3 Te dxej, si'cti rcachoṉ gudxej, si'c lo bacaḻ bahuiini loj xangl Dios, räjpni loj Cornel: ―¿Conlu Cornel?
4 Che bahuii Cornel xangl Dios, bidxejbni, bidxelojni, räjpni lojni: ―¿Xhini'c, Dad? Dxejcti räjp angl xten Dios lojni: ―Che rniilu lo Dios, riejn diajg Dios xtiidxlu, che rudeedlu meel lo rebeṉ proob, ruhuii Dios ni rujnlu, ni'cni rnalajz Dios luj.
5 N̲aj baxhaḻ tiop niguii chää guedx Jope te chaxiireni Simón Pedr.
6 Rbäjzni rolijz te dade' ni laa Simón nani ruscoodz guijd. Rolijz Simón sojb gajxh ro' nisdoo. Simón Pedr gusule' xhini'c nanab gunlu.
7 Che sii angl xten Dios, gule Cornel tiop mos xtenni näjza te xsoldaadni nani sanälajz Dios.
8 Dxejc bij Cornel diidx lojreni xcuent ni gusajcni, dxejc baxhaḻni redade'ga guedx Jope.
9 Che bara yääl, sääreni lo nezyuj. Asiäddzuṉgajxhreni guedx Jope, pet si'cti läidxejni. Lagajc oṟga huä'p Pedr yecyu' te guininäjni Guejb Dios.
