10 Jainoaxa, kikinbiresi jawékiakasa iki. Jatian moa yoá axoni ikanaitian, namá keska meran oinna iki.
11 Ja nai chopetaitian oinna iká iki, ani chopa kakaati keská, jawen chosko pabíoribi renéxanan naman apakeai.
12 Ja chopa kakaati keská ikainko iká iki, chosko taeya meskó yoinabo, jainoax meskó ronobo, itan meskó pechia noyai yoinaboribi.
13 Jatianra bochikiax neskati yoyo ikai ninkata iki: “Wenítaanan, retexon piwé Pedro”, iki ikai.
14 Jatian Pedron yoia iki: “Enra ayamai Ibó. Jawetianbira neskara kerás jawékibo en piosma iki”, akin.
15 Jaskákenbi, jakiribi yoiribia iki: “Ja Diossen jakonhaa jawékibo kerasen yoinyamawe”, akin.
16 Moa kimishaakin jaskáa pekáo, ja chopa moa jakiribi nai bochiki karíbaa iki.
17 Jaskáakin akára, jaakinres shinankin Pedron onankashoraa iki, jawekeska jawéki ea yoiimein ja namá keska meran iwanke ixon. Iitainbi Cornelion raana jonibo, jain iká xobo xepotiain nokótoshikana iki, ja Simón janeya jonin xobo yokábeax.
18 Jain nokóxon, koshinshaman kenátaanan manokana iki, ja xobonmarin Simón Pedro iká ixon.
19 Jatian Pedro, ja namá keska meran oinwanxon, shinanni iitaitian, Diossen Shinanman yoia iki: “Oinwe, kimisha joninra mia benai.
20 Kamentanwe, naman ipakexon jato oinni. Jawe keskabi shinanyamawe, mia iokana jato betan karestanwe. Jabora en raana bekana iki”, akin.
21 Jatian naman ipakeax kaxon, Pedron ja jonibo yoia iki: —Ea riki, ja maton manoi iitai ¿Jaweatiki maton ea benai? —akin.
22 Jatian jabaon neskaa iki: —Non sontárobaon koshi *capitán Cornelion raanara noa bekanke. Ja riki itibi keskati jaa joni, itan Dioski raketai, jatíbi judíobaon jakonhai, itan noikana. Westíora Diossen ángelninki aibake yoikin, jan kenamaa jawen xobonko mia kati, kaxon min joi yoiaitian, jan ninkánon ixon —akin.
23 Jatian Pedron, xobon jikimaxon, ja yamé jain jato oxamaa iki. Moa neteribi xabataitian, Pedro jato betan kaa iki, jatian ja Jopenkonia jawetii joi akaiboribi já betan bokana iki.
24 Boax, wetsa nete xabáketian, Cesareanko nokókana iki. Jatian Cornelio jawen rareboyabi, jato manai tsamákana iká iki. Jatian jainribi ikana iki, jabé jakoni raenanai joniboribi jato kenaa, bekana.
25 Jatian moa xobon nokókanketian, Pedro joé ataanan, Cornelio, já bebon chirankoota iki, rabikasi.
26 Ikaxbi Pedron weniinnabainkin yoia iki: —Chankawe, eara mia keska joniribi iki —akin.
27 Jatian jabé yoyo iananbi, jikixon oinna iká iki, icha jonibo tsinkíkana.
28 Jatian Pedron jato yoia iki: —Matonbira onanke, ja judío jonibaon esekan yoiai, kaibomabo betan pataxanantimabires, jaton xobon jikitimabobi. Ikaxbi Diossenra ea onanmake, Diossen oinnara mato kerás iki akin tsoabi atima.
29 Jakopira, yoikanatianbi ea joke. Jatian ramara ea onankasai, jaweatiki maton ea kenamaa ixon —akin.
30 Jatian Cornelion neskaa iki: —Moa chosko nete riki, nato bari ipakeai kimisha hora yantanpake, nokon xobonbi ayunankin orani iitaitian, westíora joni penéshaman chopa saweya eki pikoibata.
31 Janra ea yoiibake: ‘Cornelio, min oraciónra mia Diossen ninkáxonke, jainxon ja maxkatabo min jato akinpachoaibora Diossen onanke.
32 Ja Jope jeman jato raanwe. Abátankanon ja Simón janeya joni jonon ixon yoikin, jawen janeribi iki Pedro. Jara ja bichin teetai wetsa Simón janeya jonin xobonko iki’, akin.
33 Jaskáxonra jatianbi mia benati en jato raanhaibake. Jakonresira mia moa joke, jakon shinanya ikax. Ramara noa neno jatikaxbi Dios bebon ikanai. Jaskara ikenra noa keenai, jatíbi ja noa yoiti non Ibon mia yoiabo, min noa yoitinin —akin aká iki.
34 Jaskáxon Pedron jato joi yoikin peoa iki: —Ramaparira en moa kikinhakin onanke, wetsabo jakonmaayamakin senenbires jato Diossen jakonhai ixon.
35 Janra jatíbiainoa jaki shinannaibo itan jawen joi senenhaibo, itan jato jakonhakin ikinai jonibo jato noike.
36 Diossenra Jesucristo raana iki, já meranxon jakon joi *Israel jonibo jato yoiti. Jaskatax Dios betan jakoni jakanon ixon. Jesucristora jatíbi jonibaon Ibo iki.
37 Matonra kikinhakin onanke, Galileankoniax peokootax, ja jato *bautizanai Juanman joi yoianan, jato bautizana pekáo, jatíbi Judea main winota jawékibo.
38 Matonra onanribike, ja Nazarethainoa Jesús, Diossen jawen atipana koshi, itan jawen Shinan meniaton jakon jawékibo, itan yoshiman iboaxon onitsapimaiboribi, jato benxoakatitai. Jaskarabora jan aká iki, Dios jabetanbi ixon, akinna.
39 Nonbishaman Jesussen jaskara jawéki akábo oinna ixonra, non mato yoiai, jaskarabora aká iki Judea mainxon, itan Jerusalén jemankoxonribi. Ja Jesússa judíobaon jiwi korosen panihannan retea iki.
40 Ikaxbi jawen kimisha nete itin, Diossen jiria iki, jaskáxon noki pikomaa iki.
41 Ja jiritaanan, nobébi pixon, xeaibora, Diossen jatíbi jonibo jato oinmayamaa iki. Noaresa oinmaa iki, moabi jaskáakin katóxon noa oinmati yoini ixon.
42 Janra noa raana iki, Jesús riki jatíbi japaria jonibaon, itan moa mawatabaon akábo, jato yoixonti joni koshi Diossen imaa ixon, jato yoiti.
43 Jatíbi *profetabora Jesúskiriti iká joi yoii neskákatikanai, jaweratobaonki já ikonhai, jabora já kopires Diossen jaton ochabo shinanxontima iki —ikibo.
44 Jaskara joibo Pedron jato yoii iitainbi, Diossen Shinan jatíbi ja joi ninkataiboki joá iki.
45 Jaskataitian oinnax, ja Pedro betan bekana joi ikonhaa judíobo ratékana iki; ja judíomaboribi ja Diossen Shinan jato meniketian.
46 Ja wetsaresibi join yoyo ikanaitian itan Dios rabikanaitian ninkákana iki.
