ሃዋሬታ ኦሶ 4:9-37 in Gamo

⁹ ኢንቴ ሃች ሃ ቶሆ ሲላ ኣዴዛስ ኦሴቲዳ ሎዖ ኦሶይ ዋኒ ኢዚ ፓፂዳኮ ኢንቴ ኑና ኦይቺዛ ጊዲኮ፥

¹⁰ ኢንቴ ካቂን ፆሲ ሃይቆፔ ዴንꬂዳ ናዚሬቴ ዬሱስ ኪርስቶሳ ሱንꬃን ኢዚ ፓፂዳይሳኔ ኢንቴ ሲንꬃን ኢዚ ኤቂዳይሳ ኢንቴካ ኢስራዔሌ ዴሬ ኣሳይ ዉሪ ሃይሳ ኤሪቴ።

¹¹ ኢዚካ ኢንቴ ኬꬃ ሂላቲ ሌቂ ኣጊዳ ሹቻይ ጊንቤ ኬꬃስ ጉላ ቦላ ቦላራ ዎꬂዛ ሹች ጊዲዴስ።

¹² ኣቶቴꬂ ሃራ ኦናንካ ባ፤ ሳሎፔ ጋርሳ ባጋራ ኑ ኣሳ ናይቲ ኣታና ማላ ኑስ ኢሜቲዳይ ሃይሳፌ ሃራ ሱንꬂ ዴና” ጊዴስ።

¹³ ኣይሁዳታ ዱላታ ኣሳይካ ጴፅሮሲኔ ዮሃኒሲ ሄሳꬆ ፃሊ ሃሳዪዛይሳ ቤዪዲ ኢስቲ ታማሮንታ ኣስ ጊዲዳይሳ ኤሪዲ ማላሌቲዳኔ ኢስቲ ካሴ ዬሱሳራ ዲዛይታ ጊዲዳይሳ ኣኬኪዳ።

¹⁴ ሄ ፓፂዳ ኣዴዚ ኢስታራ ኤቂዲሺን ቤዪዳ ጊሽ ኢስታስ ሃራ ኦꬃናስ ጋሶይ ꬋዪዴስ።

¹⁵ ሄሳ ጊሽ ኢስታ ዱላታፔ ኬሳና ማላ ኣዛዚዳ። ሄሳፌ ቃሴካ ሺቄቲዲ ባ ጊዶን ዞሬቲዳ።

¹⁶ ባ ጊዶን “ሃይታ ኣሳታ ዎስቲኖ? ዬሩሳላሜን ዲዛ ኣሳይ ዉሪ ኢስታ ኩሼን ሃኒዳ ጊታ ማላታ ኤሪዴስ። ሄሳ ጊሽ ኑ ሃ ዮዖዛ ኣሳ ባሌꬃናስ ዳንዳዮኮ።

¹⁷ ጊዶ ኣቲን ሃይሲ ዮዖዚ ዴሬ ጊዶን ኬሂ ኣኮንታ ማላኔ ሃይቲ ኣሳቲ ናምዓንꬆ ሃይሳ ሃ ሱንꬃን ሃራ ኦናስካ ዮቶንታ ማላ ኢስታስ ሎዔꬂ ዮታና” ጊዳ።

¹⁸ ኢስታ ፄይጊዲኔ ሙሌካ ዬሱሳ ሱንꬃን ሃሳዮንታ ማላኔ ታማርሶንታ ማላ ኣዛዚዳ።

¹⁹ ጴፅሮሲኔ ዮሃኒሲ ቃሴ ዛሪዲ “ኑኒ ፆሳፌ ቦላራ ኢንቴስ ኣዛዜታናስ ቤሲዛኮኔ ኣኔ ኢንቴ ፆሳ ሲንꬃን ፒርዲቴ።

²⁰ ኑኒ ኑ ቤዪዳይሳኔ ኑ ሲዪዳይሳ ሃሳያናፔ ጉዬ ጎኮ” ጊዳ።

²¹ ቃሴካ ኢስታ ቦላ ማንዲዲ ዬዲዳ። ጋሶይካ ሃንኮ ዴሬይ ዉሪ ሃኒዳ ዮዖዛ ጋሶን ዉሪካ ፆሴ ጋላቲዛ ጊሽ ኢስታ ቃፃያናስ ዳንዳይቤቴና።

²² ሄ ጊታ ማላታን ፓፂዳ ኣዴዛስ ላይꬂ ኦይዱ ታማፌ ቦላ።

²³ ጴፅሮሲኔ ዮሃኒሲ ቃሾፔ ቢርሼቲዲ ጌዴ ባ ኣሳታኮ ሲሚዲ ቄሴታ ሃላቃቲኔ ዴሬ ጪማቲ ኢስታ ጊዳይሳ ዉርሲካ ዮቲዳ።

²⁴ ኢስቲካ ሄሳ ሲዪዳ ማላ ባ ቃላ ꬎቁ ሂስቲዲ ኢሲፌ ፆሳኮ “ዎጋ ጎዳዉ! ኔኒ ሳሎኔ ሳዓ፥ ኣባኔ ኣባ ጊዶን ዲዛይታ ዉርሳ ሜꬋዳሳ።

²⁵ ኔ ኣሽካራ ኑስ ኣዋ ዳዉቴ ዱናራ ፂሎ ኣያናን ‘ዴሬ ኣሳይ ኣዛስ ሃንቄቲ ዴንዲዴ? ዴሬይ ኣዛስ ሜላ ማቄቲዜ?

²⁶ ቢታ ካዎቲ ኢሲፌ ጋጊዲ ቢታ ሃሪዛይቲ ኢሲ ቦላ ሺቄቲዲ ጎዳ ቦላን ኔ ዶሬቲ ቲዬቲዳይሳ ቦላ ዱላቲዳ’ ጊዲ ዋሲዳ።

²⁷ “ቱማፔ ሄርዶሲኔ ጳንፆሳ ጲላፆሲ ኢስራዔላታራኔ ሃራ ዴሬ ኣሳራ ሃኖ ካታማይን ኔ ዶራ ቲዪዳ ጌሻ ናዛ ዬሱሳ ቦላ ዮዖ ቃቻናስ ሺቄቲዳ።

²⁸ ሃይሳንካ ኔ ዎልቃኒኔ ኔ ሼኔን ካሴ ኔ ቆፒዳይሳ ኢስቲ ፖሊዳ።

²⁹ ጎዶ! ሃዒካ ኢስታ ማንዴዛ ኔ ቤያ፤ ኑኒ ኔ ኣይሌቲ ኔ ቃላ ባቦንታ ኩሜꬃ ፃላቴꬃራ ዮታና ማላ ዳንዳዪሳ።

³⁰ ፓꬃናስ ኔ ኩሼ ሚጫ። ኔ ና ጌሻዛ ሱንꬃን ጊታ ማላታ ኦꬃ” ጊዳ።

³¹ ኢስቲ ዎሲዳፔ ጉዬ ኢስቲ ዲዛሶይ ቃፂዴስ። ዉሪካ ፂሎ ኣያናን ኩሚዲ ፆሳ ቃላ ፃላቴꬃን ዮቲዳ።

³² ኣማኒዛይቲ ዉሪካ ኢሲ ዎዝናኒኔ ኢሲ ቆፋን ጋጊ ዴቴስ። ኢስታስ ዲዛይ ዉሪ ኢሲ ቦላ ዴስ ኣቲን ባስ ዲዛዝ “ሃይሲ ታስ ቡዞ ሚሻ” ጊዛዴይ ዴና።

³³ ሃዋሬቲካ ጎዳ ዬሱሳ ዴንꬃ ጊታ ዎልቃን ማርካቴꬅ ኦይኪዳ። ኡባ ቦላ ጊታ ፆሳ ኪያቴꬂ ዴስ።

³⁴ ኢስታ ጊዶን ሜቶታንቻይ ኢሳዴይካ ባዋ። ጋሶይካ ጋዴ ጊዲን ኬꬄ ጊዲን ባስ ዲዛ ዉርሲ ባይዚ ባይዚ ሺሺዳ ሚሽ

³⁵ ሃዋሬታ ኩሼን ዎꬂዲ ኢሲ ኢሳዴስ ኢዛስ ኮሺዛ ማላ ጊሼቴስ።

³⁶ ቆጲሮሴ ጌቴቲዛሶን ዲዛ ዮሴፌ ጌቴቲዛዴይ ኢሲ ሌዌ ባጋ ኣሲ ዴስ። ኢዚካ ሃዋሬታን “ባርናባሳ” ጌቴቲ ሱሚዴስ። ሄሳስ ቢርሼꬃይ “ሚንꬄꬆ ና” ጉሳ።

³⁷ ኢዚካ ባ ጋዴ ባይዚዳ ሚሻ ኤሂዲ ሃዋሬታ ኩሼን ዎꬂዴስ።

⁹ Inte hach ha toho sila addezas oosettida lo7o oosoy waani izi paxidakko inte nuna oychiza gidikko,

¹⁰ inte kaqqin Xoossi hayqoppe denthida Naazirete Yesus Kirstoosa sunthan izi paxidayssanne inte sinthan izi eqidayssa inteka Isra7eele dere asay wuri hayssa erite.

¹¹ Izikka inte keeththa hiillati leqqi aggida shuchchay ginbe keeththas gula bolla bollara woththiza shuch gidides.

¹² Atotethi hara oonanka ba; saloppe garsa baggara nu asa nayti attana mala nuus imettiday hayssafe hara sunthi deenna” gides.

¹³ Ayhudata duulata asaykka Phexroosinne Yohannisi hessatho xali haasayizayssa beyidi isti tamaronta as gididayssa eridi malaletidanne isti kase Yesusara dizayta gididayssa akeekida.

¹⁴ He paxida addezi istara eqqidishin beyida gish istas hara ooththanas gaasoy dhayides.

¹⁵ Hessa gish ista duulatappe kessana mala azazida. Hessafe qasseka shiiqetidi ba giddon zoretida.

¹⁶ Ba giddon “Hayta asata wostinoo? Yerusalamen diza asay wuri ista kushen hanida gita malata erides. Hessa gish nu ha yo7oza asa baleththanas dandayokko.

¹⁷ Gido attin hayssi yo7ozi dere giddon keehi aakkonta malanne hayti asati nam7antho hayssa ha sunthan hara oonaska yootonta mala istas lo7ethi yootana” gida.

¹⁸ Ista xeygidinne mulekka Yesusa sunthan haasayonta malanne tamarsonta mala azazida.

¹⁹ Phexroosinne Yohannisi qasse zaaridi “Nuni Xoossafe bollara intes azazettanas bessizakonne ane inte Xoossa sinthan pirdite.

²⁰ Nuni nu beyidayssanne nu siyidayssa haasayanappe guye gookko” gida.

²¹ Qasseka ista bolla mandidi yeddida. Gaasoyka hanko derey wuri hanida yo7oza gaason wurikka Xoosse galatiza gish ista qaxayanas dandaybetenna.

²² He gita malatan paxida addezas laythi oyddu tammafe bolla.

²³ Phexroosinne Yohannisi qashoppe birshettidi gede ba asatakko simmidi Qeeseta Halaqatinne Dere cimati ista gidayssa wursika yootida.

²⁴ Istika hessa siyida mala ba qaala dhoqu histidi issife Xoossakko “Wogga Godawu! Neni salonne sa7a, abbanne abba giddon dizayta wursa medhadassa.

²⁵ Ne ashkara nuus aawa Dawute duunara Xillo Ayanan ‘Dere asay aazas hanqetti dendidee? Derey aazas mela maqetizee?

²⁶ Biitta kawoti issife gaaggidi biitta haarizayti issi bolla shiiqettidi Goda bollan ne dooretti tiyettidayssa bolla duulatida’ giidi waassida.

²⁷ “Tumappe Herdoossinne Phanxoosa Philaxoosi Isra7eelataranne hara dere asara hanno katamayn ne doora tiyida geeshsha naaza Yesusa bolla yo7o qachanas shiiqetida.

²⁸ Hayssanka ne wolqaninne ne shenen kase ne qoppidayssa isti polida.

²⁹ Godo! Ha7ikka ista mandeza ne beya; nuni ne aylleti ne qaala babbonta kumeththa xalatethara yootana mala dandayissa.

³⁰ Pathanas ne kushe micca. Ne naa geeshshaza sunthan gita malata ooththa” gida.

³¹ Isti woossidappe guye isti dizasoy qaaxides. Wurikka Xillo Ayanan kumidi Xoossa qaala xalatethan yootida.

³² Ammanizayti wurikka issi woznaninne issi qofan gaaggi deettes. Istas dizay wuri issi bolla dees attin baas dizaz “Hayssi taas buzo miisha” gizaddey deenna.

³³ Hawaaretikka Goda Yesusa dentha gita wolqan markateth oykkida. Ubba bolla gita Xoossa kiyatethi dees.

³⁴ Ista giddon metotanchay issadeykka baawa. Gaasoyka gade gidin keeththe gidin baas diza wursi bayzi bayzi shiishida miish

³⁵ Hawaareta kushen woththidi issi issades izas koshshiza mala gisheettes.

³⁶ Qophiroose geetettizason diza Yoosefe geetettizadey issi Lewe bagga asi dees. Izikka Hawaaretan “Barnabaasa” geetetti summides. Hessas birsheththay “Minthetho naa” guussa.

³⁷ Izikka ba gade bayzida miisha ehidi Hawaareta kushen woththides.