ሃዋሬታ ኦሶ 2:1-26 in Gamo

¹ ጴንፃቆስቴ ጌቴቲዛ ባዓሌ ጋላሲ ጋኪዳ ዎዴ ኣሳይ ዉሪካ ኢሲ ሶን ሺቂ ዲሺን፤

² ቆፋይ ባይንዳ ዳሮ ሚኖ ጎቴ ጫርኮ ማላ ጊሪሲ ዪዴስ፤ ኣሳይ ዲዛ ኬꬃካ ኩሚዴስ።

³ ታማ ላጮ ኢንፃርሳ ማላይ ኣሳስ ቤቲዲ ሻኬቲ ሻኬቲ ኢሲ ኢሲ ኣሳ ቦላ ኡቲዴስ።

⁴ ኣማኒዛይቲ ዉሪ ፂሎ ኣያናን ኩሚዲ ኣያናይ ኢስታስ ሃሳያናስ ኢሚዳይሳ ኬና ሃራ ቃላራ ሃሳያ ኦይኪዳ።

⁵ ሄ ዎዴ ሳሎ ጉፋንꬆን ዲዛ ዴሬፔ ዪዳ ፆሳስ ባቢዛ ኣይሁዳቲ ዬሩሳላሜን ዴቴስ።

⁶ ሄ ጊሪሳ ሲይዲ ዴሬይ ሺቂዴስ። ኢሲ ኢሲ ኣሳይ ባ ቃላራ ሃሳዪዛይሳ ሲይዲ ማላሌቲዳ።

⁷ ማላሌቲዲኔ ጋናዚ ꬋዪን “ሃይቲ ሃሳዪዛይቲ ዉሪካ ጋሊላ ኣስ ዴቴኔ?

⁸ ሂስቲን ኑኒ ኑ ዬሌቲዳ ኑ ዴሬ ቃላራ ኢስቲ ሃሳዪሺን ዎስቲ ሲዪዞኒ?

⁹ ኑኒ ጳርቴና ኣሳይ፥ ሜዴ ኣሳይ፥ ኤላሜ ኣሳይ፥ ሜሶፖቶሚያን፥ ዩሁዳን፥ ቆጶዶቂያን፥ ጳንፆሳን፥ ኢሲያን፥

¹⁰ ፊርጊያን፥ ጲንፊሊያን፥ ጊብፄን፥ ቃሬና ኣቻን ዲዛ ሊቢያፔኔ ኦሮሜፔ ዪዳይቲ

¹¹ ኣይሁዳቲኔ ጌዴ ኣይሁዳቴꬃን ጌሊዳ ቃርፄሴ ኣሳኔ ኣራቤ ኣሳታ ጊዲሺን ፆሳ ዎልቃማ ኦሶዛ ሃይቲ ኑ ቃላራ ሃሳዪሺን ኑ ሲዮስ” ጊዳ።

¹² ዉሪካ ኬሂ ማላሌቲዲኔ ጋናዚ ꬋዪን ባ ጊዶን “ሃይሲ ኣዜሻ?” ጌቴቲዳ።

¹³ ባጋ ኣሳይ “ሃይቲ ዳሮ ዎይኔ ጫጄ ኡዪዳ” ጊዲ ኢስታ ቂꬊዳ።

¹⁴ ሄ ዎዴ ጴፅሮሲ ታማኔ ኢሲኔታራ ኤቂዲኔ ባ ቃላ ꬎቁ ሂስቲዲ ዴራስ ሂዝጊዴስ “ኢንቴኖ ዩሁዳ ኣሳቶ! ዬሩሳላሜን ዲዛይቶ! ኢንቴ ዉሪካ ሃይሳ ኢሲ ሚሽ ኤሪቴኔ ታ ጊዛይሳ ሲዪቴ።

¹⁵ ሃዒ ጋዴይ ዎንቲን ቡሮ ሄꬑ ሳቴ ጊዲዳ ጊሽ ኢንቴ ቆፒዛ ማላ ሃይቲ ኣሳቲ ማꬆቲቤቴና።

¹⁶ ጊዶ ኣቲን ሃይሲ ካሴ ናቤ ኢዩዔሌን ሂዝጊ ዮቴቲዳ ቃላይ ፖሌታናሳ፥

¹⁷ ‘ፆሲ ዉርሴꬃ ጋላስ ታ ኣያና ኣሾ ማይዒዳ ኡባ ቦላ ታ ጉሳና፤ ኢንቴ ማጫ ናይቲኔ ኢንቴ ኣቱማ ናይቲ ቲንቢቴ ሃሳያና፤ ዬላጋ ናይቲ ኣጁታ ቤያና፤ ጪማቲ ኣጉሞ ኣጉሜታና።

¹⁸ ሄ ዎዴ ታ ማጫ ኣሽካራታ ቦላኔ ታ ኣቱማ ኣሽካራታ ቦላ ታ ኣያናፔ ታ ጉሳና። ኢስቲካ ቲንቢቴ ሃሳያና።

¹⁹ ቦላ ሳሎን ማላሊሲዛ ሃኖታ ታ ቤሳና፥ ጋርሳ ሳዓን ማላታታ ታ ቤሳና፤ ሱꬂ፥ ታማይኔ ቱላላይ ሃናና።

²⁰ ጊታኔ ቦንቾ ጊዲዳ ጎዳ ጋላሲ ያናፔ ካሴቲዲ ኣዋ ኣርሼይ ꬉማና፤ ኣጊናይካ ሱꬅ ሚሳታና።

²¹ ጎዳ ሱንꬅ ፄይጊዛይ ዉሪ ኣታና’ ጊዴስ።

²² “ኢስራዔሌ ናይቶ! ሃይሳ ቃላ ሲዪቴ፤ ኢንቴ ኢንቴ ባጋራ ኤሪዛይሳ ማላ ኢንቴ ጊዶን ማላታኔ ኣሲ ሲዪ ኤሮንታ ሚሻታ ኢዛ ኩሼን ኦꬂዲ ፆሲ ናዚሬቴ ዬሱሳስ ማርካቲዴስ።

²³ ፆሲ ካሴ ባ ቃቺዳይሳ ኢዛስ ቤኒ ኤራቴꬃ ማላ ሃይሳዴ ኢንቴ ኩሼን ኣꬂ ኢሚዴስ። ኢንቴካ ኢታ ኣሳታ ኩሼን ካቄቲ ሃይቃና ማላ ኦꬂዴታ።

²⁴ ጊዶ ኣቲን ፆሲ ኢዛ ቦላፌ ሃይቆ ዎልቃ ዲጊዲ ሃይቆፔ ዴንꬂዴስ። ሃይቆይካ ኢዛ ኦይኪ ኣሻናስ ዳንዳይቤና።

²⁵ ዳዉቴይካ ኢዛ ጊሽ ‘ታኒ ጎዳ ኡባ ዎዴ ታ ሲንꬃን ቤያይስ፤ ኢዚ ታ ኡሻቻን ዴስ፤ ሙሌካ ሂርጊኬ።

²⁶ ሄሳ ጊሽ ታ ዎዝናይ ኡፋዬቴስ፤ ታ ዱናይካ ጋላቴስ፤ ታ ኣሾይ ኡፋይሳን ዳና።

¹ Phenxaqoste geetettiza ba7aale gallassi gakkida wode asay wurikka issi soon shiiqi dishin;

² qofay baynda daro mino gote carko mala giirissi yides; asay diza keeththakka kumides.

³ Tama laco inxarsa malay asas beettidi shaaketi shaaketi issi issi asa bolla uttides.

⁴ Ammanizayti wuri Xillo Ayanan kumidi Ayanay istas haasayanas immidayssa keena hara qaalara haasaya oykkida.

⁵ He wode salo gufanthon diza dereppe yida Xoossas babbiza Ayhudati Yerusalamen deettes.

⁶ He giirissa siydi derey shiiqides. Issi issi asay ba qaalara haasayizayssa siydi malalettida.

⁷ Malaletidinne gaanazi dhayin “Hayti haasayizayti wurikka Galila as deettenee?

⁸ Histin nuni nu yeletida nu dere qaalara isti haasayishin wosti siyizonii?

⁹ Nuni Pharteena asay, Meede asay, Eelaame asay, Mesopotoomiyan, Yuhudan, Qophodooqiyan, Phanxoosan, Iisiyan,

¹⁰ Firgiyan, Phinfiliyan, Gibxen, Qareena achchan diza Liibiyappenne Oroomeppe yidayti

¹¹ Ayhudatinne gede Ayhudatethan gelida Qarxeese asanne Araabe asata gidishin Xoossa wolqama oosoza hayti nu qaalara haasayishin nu siyoos” gida.

¹² Wurikka keehi malalettidinne gaanazi dhayin ba giddon “Hayssi aazeshaa?” geetettida.

¹³ Bagga asay “Hayti daro woyne cajje uyida” giidi ista qidhida.

¹⁴ He wode Phexroosi tammanne issinetara eqqidinne ba qaala dhoqu histidi deraas hizgides “Inteno Yuhuda asato! Yerusalamen dizayto! Inte wurikka hayssa issi miish eritenne ta gizayssa siyite.

¹⁵ Ha7i gadey wontin buro heedzdzu saate gidida gish inte qoppiza mala hayti asati mathotibeetenna.

¹⁶ Gido attin hayssi kase nabe Iyu7eelen hizgi yootetida qaalay poletanassa,

¹⁷ ‘Xoossi Wursetha gallas ta Ayana asho may7ida ubba bolla ta gussana; inte maca naytinne inte attuma nayti tinbite haasayana; yelaga nayti ajjuta beyana; Cimati agumo agumettana.

¹⁸ He wode ta maca ashkarata bollanne ta attuma ashkarata bolla ta Ayanappe ta gussana. Istika tinbite haasayana.

¹⁹ Bolla Salon malalisiza hanota ta bessana, garsa sa7an malatata ta bessana; suuthi, tamaynne tulalay hanana.

²⁰ Gitanne boncho gidida Goda gallassi yaanappe kasetidi awa arshey dhumana; Aginaykka suuth misatana.

²¹ Goda sunth xeygizay wuri attana’ gides.

²² “Isra7eele nayto! Hayssa qaala siyite; inte inte baggara erizayssa mala inte giddon malatanne asi siyi eronta miishata iza kushen ooththidi Xoossi Naazirete Yesusas markatides.

²³ Xoossi kase ba qachidayssa izas beni eratetha mala hayssade inte kushen aaththi immides. Inteka iita asata kushen kaqeti hayqqana mala ooththideta.

²⁴ Gido attin Xoossi iza bollafe hayqo wolqa diggidi hayqoppe denthides. Hayqoyka iza oykki ashshanas dandaybenna.

²⁵ Dawuteykka iza gish ‘Tani Goda ubba wode ta sinthan beyays; izi ta ushachan dees; mulekka hirgike.

²⁶ Hessa gish ta woznay ufayetees; ta duunaykka galatees; ta ashoy ufayssan daana.