ሃዋሬታ ኦሶ 28:3-23 in Gamo

³ ጳዉሎሲ ኣፊራ ጊዛ ሚꬂ ሺሺዲ ታማን ጉጂን ታማ ሴላፔ ዴንዲዳይሳን ሾሺ ኬዚዲ ኢዛ ኩሼ ቦላ ፃፄቲዴስ።

⁴ ማልታ ኣሳይ ሾሺ ጳዉሎሳ ኩሼ ቦላ ፃፄቲዳይሳ ቤዪዲ “ሃይሲ ኣዴዚ ሼምፖ ዎꬊዳዴ፤ ጋሶይካ ኣባ ዳምባላፔካ ኢዚ ኣቲዲ ዪኮካ ፒርዲዛ ፆሳፌ ኬሲ ኤኪዲ ፓፃ ዳና ዳንዳይቤና” ጊዲ ባ ጊዶን ሃሳዬቲዳ

⁵ ጳዉሎሲ ቃስ ሾሻ ዱጌ ታማን ቆቆፍ ዬጊዲ ኣይኮካ ሃኒቤና።

⁶ ኣሳይካ “ኣይዴፔ ኣይዴ ኢዛ ኣሳቴꬃይ ኪፃኔሻ፤ ዎይኮ ቆፖንታ ኩንዲዲ ሃይቃና” ጊዲ ናጊዴስ፤ ጊዶ ኣቲን ኢስቲ ዳሮ ዎዴ ናጊሺን ኢዛ ቦላ ኣይኮይኔ ሃኖንታይሳ ቤዪዲ ባ ቆፋ ላሚዲ “ሃይሲ ኣዴዚ ፆሳ!” ጊዴስ።

⁷ ሄ ኑ ዲዛሶ ማታን ኣባ ጊዶን ዲዛ ዴሬዮ ኣይሲዛ ፑፑልዮሳ ጌቴቲዛዴስ ጋዴይ ዴስ፤ ሄ ኣዴዚ ኑና ሞኪ ኤኪዲ ባሶን ሄꬑ ጋላስ ጋካናስ ሎዔꬂ ኢማቲዴስ።

⁸ ሄን ፑፑልዮሳ ኣዋ ሚሻይኔ ጉሶ ሃርጌይ ሳኪን ኢቺዲ ዴስ፤ ጳዉሎሲ ኢዛኮ ጌሊዲ ኢዛስ ዎሲዴሲኔ ኢዛ ቦላ ባ ኩሼ ዎꬂዲ ፓꬂዴስ።

⁹ ሄሲ ሄሳꬆ ሃኒዳፔ ጉዬ ሄ ዴሬይን ዲዛ ሃራ ሃርጋንቻቲ ዪዲ ፓፂዳ።

¹⁰ ኣሳይካ ኑስ ዳሮ ሚሽ ኤሂዲ ኑና ቦንቺዛይሳ ኑና ቤሲዳ፤ ኑ ማርካቤን ባና ዴንዲን ኑስ ኮሺዛይሳ ማርካቤን ዉርሲ ጫኒዳ።

¹¹ ኑ ሚሊፂኔን ሄꬑ ኣጊና ጋምዒዳፔ ጉዬ ባልጎይ ኣꬋና ጋካናስ ኣባ ጊዶን ዲዛ ዴሬዪን ጋምዒዲ ኢስኪንዲሪያፔ ዪዛ ማርካቤን ጌሊዲ ባና ዴንዲዶስ፤ ሄ ማርካቤዛ ቦላ ዲዮሲቆሮሳ ጌቴቲዛ ናምዑ ሜንቴ ኤቃታ ሚሲሌይ ዴስ።

¹² ጌዴ ሲራኩሴ ጌቴቲዛ ካታማ ጋኪዲ ሄን ሄꬑ ጋላስ ጋምዒዶስ።

¹³ ሄፔ ኣባ ቦላራ ቢዲ ሬጊዮሜ ጌቴቲዛ ካታማ ጋኪዶስ፤ ሄን ኢሲ ጋላስ ኣቂዲ ዱጌ ባጋራ ዪዛ ጫርኮይ ጫርኪዳ ጊሽ ናምዓንꬆ ጋላስ ፑቲዮሎሴ ጌቴቲዛሶ ቢዶስ።

¹⁴ ሄን ኣማኒዛይታ ዴሚዲ ኢስታራ ኑ ላፑን ጋላስ ጋካናስ ኡታና ማላ ኑና ዎሲዳ። ሄፔ ቃሴ ኦሮሜ ቢዶስ።

¹⁵ ኦሮሜን ዲዛ ኣማኒዛ ኣሳይ ኑ ጊሽ ሲይዲ ኣፒዮሴ ጌቴቲዛ ጊያኔ “ሄꬑ ኣቆሶታ” ጌቴቲዛሶ ጋካናስ ኑና ሞካና ዪዳ፤ ጳዉሎሳይካ ኢስታ ቤዪዲ ፆሴ ጋላቲዴሲኔ ሚኔቲዴስ።

¹⁶ ኑኒ ኦሮሜ ጌሊዳ ዎዴ ጳዉሎሳ ናጋናስ ኢሲ ዎታዳራይ ኢዛስ ኢሜቲን ጳዉሎሲ ባርካ ዳና ማላ ኢዛስ ፊቃዴይ ኢሜቲዴስ።

¹⁷ ሄꬑ ጋላሳፌ ጉዬ ጳዉሎሲ ኦሮሜን ዲዛ ኣይሁዳታፔ ጊታ ኣሳታ ባኮ ፄይጊሲዴስ፤ ኢስቲካ ኢዛኮ ሺቂን “ታ ኢሻቶ! ታኒ ኢስራዔሌ ዴሬ ቦላኔ ኑ ኣዋታ ዎጋ ቦላ ኦꬂዳ ኢሲ ቆሆይካ ዴና፤ ጊዶ ኣቲን ዬሩሳላሜን ታና ቃቺዲ ኦሮሜ ኣሳታስ ኣꬂ ኢሚዳ።

¹⁸ ኦሮሜ ኣሳቲ ታና ቆሪ ኦይቺዳፔ ጉዬ ታና ሃይቆስ ጋꬂዛ ሚሽ ዴሞንታ ኣጊዳ ጊሽ ቢርሺ ዬዳና ኮይዳ።

¹⁹ ጊዶ ኣቲን ኣይሁዳ ኣሳይ ታ ቦላ ኢሲ ዎሶይ ባይንዳ ዬዴቶንታ ማላ ኤቄቲን ታ ዮዖይ ቄሳሬ ሲንꬅ ሺቂዲ ቤቶ ጋናስ ታስ ጊዴ ጊዲዴስ። ጊዶ ኣቲን ታኒ ታ ዴሬታ ሞቲዛ ጋሶይ ታስ ዴና።

²⁰ ታ ቃስ ሃዒ ኢንቴና ፄይጊሲዳይ ኢንቴና ቤያናሲኔ ሃኖ ኢንቴስ ዮታናሳ። ሃይሳ ሳንሳላታን ታኒ ቃሼቲዳይ ኢስራዔሌ ናይታስ ኢሜቲዳ ኡፋይሳ ጋሶና” ጊዴስ።

²¹ ኢስቲካ ኢዛስ “ኔ ጊሽ ዩሁዳ ዴሬፔ ፃፌቲዳ ዴቢዳቤይ ኑና ጋኪቤና። ሃ ዪዳ ኣሳታፔ ኦኒካ ኔ ጊሽ ኢታ ሃሳዪዳይ ባዋ።

²² ሃይሳ ኔ ካሊዛ ኣማኖዛ ጊሽ ኣዋንካ ኣሳይ ኢታ ሃሳዪዛይሳ ኑ ኤሮስ። ሄሳ ጊሽ ኔ ቆፋይ ኣዛኮኔ ኑ ሲያና ኮዮስ” ጊ ዛሪዳ።

²³ ባሬ ኢዛስ ኢሚዲ ሃራ ጋላስ ኩሼ ኩሚዲ ኢዚ ዲዛ ኬꬄ ዪዳ። ኢዚካ ማላዶፔ ኦማርስ ጋካናስ ፆሳ ካዎቴꬃ ጊሽ ማርካቴꬃን ባ ቆፋ ኢስታስ ቆንጪሲዴስ። ሙሴ ዎጋፔኔ ናቤታ ማፃፋታፔ ፃቃሲ ፃቃሲ ዬሱሳ ጊሽ ኢስታስ ቆንጪሲ ዮቲዴስ።

³ Phawuloosi afira giza mithi shiishshidi taman gujin tama seelappe dendidayssan shooshi kezidi iza kushe bolla xaaxxetides.

⁴ Malta asay shooshi Phawuloosa kushe bolla xaaxxetidayssa beyidi “Hayssi addezi shempo wodhidade; gaasoyka abba dambalappekka izi attidi yikkokka pirdiza Xoossafe kessi ekkidi paxa daana dandaybenna” giidi ba giddon haasayettida

⁵ Phawuloosi qas shoosha duge taman qoqof yeggidi aykkokka hanibenna.

⁶ Asaykka “Aydeppe ayde iza asatethay kixxanesha; woykko qopponta kundidi hayqqana” giidi naagides; gido attin isti daro wode naagishin iza bolla aykkoynne hanontayssa beyidi ba qofa lammidi “Hayssi addezi xoossa!” gides.

⁷ He nu dizaso matan abba giddon diza dereyo ayssiza Puppulyoosa geetettizades gadey dees; he addezi nuna mokki ekkidi bason heedzdzu gallas gakkanaas lo7ethi imattides.

⁸ Heen Puppulyoosa aawa miishaynne guso hargey sakkin ichchidi dees; Phawuloosi izakko gelidi izas woossidessinne iza bolla ba kushe woththidi pathides.

⁹ Hessi hessatho hanidappe guye he dereyn diza hara harganchati yiidi paxida.

¹⁰ Asaykka nuus daro miish ehidi nuna bonchizayssa nuna bessida; nu markaben baana dendin nuus koshshizayssa markaben wursi caanida.

¹¹ Nu Milixinen heedzdzu agina gam7idappe guye balgoy aadhdhana gakkanaas abba giddon diza dereyin gam7idi Iskindiriyappe yiza markaben gelidi baana dendidos; he markabeza bolla Diyossiqoroosa geetettiza nam7u mente eeqata misiley dees.

¹² Gede Sirakuuse geetettiza katama gakkidi heen heedzdzu gallas gam7idos.

¹³ Heeppe abba bollara biidi Regiyoome geetettiza katama gakkidos; heen issi gallas aqidi duge baggara yiza carkoy carkida gish nam7antho gallas Puttiyoloose geetettizaso bidos.

¹⁴ Heen ammanizayta demmidi istara nu laapun gallas gakkanaas uttana mala nuna woossida. Heeppe qasse Oroome bidos.

¹⁵ Oroomen diza ammaniza asay nu gish siydi Apiyoose geetettiza giyanne “Heedzdzu Aqosota” geetettizaso gakkanaas nuna mokkana yida; Phawuloosaykka ista beyidi Xoosse galatidessinne minetides.

¹⁶ Nuni Oroome gelida wode Phawuloosa naaganas issi wotadaray izas imettin Phawuloosi barka daana mala izas fiiqadey imettides.

¹⁷ Heedzdzu gallassafe guye Phawuloosi Oroomen diza Ayhudatappe gita asata baako xeygisides; istika izakko shiiqin “Ta ishato! Tani Isra7eele dere bollanne nu aawata woga bolla ooththida issi qohoykka deenna; gido attin Yerusalamen tana qachidi Oroome asatas aaththi immida.

¹⁸ Oroome asati tana qori oychidappe guye tana hayqos gaththiza miish demmoonta aggida gish birshi yeddana koyda.

¹⁹ Gido attin Ayhuda asay ta bolla issi wosoy baynda yeddetonta mala eqqettin ta yo7oy Qeesare sinth shiiqidi beetto gaanas taas gidde gidides. Gido attin tani ta dereta mootiza gaasoy taas deenna.

²⁰ Ta qas ha7i intena xeygisiday intena beyanassinne hanno intes yootanassa. Hayssa sansalatan tani qashetiday Isra7eele naytas imettida ufaysa gaasonna” gides.

²¹ Istika izas “Ne gish Yuhuda dereppe xaafetida debiddabbey nuna gakkibeenna. Ha yida asatappe oonikka ne gish iita haasayiday baawa.

²² Hayssa ne kaalliza ammanoza gish awanka asay iita haasayizayssa nu eroos. Hessa gish ne qofay azakkonne nu siyana koyoos” gi zaarida.

²³ Bare izas immidi hara gallas kushe kumidi izi diza keeththe yida. Izikka maladoppe omars gakkanaas Xoossa Kawoteththa gish markatethan ba qofa istas qoncisides. Muse wogappenne nabeta maxaafatappe xaqasi xaqasi Yesusa gish istas qoncisi yootides.