ሃዋሬታ ኦሶ 3:14-25 in Gamo

¹⁴ ጌሻኔ ፂሎዛ ኢንቴ ካዲዲ ሼምፖ ዎꬊዛይሲ ቢርሼታና ማላ ዎሲዴታ።

¹⁵ ዴዖ ኢሚዛዴ ኢንቴ ዎꬊዴታ፤ ጊዶ ኣቲን ፆሲ ኢዛ ሃይቆፔ ዴንꬂዴስ፤ ሄሳስ ኑኒ ማርካ።

¹⁶ ሃይሲ ኢንቴ ቤዪዛይሲኔ ኢንቴ ኤሪዛይሲ ሚኒ ኤቂዳይ ዬሱሳ ሱንꬃን ኣማኒዳ ጊሻሳ። ኢንቴ ዉሪካ ቤዪዛ ማላ ኢዚ ኩሜꬃ ፓፃ ዴሚዳይ ዬሱሳ ሱንꬃኒኔ ኢዛ ሱንꬃን ቤቲዛ ኣማኖና።

¹⁷ “ሃዒካ ታ ኢሻቶ! ኢንቴ ሄሳ ኦꬂዳይ ኢንቴ ሃላቃታ ማላ ኤሮንታ ጊዲዳይሳ ታ ኤራይስ።

¹⁸ ጊዲኮካ ኪርስቶሲ ዋዬ ኤካናይሳ ፆሲ ካሴ ናቤታ ዱናን ሃሳዪዳይሳ ፖሊዴስ።

¹⁹ ሄሳ ጊሽ ኢንቴ ናጋራይ ቁጬቲ ꬋያና ማላ ማሮቴꬃን ጌሊቴ። ኢንቴ ቢዛ ኦጌፔ ሲሚቴ፤ ጎዳ ማታፔ ኢንቴ ኦራፃና ዎዴይ ኢንቴስ ያና።

²⁰ ቃሴካ ፆሲ ካሴ ኢንቴስ ዶሪ ዎꬂዳ ዬሱስ ኪርስቶሳ ኢዚ ኢንቴስ ዬዳና።

²¹ ፆሲ ካሴ ጌሻ ናቤታ ዱናን ሃሳዪዳይሳ ማላ ሃኒዛይሳ ዉርሲ ኦራፂሳና ዎዴይ ጋካናስ ኢዚ ሳሎን ጋምዓናስ ኮሼስ።

²² ሙሴይካ ‘ኢንቴ ጎዳ ፆሳይ ኢንቴ ጊዶፌ ታ ማላ ናቤ ኢንቴስ ዴንꬃና። ኢዚ ኢንቴስ ዮቲዛይሳ ሲዪቴ።

²³ ሄ ናቤዛ ሲዮንታ ኢፂዳ ሼምፖይ ዉሪ ዴሬ ጊዶፌ ሻኬቲ ꬋዮ’

²⁴ “ቱማፔ ሳሜላፔ ሃ ሲሚን ዴንዲዳ ናቤቲ ዉሪ ሃይታ ዎዴታ ጊሽ ሃሳዪዳ።

²⁵ ኢንቴካ ናቤታ ናይታ። ቃሴካ ፆሲ ኣብራሃሜስ ‘ኔ ዜሬꬃን ቢታ ኣሲ ዉሪ ኣንጄታና’ ጊዲ ኢዚ ጫቂዳ ጫቆዛ ኢንቴ ላታና።

¹⁴ Geeshshanne xilloza inte kadidi shempo wodhizayssi birshettana mala woossideta.

¹⁵ De7o immizade inte wodhideta; gido attin Xoossi iza hayqoppe denthides; hessas nuni marka.

¹⁶ Hayssi inte beyizayssinne inte erizayssi minni eqqiday Yesusa sunthan ammanida gishassa. Inte wurikka beyiza mala izi kumeththa paxa demmiday Yesusa sunthaninne iza sunthan beettiza ammanona.

¹⁷ “Ha7ikka ta ishato! Inte hessa ooththiday inte halaqata mala eronta gididayssa ta erays.

¹⁸ Gidikkoka Kirstoosi waaye ekkanayssa Xoossi kase nabeta duunan haasayidayssa polides.

¹⁹ Hessa gish inte nagaray qucceti dhayana mala maarotethan gelite. Inte biza ogeppe simmite; Goda matappe inte ooraxana wodey intes yaana.

²⁰ Qasseka Xoossi kase intes doori woththida Yesus Kirstoosa izi intes yeddana.

²¹ Xoossi kase geeshsha nabeta duunan haasayidayssa mala hanizayssa wursi ooraxissana wodey gakkanaas izi salon gam7anas koshshees.

²² Museykka ‘Inte Goda Xoossay inte giddofe ta mala nabe intes denthana. Izi intes yootizayssa siyite.

²³ He nabeza siyonta ixida shempoy wuri dere giddofe shaaketi dhayo’

²⁴ “Tumappe Sameelappe ha simmin dendida nabeti wuri hayta wodeta gish haasayida.

²⁵ Inteka nabeta nayta. Qasseka Xoossi Abrahaames ‘Ne zerethan biitta asi wuri anjettana’ giidi izi caaqida caaqoza inte laattana.