ሃዋሬታ ኦሶ 9:3-34 in Gamo

³ ዳማስቆ ጋካና ማቲሺን ቆፖንታ ሳሎፔ ፖዖይ ኢዛ ዩሾን ፖልዑ ጊዴስ።

⁴ ኢዚካ ሄራካ ቢታ ቦላ ኩንዲዲ ሳሎፔ “ሳዉሌ፥ ሳዉሌ፥ ታና ኣዛስ ጎዳይ?” ጊዛ ቃላ ሲይዴስ።

⁵ ሳዉሌይካ “ጎዶ! ኔ ኦኔ?” ጊዴስ። ኢዚካ ኢዛስ “ታኒ ኔ ጎዴꬂዛ ዬሱሳኮ!”

⁶ ኔ ሃዒ ዴንዳዳ ጌዴ ካታማ ጌላ፤ ኔ ኦꬃናስ ቤሲዛዝ ኔስ ታ ዮታና” ጊዴስ።

⁷ ሳዉሌራ ኢሲፌ ቢዛ ኣሳቲ ቃላ ጊሪስ ሲሳፌ ኣቲን ኦናካ ቤዮንታ ጊሽ ባ ዱና ኦይኪ ኤቂዳ።

⁸ ሳዉሌይ ባ ኩንዲዳሶፔ ዴንዲዲ ኣይፌ ዶዪ ፄሊዛ ዎዴ ኣይኮካ ዴማናስ ዳንዳይቤና። ሄሳ ጊሽ ኢዛራ ዲዛ ኣሳቲ ኢዛ ኩሼ ኦይኪዲ ካሌꬂ ኤኪዲ ዳማስቆ ኤፊዳ።

⁹ ሄꬑ ጋላስ ጋካናስ ቆቂዲኔ ካꬅ ሃꬄ ቤይቤና።

¹⁰ ዳማስቆን ኢሲ ሃናኒያ ጌቴቲዛ ኣማኒዛዴይ ዴስ። ኢዛስ ጎዳይ ኣጁታን “ሃናኒያ” ጊዲ ፄይጊዴስ፤ ኢዚካ “ዬ ጎዶ!” ጊዴስ።

¹¹ ጎዳይካ ኢዛ “ዴንዳ! ሱሬ ጌቴቲዛ ኦጌይራ ዩሁዳ ጌቴቲዛሶ ባ። ሄን ሳዉሌ ጌቴቲዛ ኢሲ ፃርሴሴ ኣሲ ዎሲሼ ዴስ፤ ኔ ኢዛ ኮያ ዴማ።

¹² ጋሶይካ ሃናኒያ ጌቴቲዛይሲ ሳዉሌይ ዲዛሶ ዪዲ ኢዚ ፄላና ማላ ኢዛ ቦላ ባ ኩሼ ዎꬂሺን ኣጁታን ቤዪዴስ።”

¹³ ሃናኒያይካ ዛሪዲ “ጎዶ! ሃይሳዴይ ዬሩሳላሜን ዲዛ ጌሻታ ቦላ ኣይ ማላ ኢታ ሜቶ ጋꬂዳኮኔ ታ ዳሮ ኣሳፔ ሲያዲስ።

¹⁴ ኢዚ ሃ ዪዳይ ኔ ሱንꬃ ፄይጊዛይታ ዉርሲ ቃቻናስ ቄሴታ ሃላቃታፔ ጎዳቴꬅ ኤኪዲኮ” ጊዴስ።

¹⁵ ጎዳይካ ኢዛስ “ኔ ባ! ሃይሲ ኣዴዚ ኣይዛቤታ ሲንꬃኒኔ ካዎታ ሲንꬃን ሄሳꬆካ ኢስራዔሌ ዴሬ ሲንꬃን ታ ሱንꬅ ቶካና ማላ ኢዚ ታስ ዶሬቲዳይሳ።

¹⁶ ኢዚ ታ ሱንꬃ ጊሽ ኣይ ማላ ዋዬ ቤያናኮ ታ ኢዛ ቤሳና” ጊዴስ።

¹⁷ ሃናኒያይ ቢዲ ኢዛስ ዮቴቲዳሶ ጌሊዴስ። ሳዉሌ ቦላ ባ ኩሼ ዎꬂዲ “ታ ኢሻ ሳዉሌ ኔ ሃ ዪሺን ኔስ ኦጌ ቦላ ቆንጪዳ ጎዳ ዬሱሲ ኔ ኣይፌይ ፄላና ማላኔ ኔኒ ፂሎ ኣያናን ኩማና ማላ ታና ኔኮ ኪቲዴስ” ጊዴስ።

¹⁸ ሄራካ ሳዉሌ ኣይፌፔ ፖቆ ማላይ ፖቄቲ ዎꬊን ኢዚ ፄላና ዳንዳዪዴሲኔ ዴንዲዲ ፃማቄቲዴስ።

¹⁹ ካꬂካ ሚዲ ሚኒዴስ። ኡንዴና ዎዴ ኣማኒዛይታራ ዳማስቆን ጋምዒዴስ።

²⁰ ሄራካ ዬሱሲ ፆሳ ና ጊዲዳይሳ ኣይሁዳታ ዎሳ ኬꬃታን ታማርሶ ኦይኪዴስ።

²¹ ሲዪዳ ኣሳይ ዉሪ “ሃይሲ ዬሩሳላሜን ሃ ሱንꬃ ፄይጊዛይታ ꬋዪሲዛ ኣዴዛ ጊዴኔ? ቃሴ ኢዚ ሃ ዪዳይ ሄ ኣሳታ ቃቺ ኤኪ ቄሴታ ሃላቃታኮ ኤፋናስ ዴኔ?” ጊሼ ማላሌቲዳ።

²² ሳዉሌይ ካሴፔ ሚኒ ሚኒ ቢዴስ። ዳማስቆን ዲዛ ኣይሁዳታስ ዬሱሲ ኢዚ ፆሲ ኪቲዳዴ ጊዲዳይሳ ኣማንꬂሼ ኣሳ ዱና ኦይꬂዴስ።

²³ ዳሮ ጋላሳታፔ ጉዬ ኣይሁዳቲ ሳዉሌ ዎꬋናስ ዱላቲዳ።

²⁴ ኢዚካ ኢስታ ቆፋ ኤሪዴስ። ኢስቲካ ኢዛ ዎꬋናስ ካታማ ጌልꬂዛ ኦጌን ጋላሲኔ ቃማ ናጊዳ።

²⁵ ኣማኒዛይቲ ጊዲኮ ኢዛ ጊዶꬅ ካታማ ዩሾን ዲዛ ማስኮቴዛራ ኬሼን ዱጌ ዎꬂዳ።

²⁶ ሳዉሌይ ዬሩሳላሜ ዪዲ ኣማኒዛይታራ ዋላኬታና ኮዪን ኢዚ ቱሙ ኣማኒዛዴ ጊዲዳይሳ ኢስቲ ኣማኔቶንታ ጊሽ ኢዛስ ባቢዳ።

²⁷ ጊዶ ኣቲን ባርናባሲ ኢዛ ሃዋሬታኮ ኤፊን ሳዉሌይ ኢዚ ዳማስቆ ኦጌ ቦላ ጎዳ ዎስቲ ቤዪዳኮ፥ ጎዳይካ ኢዛስ ኣይ ዮቲዳኮኔ ቃሴካ ዳማስቆን ዲሼ ኢዚ ኣይ ማላ ፃላቴꬃራ ዬሱሳ ሱንꬃን ሳባኪዳኮ ኢስታስ ዮቲዴስ።

²⁸ ሄሳ ጊሽ ሳዉሌይ ኢስታራ ዲዴስ። ዬሩሳላሜን ዩዪ ዩዪ ኣስ ባቦንታ ጎዳ ሱንꬃን ታማርሲዴስ።

²⁹ ጊሪኬ ዴሬፔ ዪዳ ኣይሁዳታራ ሃሳይሼ ፓላሜቲዴስ፤ ጊዶ ኣቲን ኣሳይካ ኢዛ ዎꬋናስ ኮዪዴስ።

³⁰ ኣማኒዛይቲ ሄሳ ኤሪዲ ዱጌ ቂሳሪያ ጌቴቲዛሶ ዎꬂዲ ፃርሴሴ ዬዲዳ።

³¹ ሄሳ ዎዴ ዩሁዳኒኔ ጋሊላን፥ ሳማሪያንካ ዲዛ ኣማኒዛይቲ ሳሮን ዲዲ ካሴፔ ሚኒዳ። ቃሴካ ፆሳ ያሻቴꬃን ሲሜሬቲሼ ፂሎ ኣያናን ሚኔቲዳኔ ካሴፔ ቆዳን ዳሪ ዳሪ ቢዳ።

³² ጴፅሮሲ ዴሬፔ ዴሬን ዩዪሼ ሊዳ ካታማን ዲዛ ኣማኒዛይታ ቤያናስ ዱጌ ዎꬊዴስ።

³³ ሄን ኤኒያ ጌቴቲዛይሳ ኦሱፑን ላይꬅ ሂፃን ቃሼቲ ኡቲዳ ኢሲ ጉንዳ ኣስ ዴሚዴስ።

³⁴ ጴፅሮሲካ “ሃይሶ ኤኒያ! ዬሱስ ኪርስቶሲ ኔና ፓꬃና፤ ዴንዳ ኔ ሂፃ ዴንꬃ!” ጊዴስ። ኤኒያይ ሄራካ ፑሱኩ ጊ ዴንዲዴስ።

³ Damasqo gakkana matishin qopponta saloppe poo7oy iza yuushon pol7u gides.

⁴ Izikka heerakka biitta bolla kundidi saloppe “Sawule, Sawule, tana aazas goodday?” giza qaala siydes.

⁵ Sawuleyka “Godo! Ne oonee?” gides. Izikka izas “Tani ne goodeththiza Yesusakko!”

⁶ “Ne ha7i dendada gede katama gela; ne ooththanas bessizaz nees ta yootana” gides.

⁷ Sawulera issife biza asati qaala giiris sissafe attin oonakka beyonta gish ba duuna oykki eqqida.

⁸ Sawuley ba kundidasoppe dendidi ayfe doyi xeelliza wode aykkokka demmanas dandaybenna. Hessa gish izara diza asati iza kushe oykkidi kaalethi ekkidi Damasqo efida.

⁹ Heedzdzu gallas gakkanaas qooqidinne kath haaththe beybenna.

¹⁰ Damasqon issi Hananiya geetettiza ammanizadey dees. Izas Goday ajjutan “Hananiya” giidi xeygides; izikka “Yee Godo!” gides.

¹¹ Godayka iza “Denda! Suure geetettiza ogeyra Yuhuda geetettizaso ba. Heen Sawule geetettiza issi Xarseese asi woossishe dees; ne iza koya demma.

¹² Gaasoyka Hananiya geetettizayssi Sawuley dizaso yiidi izi xeellana mala iza bolla ba kushe woththishin ajjutan beyides.”

¹³ Hananiyaykka zaaridi “Godo! Hayssadey Yerusalamen diza geeshshata bolla ay mala iita meto gaththidakkonne ta daro asappe siyadis.

¹⁴ Izi haa yiday ne suntha xeygizayta wursi qachanas Qeeseta halaqatappe godateth ekkidikko” gides.

¹⁵ Godayka izas “Ne ba! Hayssi addezi Ayzaabeta sinthaninne kawota sinthan hessathoka Isra7eele dere sinthan ta sunth tookkana mala izi taas doorettidayssa.

¹⁶ Izi ta suntha gish ay mala waaye beyanakko ta iza bessana” gides.

¹⁷ Hananiyay biidi izas yootetidaso gelides. Sawule bolla ba kushe woththidi “Ta isha Sawule ne ha yishin nees oge bolla qoncida Goda Yesusi ne ayfey xeellana malanne neni Xillo Ayanan kumana mala tana neekko kiittides” gides.

¹⁸ Heerakka Sawule ayfeppe poqo malay poqeti wodhdhin izi xeellana dandayidessinne dendidi xammaqetides.

¹⁹ Kaththikka miidi minnides. Undena wode ammanizaytara Damasqon gam7ides.

²⁰ Heerakka Yesusi Xoossa Naa gididayssa Ayhudata Woosa Keeththatan tamarso oykkides.

²¹ Siyida asay wuri “Hayssi Yerusalamen ha suntha xeygizayta dhayissiza addeza gidenee? Qasse izi ha yiday he asata qachi ekki Qeeseta Halaqatakko efanas deenee?” gishe malaletida.

²² Sawuley kaseppe minni minni bides. Damasqon diza Ayhudatas Yesusi izi Xoossi kiittidade gididayssa ammanthishe asa duuna oythides.

²³ Daro gallassatappe guye Ayhudati Sawule wodhanas duulatida.

²⁴ Izikka ista qofa erides. Istika iza wodhanas katama gelthiza ogen gallassinne qamma naagida.

²⁵ Ammanizayti gidikko iza gidoth katama yuushon diza maskotezara keeshen duge woththida.

²⁶ Sawuley Yerusalame yiidi ammanizaytara walakkettana koyin izi tumu ammanizade gididayssa isti ammanetonta gish izas babbida.

²⁷ Gido attin Barnabaassi iza Hawaaretakko efin Sawuley izi Damasqo oge bolla Goda wosti beyidakko, Godayka izas ay yootidakkonne qasseka Damasqon dishe izi ay mala xalateththara Yesusa sunthan sabakidakko istas yootides.

²⁸ Hessa gish Sawuley istara dides. Yerusalamen yuuyi yuuyi as babbonta Goda sunthan tamarsides.

²⁹ Girike dereppe yida Ayhudatara haasayshe palametides; gido attin asaykka iza wodhanas koyides.

³⁰ Ammanizayti hessa eridi duge Qisaariya geetettizaso woththidi Xarseese yeddida.

³¹ Hessa wode Yuhudaninne Galilan, Samaariyanka diza ammanizayti saron diidi kaseppe minnida. Qasseka Xoossa yashshatethan simeretishe Xillo Ayanan minetidanne kaseppe qoodan dari dari bida.

³² Phexroosi dereppe deren yuuyishe Liida kataman diza ammanizayta beyanas duge wodhdhides.

³³ Heen Eniya geetettizayssa osupun layth hiixan qasheti uttida issi gunda as demmides.

³⁴ Phexroosikka “Haysso Eniya! Yesus Kirstoosi nena pathana; denda ne hiixa dentha!” gides. Eniyay heerakka pusuku gi dendides.