ሃዋሬታ ኦሶ 5:7-24 in Gamo

⁷ ሄꬑ ሳቴፔ ጉዬ ማቼያ ኢዚ ዋኒዳኮኔ ኤሮንታ ዳሼ ያዱስ።

⁸ ጴፅሮሲካ “ኣኔ ታስ ዮታ፤ ኢንቴ ጋዴዛ ባይዚዳ ዋጋይ ሃኖ ፃላ?” ጊዴስ። ኢዛካ “ኤ ሃኖ ሃ ዋጋይን ባይዚዶስ” ጋዱስ።

⁹ ጴፅሮሲካ “ኢንቴ ፆሳ ኣያና ፓጫናስ ኣይሲ ኢሲ ዱና ጊዲዴቲ? ሄኮ ኔ ኣዚና ሞጊዳ ኣሳቲ ሞጊ ሲሚዲ ካሬን ፔንጌ ቦላ ዴቴስ። ኢስቲ ኔናካ ኬሲ ኤኪ ኤፋና” ጊዴስ።

¹⁰ ኢዛ ሲዪዳ ማላ ሄራካ ኢዛ ቶሆ ቦላ ኩንዳዳ ሃይቃዱስ። ኣቱማሳይካ ሶ ጌሊዳ ማላ ሃይቂዳሮ ቤዪዲ ኬሲ ኤፊዲ ኢዚ ኣዚና ኣቻን ሞጊዳ።

¹¹ ኩሜꬃ ዎሳ ኬꬃ ኣሳይኔ ሄሳ ሲዪዳ ኣሳይ ዉሪ ዳሮ ባቢዴስ።

¹² ሃዋሬቲካ ዴሬ ጊዶን ዳሮ ማላታኔ ማላሊሲዛ ሚሽ ኦꬂዳ። ኣማኒዛይቲ ዉሪ “ሶሎሞኔ ሲሜሬቴꬃሶ” ጌቴቲዛ ፔንጌን ሺቄቴስ።

¹³ ኢስታስ ባቢዳ ጊሽ ኦኒካ ኢስታራ ዋላኬታናስ ኮዪቤና። ጊዶ ኣቲን ዴሬይ ኢስታ ኬሂ ቦንቼስ።

¹⁴ ዳሮ ማጫሳቲኔ ኣዴቲ ዎዴፔ ዎዴን ጎዳን ኣማኒ ኣማኒ ኢስታ ቦላ ጉጄቲዳ።

¹⁵ ሄሳ ጋሶን ጴፅሮሲ ኣꬊሺን ሃራይ ኣቲን ኢዛ ኤሾይ ሃርጋንቻታፔ ባጋ ሃርጋንቻታ ቦላ ዎꬋና ማላ ሃርጊዛይቲ ኢቺዛ ኣልጋ ቦላኔ ሃላ ቦላ ካሬን ኢሺሴቴስ።

¹⁶ ዬሩሳላሜ ዩሾን ዲዛ ካታማታፔ ሃርጊዛይታኔ ቱና ኣያናይ ዋይሲዛይታ ኤሂን ዉሪ ፓፂዳ።

¹⁷ ሄሳ ዎዴ ቄሴታ ሃላቃይኔ ኢዛራ ዲዛ ሳዱቃዌታ ባጋቲ ዉሪካ ቃናቴ ቃናቲዛይታ ፃላ ጊዲዳ።

¹⁸ ሃዋሬታ ኦይኪዲ ቃሾ ኬꬄ ጌልꬂዳ።

¹⁹ ጊዶ ኣቲን ጎዳ ኪታንቻይ ቃማራ ቃሾ ኬꬃ ካሬ ዶዪዲ ኢስታ ኬሲዲ፥

²⁰ “ቢዲ ፆሳ ኬꬃ ጊቤ ጊዶን ኤቂዲ ሃይሳ ዴዖ ቃላ ኡባ ዴሬስ ዮቲቴ” ጊዴስ።

²¹ ጋዴይ ዎንቲዳ ማላ ኢስታስ ዮቲዳይሳ ፆሳ ኬꬃ ጊቤ ጌሊዲ ዴሬዛ ታማርሶ ኦይኪዳ፤ ቄሴታ ሃላቃይኔ ኢዛራ ዲዛይቲ ዪዲ ኣይሁዳታ ዱላታኔ ኢስራዔሌ ዴሬ ጪማታ ኩሜꬅ ኢሲ ቦላ ሺሺዳ። ሃዋሬታ ቃሾ ኬꬃፌ ኤኪ ያና ማላ ኣስ ዬዲዳ።

²² ኪቴቲ ቢዳ ኣሳቲ ቢዲ ኢስታ ቃሾ ኬꬃን ዴሚቤቴና፤ ሲሚዲኔ

²³ “ቃሾ ኬꬃይ ሎዔꬂ ቁልፌቲ ዴስ፤ ናጊዛይቲካ ፔንጌ ቦላ ኤቂ ዲሺን ቤዪዶስ፤ ጊዶ ኣቲን ኑ ዶይ ጌሊሺን ቃስ ኬꬃን ኦኒካ ባ” ጊዳ።

²⁴ ፆሳ ኬꬂ ናጊዛይታ ሃላቃይኔ ቄሴታ ሃላቃቲካ ሄሳ ሲዪዳ ማላ ሃኖዛን ዳሮ ማላሌቲዳኔ ኢስታስ ሃኖይ ዉሪ ቲኪ ጊዴስ።

⁷ Heedzdzu saateppe guye macheya izi waanidakkonne eronta dashe yadus.

⁸ Phexroosikka “Ane taas yoota; inte gadeza bayzida waagay hanno xallaa?” gides. Izakka “Ee hanno ha waagayn bayzidos” gadus.

⁹ Phexroosikka “Inte Xoossa Ayana paacanas aysi issi duuna gididetii? Hekko ne azina moogida asati moogi simmidi karen penge bolla deettes. Isti nenakka kessi ekki efana” gides.

¹⁰ Iza siyida mala heerakka iza toho bolla kundada hayqqadus. Attumasaykka soo gelida mala hayqqidaro beyidi kessi efidi izi azina achchan moogida.

¹¹ Kumeththa Woosa Keeththa asaynne hessa siyida asay wuri daro babbides.

¹² Hawaaretikka dere giddon daro malatanne malalisiza miish ooththida. Ammanizayti wuri “Solomoone simeretethaso” geetettiza pengen shiiqeetes.

¹³ Istas babbida gish oonnikka istara walakketanas koyibenna. Gido attin derey ista keehi bonches.

¹⁴ Daro macasattinne addeti wodeppe woden Godan ammani ammani ista bolla gujettida.

¹⁵ Hessa gaason Phexroosi aadhdhishin haray attin iza eeshoy harganchatappe bagga harganchata bolla wodhdhana mala hargizayti ichchiza alga bollanne hala bolla karen ishiseetes.

¹⁶ Yerusalame yuushon diza katamatappe hargizaytanne tuna ayanay waayssizayta ehin wuri paxida.

¹⁷ Hessa wode Qeeseta Halaqaynne izara diza Saduqaaweta baggati wurikka qanate qanatizayta xalla gidida.

¹⁸ Hawaareta oykkidi qasho keeththe gelthida.

¹⁹ Gido attin Goda kiitanchay qamara qasho keeththa kare doyidi ista kessidi,

²⁰ “Biidi Xoossa Keeththa gibbe giddon eqqidi hayssa de7o qaala ubba deres yootite” gides.

²¹ Gadey wontida mala istas yootidayssa Xoossa Keeththa gibbe gelidi dereza tamarso oykkida; Qeeseta halaqaynne izara dizayti yiidi Ayhudata duulatanne Isra7eele dere cimata kumeth issi bolla shiishida. Hawaareta qasho keeththafe ekki yaana mala as yeddida.

²² Kiiteti bida asati biidi ista qasho keeththan demmibeetenna; simmidinne

²³ “Qasho keeththay lo7ethi qulfeti dees; naagizaytikka penge bolla eqqi dishin beyidos; gido attin nu doy gelishin qas keeththan oonikka ba” gida.

²⁴ Xoossa Keeththi naagizayta halaqaynne Qeeseta Halaqatika hessa siyida mala hanozan daro malaletidanne istas hanoy wuri tikki gides.