7 Leettsa lee mandad chaan Diox kuu mndediz lo Kornel ndya, lee Kornel mrez chop zha kuu nke tsiin lo Kornel, ne thib soldad zha kuu wlipaa nyelaaz Diox, zha kuu ne Kornel tetsow kuu gab Kornel lo.
8 Leettsa ngwalo mndaa Kornel kwent kuu mzhaak Kornel lo re zha, tsa mtaal Kornel re zha yez Jope.
9 Ne tedib wiz, leettsa lee re zha ndetsin gaxa yez Jope, teeka ndrol wiz lee Pey mkendab yek yuu, par tediz Pey lo Diox.
10 Kwathoz mlann Pey ne ngwalaaz Pey gawu Pey, per ora lee men ngetexkwaa kuu wu Pey, ne ora cha ngwani thib kwaa lo Pey,
11 ne mwii Pey mzhaal yibaa, ne mloo lo Pey thib kuu naa taxal thib le lar naro kuu ndob bgo re thapta skin, mlato lo Pey.
12 Ne lo lara nzo relota maa kuu nde kon thap nii, noga re maa kuu ndedoob yu lo yu, ne re maa kuu nlazbi.
13 Tsa mbin Pey thib bos kuu nzhab lo Pey: ―Pey, gwateli, beth maa ne dow maa.
14 Tsa lee Pey mkab ne nzhab: ―Gagte, Zha Nabee; neeka thib welt ter wun maa nambit kuu nzhowt men.
15 Lee bosa mre mni tedib welt, ne nzhab lo Pey: ―Loka kuu mtembiʼa Diox, ndoblot gaba nambite.
16 Ne tson welt ngwani kona lo Pey, tsaraa lee lar mre ngwaap yibaa tedib welt.
17 Ne lee Pey kwathoz mtsow xgab naa kwan nak kuu mloo lo Pey, ne oraaka mzin re zha kuu mtaal Kornel roo liz Simún, tak mnaabdiza zha naa pa nak liz Simún.
18 Ne or mzin re zha, mnaabdiz zha naa chu tya mbet Simún, kuu noga le Pey.
19 Ne lee Pey bee ngetsow xgab naa kwan nak kuu mloo lo Pey, ne lee Mbi Nayon nzhab lo Pey: ―Wii lee tson mbyi ngekwaana.
20 Gwateli, bla ne ngwake dits re zha, ne gagt chop xgaba, tak na mtaal zha.
21 Tsa mla Pey mzin Pey lo re zha kuu mtaal Kornel, tsa nzhab Pey lo re zha: ―Na nak zha kuu nkwaan goo, ¿chebee ndyaad goo?
22 Ne lee re zha mkab, ne nzhab: ―Nee ndyaad kwent chaan soldad Kornel, kuu nabee lo thib gayoo soldad. Lee Kornel nak thib mbyi nali, ne nzhon Kornel diiz lo Diox ne reta zha Israel ndediz wen zha Kornel. Ne thib mandad chaan Diox mni lo Kornel: Kona mtaal Kornel nee ndyaadxii nee lu, tsa yaʼa liz Kornel, ne lee Kornel gon re kuu gaba lo Kornel.
23 Tsa lee Pey nzhab lo re zha: ―Briid goo leen yuu. Ne tya myaan re zha yaala, lee tedib wiz ngwa Pey kon re zha, ne noga thiban re zha kuu nyelaaz Jesús ngwa kon Pey.
24 Ne tedib wiza mzin re zha yez Cesarea, ta nak liz Kornel, ne lee Kornel mkaltaa re zha Liz Kornel ne re amig Kornel ne ngebet Kornel tsin Pey.
25 Or mzin Pey liz Kornel, ora mroo Kornel mkayaa Pey ne mtobxub Kornel lo Pey taxal lo Diox.
26 Per lee Pey mteli Kornel, ne nzhab lo Kornel: ―Gwateli, tak roptalee nak men.
27 Ne ngetediz Pey rop Kornel asta mzin roo pwert yuu, tsa mndaab Pey leen liz Kornel, ne mwii Pey kwaro men mkaltaa tya.
28 Tsa nzhab Pey lo re zha kuu nzi tya: ―Wen ne re goo lee thib zha Israel, ndaat ley chaan nee diiz tsaal nee kon re zha kuu nagt zha Israel, ne neeka ndoblot nee tab nee leen liz zha, per lee Diox mlooʼa lon, ndoblot gapʼn lo neeka thib men lee zha nambit nak, neeka ndoblot tsowʼn xgab went nak zha.
29 Kona ndyalʼn leettsa mrez goo na, ne neeka mtotʼn neeka thib kuu tsa gayaltʼn. Ne lee nal nlazʼn nen naa chebee mrez goo na.
30 Kornel mkab ne nzhab: ―Ndaʼa thap wiz leeka or ree, ndon nzhee lizʼn teeka las tres, ngetsowʼn ayun ne ngetedizʼn lo Diox, ne oraaka ngwani thib mbyi kuu nok thib lar kuu kwathoz nla xni lon.
31 Kuu mne lon: “Kornel, mbina Diox re kuu mnaaba lo Diox, ne ngewii Diox naa xa ntsowa ayud re zha prob.
32 Btaal zha ya yez Jope yaxii Simún, kuu noga le Pey, lee Pey nzo liz Simún kuu nteguuz yid kuu ndob liz gax roo nitdoo, lee Pey ne loʼa naa kwan ndoblo tsowa.”
33 Ta mod mtaalʼn zha ngwaxiiʼa. Ne wen mtsowa ndyaada, ne nalor lee Diox ndewii lee retalee nzi nzhee ne nlaaz nee gon nee reta kuu mnabee Diox loʼa neʼa.
34 Tsa mndelo Pey mni ne nzhab: ―Nalsi nen wlipaa lalka nataak reta men lo Diox.
35 Ne nkayaa Diox re zha kuu wlipaa ntsow kuu nlaaz Diox, tegal zha tedib yez nak zha.
36 Diox mniʼa lo re zha raz Israel, nzhaba Diox lo re zha naa xomod wen kwin re zha kon Diox, kwent chaan Jesús, Zha Nabee lo reʼaa.
37 Goo mbin xomod mndaa zha kwent chaan Jesús desde yezlyu Galilea ne asta dita yezlyu Judea, leettsa mndelo Juan mndaa kwent lo re men, lee re men ndoblo gakleyy.
38 Ne wen ne goo lee Diox mndaa Mbi Nayon ne yalnabee lo Jesús zha Nazaret, ne Jesús ree mndiy mtsow yalwen ne mtegwe re zha kuu nzo mbi fyer leettsoo, ne reta koree ngok mtsow Jesús, tak lee Diox ndo kon Jesús.
39 Ne nee nak cho mwii reta kuu mtsow Jesús dita yezlyu Judea ne yez Jerusalén. Ne or ngwalo mriid koree, tsaraa mbeth zha Jesús ne mkee zha Jesús lo kruz.
40 Per lee Diox mteroban Jesús leettsa ndaʼa tson wiz nguth Jesús, ne mndaa Diox diiz ngwani Jesús lo re nee.
41 Ne ngwanit Jesús lo reta men, sinke beeta lo re nee kuu mteed lo zha ngwani zha, ne nee ngok zha kuu mwii reta kuu mtsow Jesús. Ne re nee ndow ne ngwii kon Jesús, leettsa mroban Jesús xid re zha nguth.
42 Lee Jesús mtaal nee tsa taa nee kwent chaan Jesús lo re men, tak Diox mto Jesús, tsa naab Jesús kwent lo re zha kuu naban ne lo re kuu ngutha, leettsa tsin wiza.
