠ni̠lh xlacata pi̠ ma̠squi lhu̠hua tu̠ ni̠tlá̠n caca̠okspúlalh ni̠ catataxlajuáni̠lh xlacata natali̠pa̠huán Quimpu̠chinacán Jesús.
24 Bernabé luu tla̠n xcatzi̠y y aksti̠tum xli̠pa̠huán Dios, y luu lacatancs xtasiyuy nac xlatáma̠t pi̠ Espíritu Santo xmakta̠yay hua̠ntu̠ xlá xtlahuay, xa̠huachí acxni̠ xlá xca̠ma̠kalhchuhui̠ni̠y cristianos lhu̠hua hua̠nti̠ xca̠ma̠akata̠ksni̠y la̠ta lácu natali̠pa̠huán Quimpu̠chinacán Jesús.
25 Ni̠ li̠maka̠s quilhtamacú Bernabé alh putzay Saulo nac Tarso, acxni̠ chú ma̠nóklhulh huánilh xlacata catá̠alh nac Antioquía.
26 Antá chú talatáma̠lh aktum ca̠ta xtama̠siyumá̠nalh xtachuhuí̠n Cristo nac xlaksti̠pa̠ncán a̠ma̠ko̠lh lhu̠hua cristianos hua̠nti̠ xtali̠pa̠huán. Na̠ antá chú nac eé xaca̠chiquí̠n Antioquía tzucúcalh ca̠li̠ma̠pa̠cuhui̠cán cristianos hua̠nti̠ xtali̠pa̠huán Cristo porque eé tachuhuí̠n huamputún hua̠nti̠ tatapeksi̠niy Cristo.
27 Antacú uú nac Antioquía xtalamá̠nalh Bernabé y Saulo acxni̠ tachilh makapitzí̠n profetas hua̠nti̠ xtamini̠tanchá nac Jerusalén.