ሃዋሬታ ኦሶ 8:6-37 in Gamo

⁶ ዳሮ ዴሬይ ፒሊጶሲ ኦꬂዛ ማላታ ቤዪዲ ኢዚ ዮቲዛ ቃላ ዎዝናፔ ሎዔꬂ ሲይዴስ።

⁷ ቱና ኣያናቲካ ዳሮ ኣሳፔ ዋሲ ዋሲ ኬዚዳ። ዳሮ ቶሆ ሲላቲኔ ዎቤቲካ ፓፂዳ።

⁸ ሄሳ ጊሽ ሄ ካታማ ኣሳይ ዳሮ ኡፋዬቲዴስ።

⁹ ጊዶ ኣቲን ሄሳፌ ካሴ ሄ ካታማዪን ማሮ ማሮቲዲ ሳማሪያ ኣሳ ዳሮ ማላሊሲዛዝ ኦꬂዛ ኢሲ ሲሞና ጌቴቲዛ ማሮይ ዴስ። ኢዚካ ባና ጊታ ኣሳ ማላ ቆዲዛዴ።

¹⁰ ኣሳይ ዉሪ ጉꬃታፔ ጊታታ ጋካናስ ዉሪካ “ሃይሲ ኣዴዚ ጊታ ዎልቃማ ጌቴቲዛ ፆሳ ዎልቃ” ጊሼ ኢዚ ጊዛይሳ ዉርሲ ዎዝናፔ ሲዬስ።

¹¹ ዳሮ ዎዴ ባ ማሮቴꬃ ኦሶን ኣሳ ማላሊሲዳ ጊሽ ኣሳይ ኢዛ ዎዝናፔ ካሊሼ ጋምዒዴስ።

¹² ጊዶ ኣቲን ፒሊጶሲ ፆሳ ካዎቴꬃ ጊሺኔ ዬሱስ ኪርስቶሳ ጊሽ ሳባኪዳይሳ ሲይዲ ኣማኒዳ ማጫሳይኔ ኣቱማሳይ ፃማቄቲዴስ።

¹³ ሲሞኒካ ኣማኒዲ ፃማቄቲዴስ። ፒሊጶሳካ ካሊ ቢዲ ሃኒዛ ጊታ ማላታ ቤዪዲ ማላሌቲዴስ።

¹⁴ ዬሩሳላሜን ዲዛ ሃዋሬቲ ሳማሪያ ኣሳይ ፆሳ ቃላ ኤኪዲ ኣማኒዳይሳ ሲይዲ ጴፅሮሳኔ ዮሃኒሳ ኢስታኮ ኪቲዳ።

¹⁵ ኢስቲካ ሳማሪያ ጋኪዲ ኣማኒዳ ኣሳይ ፂሎ ኣያና ኤካና ማላ ኣሳስ ዎሲዳ።

¹⁶ ጋሶይካ ሄ ዎዴ ኢስቲ ጮ ዬሱሳ ሱንꬃን ፃማቄቲዳ ኣቲን ቡሮ ፂሎ ኣያናይ ኢስታፌ ኢሳዴ ቦላካ ዎꬊቤና።

¹⁷ ሄሳ ጊሽ ጴፅሮሲኔ ዮሃኒሲ ባ ኩሼ ኣሳ ቦላ ዎꬂን ኣሳይ ፂሎ ኣያና ኤኪዴስ።

¹⁸ ሲሞኒካ ሃዋሬቲ ኩሼ ዎꬂ ዎሲን ፂሎ ኣያናይ ኢሜቲዛይሳ ቤዪዲ ጴፅሮሳሲኔ ዮሃኒሳስ ሚሼ ኤኪ ዪዲ፥

¹⁹ “ታ ኢዛ ቦላ ታ ኩሼ ዎꬂዛዴይ ዉሪ ፂሎ ኣያና ኤካና ማላ ሃይሳ ማላ ጎዳቴꬅ ታስካ ኢሚቴ” ጊን፥

²⁰ ጴፅሮሲ ኢዛስ ዛሪዲ “ፆሳ ኢሞታ ኔ ሚሻን ሻማና ቆፒዳ ጊሽ ኔኒ ኔ ሚሻራ ኢሲፌ ꬋያ።

²¹ ኔ ዎዝናይ ፆሳ ሲንꬃን ሱሬ ጊዶንታ ጊሽ ኔስ ሃይሳ ሃ ኦሶዛን ጊሻይ ዎይኮ ቃዳይ ዴና።

²² ሃይሳ ኔ ኢታቴꬃ ጊሽ ሃዒ ኤሌ ማሮቴꬃን ጌላ፤ ኔ ዎዝና ቆፋ ኔስ ኣቶ ጋናኮኔ ኔስ ጎዳ ዎሳ።

²³ ጋሶይካ ኔኒ ኢታቴꬃን ኩሚዳይሲኔ ማካላን ቃሼታ ኡቲዳይሲ ታስ ቤቴስ” ጊዴስ።

²⁴ ሲሞኒካ ዛሪዲ “ኢንቴ ጊዳ ዮዖታፔ ኣይኮይካ ታ ቦላ ጋኮንታ ማላ ታስ ጎዳ ዎሲቴ” ጊዴስ።

²⁵ ጴፅሮሲኔ ዮሃኒሲ ጎዳ ቃላ ማርካቲዳይሳፌኔ ቆንጪሲ ዮቲዳይሳፌ ጉዬ ዳሮ ሳማሪያ ጉታታን ሚሺራቾ ቃላ ሳባኪሼ ዬሩሳላሜ ሲሚዳ።

²⁶ ጎዳ ኪታንቻይ ፒሊጶሳ “ዴንዳ! ዬሩሳላሜፔ ዱጌ ባጋራ ጌዴ ጋዛ ኤፊዛ ባዞ ኦጋራ ባ” ጊዴስ።

²⁷ ኢዚካ ዴንዲ ቢዴስ። ሂንዴኮ ጌቴቲዛ ቶጲያፔ ጊዲዳ ካዎያ ባ ኬꬃኒኔ ባ ካዎቴꬃን ዲዛ ኡባ ሚሻ ቦላ ኣላፌቴꬃን ዎꬂዳ ኢሲ ቶጲያ ጉንዱላ ኣሲ ኢዛራ ጋጊዴስ። ሄ ኣዴዚ ፆሳስ ጎይናና ዬሩሳላሜ ቢዴስ።

²⁸ ኢዚ ሄፔ ሲሚሼ ፓራ-ጋሬን ኡቲዲ ናቤ ኢሳያሳ ማፃፋ ናባቤስ።

²⁹ ኣያናይ ፒሊጶሳ “ባ! ጌዴ ፓራ-ጋሬዛኮ ሺቃ” ጊዴስ።

³⁰ ፒሊጶሲካ ኤሶቲዲ ፓራ-ጋሬዛኮ ቢዲ ኣዴዚ ናቤ ኢሳያሳ ማፃፋ ናባቢሺን ሲይዲ “ሄሲ ኔ ናባቢዛይሲ ኔስ ጌሊዜ?” ጊዴስ።

³¹ ጉንዱላ ኣዴዚካ “ታና ኤሪሲዛ ኣሲ ባይንዳ ታ ዎስታ ኤሮ?” ጊዴስ። ኢዚካ ጌዴ ኢዛ ጋሬዛን ጌልዲ ኢዛ ኣቻን ኡታና ማላ ዎሲዴስ።

³² ኢዚ ናባቢዛ ማፃፋይ “ኢዚ ዶርሳ ማላ ሹኬታና ላጌቲዴስ፤ ዶርሳ ላቃይ ኢሲኬ ቃንፂዛይሳ ሲንꬃን ጮዑ ጊዛ ማላ ሄሳꬆካ ኢዚ ባ ዱና ፖጊቤና።

³³ ባና ካዉሺዲ ፒርዳይ ባይንዳዴ ጊዲዴስ። ኢዛ ሼምፖይ ቢታ ቦላፌ ዲጌቲዴስ። ኢዛ ዬሌቴꬃ ጊሽ ሃሳያና ዳንዳዪዛይ ኦኔ?” ጌስ።

³⁴ ጉንዱላ ኣዴዚካ ዛሪዲ ፒሊጶሳ “ናቤዚ ሃይሳ ኦና ጊሽ ጊዜ? ባ ጊሽ ጊዜዬ? ዎይኮ ሃራ ኣሳ ጊሽ ጊዜ? ሃያና፥ ታስ ዮታርኪ!” ጊዴስ።

³⁵ ፒሊጶሲካ ባ ዱና ዶይዲ ሄ ማፃፋፔ ዶሚዲ ዬሱሳ ሚሺራቾ ቃላ ጊሽ ማርካቲዴስ።

³⁶ ኢስቲ ኢሲፌ ቢሼ ሃꬂ ዲዛሶ ጋኪዳ። ኣዴዚካ “ሄኮ ሃꬂ ሃይሳን ዴስ፤ ሂስቲን ታ ፃማቄቶንታ ማላ ዲጊዛይ ኣዜ?” ጊዴስ።

³⁷ ፒሊጶሲካ “ኔ ኩሜꬃ ዎዝናፔ ኣማኒኮ ፃማቄታና ዳንዳያሳ” ጊዴስ። ኣዴዚካ “ዬሱስ ኪርስቶሲ ፆሳ ና ጊዲዳይሳ ኣማናይስ” ጊዴስ።

⁶ Daro derey Piliphoosi ooththiza malata beyidi izi yootiza qaala woznappe lo7ethi siydes.

⁷ Tuna ayanatikka daro asappe waassi waassi kezida. Daro toho silatinne wobetikka paxida.

⁸ Hessa gish he katama asay daro ufayetides.

⁹ Gido attin hessafe kase he katamayin maro marotidi Samaariya asa daro malalisizaz ooththiza issi Simoona geetettiza maroy dees. Izikka bana gita asa mala qoodizade.

¹⁰ Asay wuri guuthatappe gitata gakkanaas wurikka “Hayssi addezi gita wolqama geetettiza Xoossa wolqa” gishe izi gizayssa wursi woznappe siyees.

¹¹ Daro wode ba marotetha ooson asa malalisida gish asay iza woznappe kaallishe gam7ides.

¹² Gido attin Piliphoosi Xoossa Kawoteththa gishshinne Yesus Kirstoosa gish sabakidayssa siydi ammanida macasaynne attumasay xammaqetides.

¹³ Simoonikka ammanidi xammaqetides. Piliphoosakka kaalli biidi haniza gita malata beyidi malalettides.

¹⁴ Yerusalamen diza Hawaareti Samaariya asay Xoossa qaala ekkidi ammanidayssa siydi Phexroosanne Yohannisa Istako kiittida.

¹⁵ Istika Samaariya gakkidi ammanida asay Xillo Ayana ekkana mala asas woossida.

¹⁶ Gaasoyka he wode isti coo Yesusa sunthan xammaqetida attin buro Xillo Ayanay istafe issade bollakka wodhdhibenna.

¹⁷ Hessa gish Phexroosinne Yohannisi ba kushe asa bolla woththin asay Xillo Ayana ekkides.

¹⁸ Simoonikka Hawaareti kushe woththi woossin Xillo Ayanay imettizayssa beyidi Phexroosasinne Yohannisas miishe ekki yiidi,

¹⁹ “Ta iza bolla ta kushe woththizadey wuri Xillo Ayana ekkana mala hayssa mala godateth taaska immite” giin,

²⁰ Phexroosi izas zaaridi “Xoossa imota ne miishan shammana qoppida gish neni ne miishara issife dhaya.

²¹ Ne woznay Xoossa sinthan suure gidonta gish nees hayssa ha oosozan gishay woykko qaaday deenna.

²² Hayssa ne iitatetha gish ha7i elle maarotethan gela; ne wozna qofa nees atto gaanakkonne nees Goda woossa.

²³ Gaasoyka neni iitatethan kumidayssinne makalan qasheta uttidayssi taas beettees” gides.

²⁴ Simoonikka zaaridi “Inte gida yo7otappe aykkoykka ta bolla gakkonta mala taas Goda woossite” gides.

²⁵ Phexroosinne Yohannisi Goda qaala markattidayssafenne qoncisi yootidayssafe guye daro Samaariya gutatan mishiraachcho qaala sabakishe Yerusalame simmida.

²⁶ Goda kiitanchay Piliphoosa “Denda! Yerusalameppe duge baggara gede Gaaza efiza bazzo ogara ba” gides.

²⁷ Izikka dendi bides. Hindeko geetettiza Tophiyappe gidida kawoya ba keeththaninne ba kawoteththan diza ubba miisha bolla alafetethan woththida issi Tophiya gundula asi izara gaaggides. He addezi Xoossas goynnana Yerusalame bides.

²⁸ Izi heeppe simmishe para-gaaren uttidi nabe Isayaasa maxaafa nababes.

²⁹ Ayanay Piliphoosa “Ba! Gede para-gaarezakko shiiqa” gides.

³⁰ Piliphoosikka eesotidi para-gaarezakko biidi addezi nabe Isayaasa maxaafa nababishin siydi “Hessi ne nababizayssi nees gelizee?” gides.

³¹ Gundula addezikka “Tana erisiza asi baynda ta wosta eroo?” gides. Izikka gede iza gaarezan geldi iza achchan uttana mala woossides.

³² Izi nababiza maxaafay “Izi dorsa mala shukettana laagettides; dorsa laaqay isike qanxizayssa sinthan co7u giza mala hessathoka izi ba duuna pogibenna.

³³ Bana kawushshidi pirday bayndade gidides. Iza shempoy biitta bollafe diggettides. Iza yeletetha gish haasayana dandayizay oonee?” gees.

³⁴ Gundula addezikka zaaridi Piliphoosa “Nabezi hayssa oona gish gizee? Ba gish gizeyee? Woykko hara asa gish gizee? Hayana, taas yootarki!” gides.

³⁵ Piliphoosikka ba duuna doydi he maxaafappe doommidi Yesusa Mishiraachcho qaala gish markattides.

³⁶ Isti issife bishe haaththi dizaso gakkida. Addezikka “Hekko haaththi hayssan dees; histin ta xammaqetonta mala diggizay aazee?” gides.

³⁷ Piliphoosikka “Ne kumeththa woznappe ammanikko xammaqettana dandayassa” gides. Addezikka “Yesus Kirstoosi Xoossa Naa gididayssa ammanays” gides.