ሃዋሬታ ኦሶ 2:12-37 in Gamo

¹² ዉሪካ ኬሂ ማላሌቲዲኔ ጋናዚ ꬋዪን ባ ጊዶን “ሃይሲ ኣዜሻ?” ጌቴቲዳ።

¹³ ባጋ ኣሳይ “ሃይቲ ዳሮ ዎይኔ ጫጄ ኡዪዳ” ጊዲ ኢስታ ቂꬊዳ።

¹⁴ ሄ ዎዴ ጴፅሮሲ ታማኔ ኢሲኔታራ ኤቂዲኔ ባ ቃላ ꬎቁ ሂስቲዲ ዴራስ ሂዝጊዴስ “ኢንቴኖ ዩሁዳ ኣሳቶ! ዬሩሳላሜን ዲዛይቶ! ኢንቴ ዉሪካ ሃይሳ ኢሲ ሚሽ ኤሪቴኔ ታ ጊዛይሳ ሲዪቴ።

¹⁵ ሃዒ ጋዴይ ዎንቲን ቡሮ ሄꬑ ሳቴ ጊዲዳ ጊሽ ኢንቴ ቆፒዛ ማላ ሃይቲ ኣሳቲ ማꬆቲቤቴና።

¹⁶ ጊዶ ኣቲን ሃይሲ ካሴ ናቤ ኢዩዔሌን ሂዝጊ ዮቴቲዳ ቃላይ ፖሌታናሳ፥

¹⁷ ‘ፆሲ ዉርሴꬃ ጋላስ ታ ኣያና ኣሾ ማይዒዳ ኡባ ቦላ ታ ጉሳና፤ ኢንቴ ማጫ ናይቲኔ ኢንቴ ኣቱማ ናይቲ ቲንቢቴ ሃሳያና፤ ዬላጋ ናይቲ ኣጁታ ቤያና፤ ጪማቲ ኣጉሞ ኣጉሜታና።

¹⁸ ሄ ዎዴ ታ ማጫ ኣሽካራታ ቦላኔ ታ ኣቱማ ኣሽካራታ ቦላ ታ ኣያናፔ ታ ጉሳና። ኢስቲካ ቲንቢቴ ሃሳያና።

¹⁹ ቦላ ሳሎን ማላሊሲዛ ሃኖታ ታ ቤሳና፥ ጋርሳ ሳዓን ማላታታ ታ ቤሳና፤ ሱꬂ፥ ታማይኔ ቱላላይ ሃናና።

²⁰ ጊታኔ ቦንቾ ጊዲዳ ጎዳ ጋላሲ ያናፔ ካሴቲዲ ኣዋ ኣርሼይ ꬉማና፤ ኣጊናይካ ሱꬅ ሚሳታና።

²¹ ጎዳ ሱንꬅ ፄይጊዛይ ዉሪ ኣታና’ ጊዴስ።

²² “ኢስራዔሌ ናይቶ! ሃይሳ ቃላ ሲዪቴ፤ ኢንቴ ኢንቴ ባጋራ ኤሪዛይሳ ማላ ኢንቴ ጊዶን ማላታኔ ኣሲ ሲዪ ኤሮንታ ሚሻታ ኢዛ ኩሼን ኦꬂዲ ፆሲ ናዚሬቴ ዬሱሳስ ማርካቲዴስ።

²³ ፆሲ ካሴ ባ ቃቺዳይሳ ኢዛስ ቤኒ ኤራቴꬃ ማላ ሃይሳዴ ኢንቴ ኩሼን ኣꬂ ኢሚዴስ። ኢንቴካ ኢታ ኣሳታ ኩሼን ካቄቲ ሃይቃና ማላ ኦꬂዴታ።

²⁴ ጊዶ ኣቲን ፆሲ ኢዛ ቦላፌ ሃይቆ ዎልቃ ዲጊዲ ሃይቆፔ ዴንꬂዴስ። ሃይቆይካ ኢዛ ኦይኪ ኣሻናስ ዳንዳይቤና።

²⁵ ዳዉቴይካ ኢዛ ጊሽ ‘ታኒ ጎዳ ኡባ ዎዴ ታ ሲንꬃን ቤያይስ፤ ኢዚ ታ ኡሻቻን ዴስ፤ ሙሌካ ሂርጊኬ።

²⁶ ሄሳ ጊሽ ታ ዎዝናይ ኡፋዬቴስ፤ ታ ዱናይካ ጋላቴስ፤ ታ ኣሾይ ኡፋይሳን ዳና።

²⁷ ኔ ታ ሼምፖዮ ዱፎን ኣጋካ፤ ኔ ና ጌሻዛ ዎቃና ማላ ኣጋጋካ።

²⁸ ኔ ዴዖ ኦጌ ታ ኤራና ማላ ኦꬃዳሳ። ኔ ታናራ ዲዛ ጊሽ ታ ኡፋይሳይ ኩሜꬃ’

²⁹ “ታ ኢሻቶ! ቤኒ ኣዋታፔ ዳዉቴይ ሃይቂ ሞጌቲዳይሳኔ ኢዛ ዱፎይ ሃች ጋካናስ ኑ ኣቻን ዲዛይሳ ባቦንታ ታ ኢንቴስ ዮታና ዳንዳዓይስ።

³⁰ ኢዚ ናቤ ጊዲዳ ጊሽ ፆሲ ኢዛ ዜሬꬃፌ ኢሳዴ ኢዛ ካዎቴꬃ ኣልጋ ቦላ ዎꬃናይሳ ካሴ ጫቆ ቃላን ዮቲዳይሳ ኤሪዴስ።

³¹ ሄሳ ካሴቲዲ ኤሪዳ ጊሺኔ ኢዛ ኣሾይ ዎቂ ዱፎን ኣቶንታ ዶሬቲዳ ኪርስቶሳ ዴንꬃ ጊሽ ሃሳዪዴስ።

³² ሄ ዬሱሳ ፆሲ ሃይቆፔ ዴንꬂዴስ። ኑካ ዉሪ ሃይሳስ ማርካታ።

³³ ሄሳ ጊሽ ኢዚ ፆሳ ኡሻቻን ꬎቁ ꬎቁ ጊዳፔ ጉዬ ፂሎ ኣያና ኡፋይሳ ባ ኣዋፔ ኤኪዲ ሃዒ ኢንቴ ቤዪዛይሳኔ ሲዪዛይሳ ዱጌ ጉሲዴስ።

³⁴ ዳዉቴይ ፑዴ ሳሎ ኬዚቤና፤ ኢዚ ባ ዱናን ‘ጎዳይ ታ ጎዳስ “ታ ኔ ሞርኬታ ኔ ቶሆ ጋርሳን ዬꬊሳና ጋካናስ ታ ኡሻቻን ኡታ” ጊዴስ።’

³⁶ “ሄሳ ጊሽ ፆሲ ኢንቴ ካቂዳ ዬሱሳ ጎዳኔ ኪርስቶሳ ሂስቲዳይሳ ኢስራዔሌ ኣሳይ ዉሪ ሎዔꬂ ኤሮ” ጊዴስ።

³⁷ ዴሬይ ሄሳ ሲዪዳ ማላ ዎዝናይ ቦሼቲዴስ። ጴፅሮሳኔ ሃንኮ ዬሱሲ ኪቲዳይታ “ኑ ኢሻቶ! ሂስቲን ኑ ኣይ ኦꬂኖ?” ጊዳ።

¹² Wurikka keehi malalettidinne gaanazi dhayin ba giddon “Hayssi aazeshaa?” geetettida.

¹³ Bagga asay “Hayti daro woyne cajje uyida” giidi ista qidhida.

¹⁴ He wode Phexroosi tammanne issinetara eqqidinne ba qaala dhoqu histidi deraas hizgides “Inteno Yuhuda asato! Yerusalamen dizayto! Inte wurikka hayssa issi miish eritenne ta gizayssa siyite.

¹⁵ Ha7i gadey wontin buro heedzdzu saate gidida gish inte qoppiza mala hayti asati mathotibeetenna.

¹⁶ Gido attin hayssi kase nabe Iyu7eelen hizgi yootetida qaalay poletanassa,

¹⁷ ‘Xoossi Wursetha gallas ta Ayana asho may7ida ubba bolla ta gussana; inte maca naytinne inte attuma nayti tinbite haasayana; yelaga nayti ajjuta beyana; Cimati agumo agumettana.

¹⁸ He wode ta maca ashkarata bollanne ta attuma ashkarata bolla ta Ayanappe ta gussana. Istika tinbite haasayana.

¹⁹ Bolla Salon malalisiza hanota ta bessana, garsa sa7an malatata ta bessana; suuthi, tamaynne tulalay hanana.

²⁰ Gitanne boncho gidida Goda gallassi yaanappe kasetidi awa arshey dhumana; Aginaykka suuth misatana.

²¹ Goda sunth xeygizay wuri attana’ gides.

²² “Isra7eele nayto! Hayssa qaala siyite; inte inte baggara erizayssa mala inte giddon malatanne asi siyi eronta miishata iza kushen ooththidi Xoossi Naazirete Yesusas markatides.

²³ Xoossi kase ba qachidayssa izas beni eratetha mala hayssade inte kushen aaththi immides. Inteka iita asata kushen kaqeti hayqqana mala ooththideta.

²⁴ Gido attin Xoossi iza bollafe hayqo wolqa diggidi hayqoppe denthides. Hayqoyka iza oykki ashshanas dandaybenna.

²⁵ Dawuteykka iza gish ‘Tani Goda ubba wode ta sinthan beyays; izi ta ushachan dees; mulekka hirgike.

²⁶ Hessa gish ta woznay ufayetees; ta duunaykka galatees; ta ashoy ufayssan daana.

²⁷ Ne ta shempoyo Duufon aggaka; ne naa geeshshaza wooqana mala aggaggakka.

²⁸ Ne de7o oge ta erana mala ooththadasa. Ne tanara diza gish ta ufayssay kumeththa’

²⁹ “Ta ishato! Beni aawatappe Dawutey hayqqi moogetiddayssanne iza duufoy hach gakkanaas nu achchan dizayssa babbonta ta intes yootana danda7ays.

³⁰ Izi nabe gidida gish Xoossi iza zerethafe issade iza kawoteththa alga bolla wothanayssa kase caaqo qaalan yootidayssa erides.

³¹ Hessa kasetidi erida gishshinne iza ashoy wooqi Duufon attonta doorettida Kirstoosa dentha gish haasayides.

³² He Yesusa Xoossi hayqoppe denthides. Nukka wuri hayssas markata.

³³ Hessa gish izi Xoossa ushachchan dhoqu dhoqu gidappe guye Xillo Ayana ufaysa ba aawappe ekkidi ha7i inte beyizayssanne siyizayssa duge gussides.

³⁴ Dawutey pude salo kezibenna; izi ba duunan ‘Goday ta Godas “Ta ne morketa ne toho garsan yedhissana gakkanaas ta ushachchan utta” gides.’

³⁶ “Hessa gish Xoossi inte kaqqida Yesusa Godanne Kirstoosa histidayssa Isra7eele asay wuri lo7ethi ero” gides.

³⁷ Derey hessa siyida mala woznay boshettides. Phexroosanne hanko Yesusi kiittidayta “Nu ishato! Histin nu ay ooththinoo?” gida.