ሃዋሬታ ኦሶ 27:4-41 in Gamo

⁴ ሄፔ ዴንዲ ኑ ቢሺን ሲንꬃ ባጋራ ጫርኮይ ኑ ቦላ ጫርኪዛ ጊሽ ኣባ ጊዶን ዲዛ ቆጲሮሴ ዴሬን ጌሜቲዲ ጌዴ ሲንꬄ ቢዶስ።

⁵ ኪልቂያ ጊዛሶኔ ጲንፊሊያ ጌቴቲዛ ዴሬ ኣቻን ዲዛ ኣባ ፒኒዲ ሎቂያ ዴሬን ዲዛ ሙራ ጌቴቲዛ ካታማ ጋኪዶስ።

⁶ ሄን ማቶ ሃላቃይ ኢፃሊያ ዴሬ ቢዛ ኢስኪንዲሪያ ዴሬ ማርካቤ ዴሚዲ ኑና ኢዛን ጌልꬂዴስ።

⁷ ዳሮ ጋላስ ሎዱ ጊ ጊ ቢዲ ዳሮ ዋዬቲዲ ቃንዶሴ ጌቴቲዛ ካታማ ኣቺ ጋኪዶስ፤ ጫርኮይካ ኑ ሲንꬅ ቦንታ ማላ ዲጊን ሳልሞና ኣቻራ ኣꬊዲ ቃርፄሴ ጌቴቲዛ ኣባ ጊዶን ዲዛ ዴሬን ጌሜቲዲ ቢዶስ።

⁸ ዳሮ ዋዬቲዲ ላንቄ ላንቄ ኦይኪ ኑ ኣꬊዳፔ ጉዬ ላሲያ ጌቴቲዛ ካታማ ኣቻን ዲዛ “ሎዖ” ጌቴቲዛ ማርካቤይ ኤቂዛሶ ጋኪዶስ።

⁹ ኑ ቢዛ ኦጌ ቦላ ዳሮ ዳቡራን ፆማ ዎዴይ ኣꬊዳ ጊሽ ሃዒ ኣባ ቦላ ባናስ ዳሮ ሜቶ ጊዲዳ ጊሽ ጳዉሎሲ ባናራ ዲዛ ኣሳይ ናጌታና ማላ ሂዝጊዴስ፤

¹⁰ “ኣሶ! ሃይሳፌ ኑ ካሊዲ ባና ቡሳይ ዳሮ ሜቶራ ዲዛይሲ ታስ ቤቴስ፤ ማርካቤዛን ዲዛ ጫናዛ ቦላኔ ማርካቤዛ ቦላ ፃላላ ጊዶንታ ኣሳ ሼምፖ ቦላካ ጊታ ቆሆይ ጋካና።”

¹¹ ማቶ ሃላቃይ ቃስ ጳዉሎሳ ዞሬፔ ቦላራ ማርካቤዛ ላጊዛ ዋናዚኔ ማራካቤዛ ጎዳይ ጊዛይሳ ሲይዴስ።

¹² ሄ ማርካቤይ ኤቂዛሶይ ባልጎይ ኣꬋና ጋካናስ ማርካቤስ ሎዖ ሼምፖሶ ጊዶንታ ጊሽ ዳሪዛ ባጋ ኣሳይ “ሃሙꬃ ሲንꬅ ጉጃናስ ዳንዳዬቲኮ ኣዋ ኣርሼይ ዉሊዛሶፔ ዱጌሃ ባጋራኔ ፑዴሃ ባጋራ ዲዛ ፊንቄ ጌቴቲዛሶ ቃርፄሴ ማርካቤ ሼምፖሶ ኑ ጋኪዲ ባልጎ ሄን ኣꬆስ” ጊዲ ባ ቆፋ ሺሺዳ።

¹³ ዱጌሃ ባጋራ ጉꬃ ጫርኮይ ጫርኪሺን ቤዪዲ ኢስቲ ቆፒዳ ማላ ሃናና ሚሳቲን ባና ኬዚዳ፤ ማርካቤይ ኤቂዛሶፔ ባና ዴንዲዲ ቃርፄሴ ኣቻራ ላንቄ ላንቄ ኦይኪዲ ኣꬊ ቢዳ።

¹⁴ ጊዶ ኣቲን ጉꬃ ዎዴፔ ጉዬ “ኣዋ ኣርሼይ ሞኪዛሶፔ ፑዴሃፔ ዪዛ ጎቴ ጫርኮ” ጌቴቲዛ ኢታ ዎልቃማ ጫርኮይ ኣባ ጊዶን ዲዛ ዴሬዪፔ ዴንዲዲ ኢስታኮ ኣባ ጊዶ ዪዴስ።

¹⁵ ማርካቤዛ ጫርኮይ ሱጊን ጫርካራ ኤቄታናስ ዳንዳዮንታ ኢፂን ኑ ጮዑ ጊዲ ጫርኮይ ኤፊዛሶ ቢዶስ።

¹⁶ ቄዳ ጌቴቲዛ ኣባ ጊዶንኮ ዲዛ ዴሬ ዲዛሪን ጌሜቲዲ ኑ ቢሺን ዳሮ ዋዬቲዲ ማርካቤዛ ቄሪ ዎጎሎዪን ኦይኪዲ ኤሳናስ ዳንዳዪዶስ።

¹⁷ ማርካቤዛ ላጊዛይቲ ቄሪ ዎጎሎዮ ማርካቤዛኮ ጎቺ ኬሲዲ ማርካቤዛ ዎዶሮራ ፃፂዳ። ማርካቤዚካ ሲርቲሴ ጌቴቲዛ ኣባ ኣጬይ ዳሪ ዲዛሶን ኩንዶንታ ማላ ባቢዲ ኢዛ ቦላ ዲዛ ሻራ ዎꬂዲ ጫርኮን ላጌቲ ቢዳ።

¹⁸ ጎቴ ጫርኮይ ሚኒ ቢዳ ጊሽ ዎንቴꬃ ጋላስ ማርካቤዛን ጫኔቲዳ ሚሻታ ኢሳ ኢሳ ኣባ ጊዶ ዬጌꬅ ኦይኪዳ።

¹⁹ ሄꬓንꬆ ጋላስ ማርካቤዛስ ኮሺዛ ሚሻታካ ባ ኩሼራ ኬሲ ኬሲ ዬጊዳ።

²⁰ ዳሮ ዎዴ ጋካናስ ኣዋ ኣርሼካ ፆሊንቴካ ቤዮንታ ኣጊዳ ጊሺኔ ጫርኮይካ ካሴፔ ሚኒ ሚኒ ቢዛ ጊሽ ሃይሳፌ ጉዬ ኑ ኣታና ዳንዳዮኮ ጊዛ ቆፋን ኡፋይስ ቃንፂዶስ።

²¹ ኣሳይ ካꬅ ሞንታ ዳሮ ጋላስ ኡቲዴስ። ሄሳ ጊሽ ጳዉሎሲ ኣሳ ጊዶን ኤቂዲ “ሃ ኣሳቶ! ኢንቴ ታ ጊዛይሳ ሲይዲ ቃርፄሴፔ ዴንዶንታኮ ሃ ቆሆይኔ ሃ ꬋዮይ ኢንቴ ቦላ ጋኬናኮሺን።

²² ሃዒካ ማርካቤዚ ፃላ ቆሄታና ኣቲን ኢንቴፌ ኢሳዴ ሼምፖይካ ꬋዬና። ሄሳ ጊሽ ኣይኮይ ባዋ፤ ባቦፍቴ ጋዳ ኢንቴና ዞራይስ።

²³ ቃማ ኦማርስ ታ ኢዛስ ጊዲዳ ታ ጎይኒዛ ፆሳይ ኪቲዳ ኪታንቻይ ታ ኣቻን ኤቂዲ

²⁴ ‘ጳዉሎሳ! ባቦፋ! ኔ ቄሳሬ ሲንꬃን ኤቃና ቤሴስ፤ ሄኮ ኔናራ ኢሲፌ ቢዛይታ ዉርሲ ፆሲ ኔ ጊሽ ሃይቆፔ ኣሻና’ ጊዲ ታስ ዮቲዴስ።

²⁵ ሄሳ ጊሽ ኢንቴኖ ሃ ኣሳቶ ኣይኮይ ባዋ፤ ፆሲ ታስ ሃይሳ ዮቲዳይሳ ፖላናይሳ ታ ኣማናይስ።

²⁶ ጊዲኮካ ሃይሲ ጎቴ ጫርኮዚ ጌዴ ኢሲ ኣባ ጊዶን ዲዛ ዴሬ ኣቺ ኤፊዲ ኑና ዬጋና” ጊዴስ።

²⁷ ታማኔ ኦይዳንꬆ ቃማ ኣንዲሪያ ኣባ ጊዶን ጫርኮይ ኑና ዋይሲሺን ቢሼ ሌላ ጊዶꬅ ማርካቤዛ ላጊዛይታስ ኣባፌ ቢታ ቦላ ጋኪዳ ሚሳቲዴስ።

²⁸ ሄሳ ጊሽ ኣባ ጪማቴꬂ ኤራናስ ኣባን ዬጊ ፄሊዛ ዎዶሮ ኢስቲ ዬጊ ፄሊሺን፤ ኣባ ጪማቴꬂ ኦይዱ ታሙ ሜትሬ ኬና ጊዲ ቤቲዴስ፤ ጋምዒሼ ሃዒካ ዬጊን ሄꬑ ታሙ ሜትሬ ኬና ጪማ ጊዲዳይሳ ዴሚዳ።

²⁹ ኑ ዲዛ ማርካቤይ ኣባ ጋፃን ዲዛ ዛላ ሹቻራ ኢጬቶንታ ማላ ባቢዲ ማርካቤዛፔ ጉዬ ባጋራ ማርካቤይ ቃፆንታ ማላ ናጊዛ ꬊሺኬ ዱጌ ኣባ ጊዶ ዬጊዳ። ሄሳፌ ጉዬ ኢስታስ ቃማይ ዎንታና ማላ ዎሳ ኦይኪዳ።

³⁰ ማርካቤዛ ላጊዛይቲ ማርካቤዛፔ ኬዚዲ ባቃታና ኮይዳ ጊሽ ማርካቤዛፔ ሲንꬃ ባጋራ ማርካቤ ናጊዛ ꬊሺኬ ዬጊዛ ሚሳቲዲ ማርካቤዛ ቦላ ዲዛ ቄሪ ዎጎሎዮ ዱጌ ኣባ ጊዶ ዬጊዳ።

³¹ ሄሳ ዎዴ ጳዉሎሲ ማቶ ሃላቃኔ ዎታዳራታ “ሃይቲ ማርካቤዛን ዲዛ ኣሳቲ ማርካቤዛ ቦላ ሼምፒዲ ኡቶንታ ኣጊኮ ኢንቴካ ኣታና ዳንዳዬኬታ” ጊዴስ።

³² ሄሳ ጊሽ ዎታዳራቲ ዎጎሎዮ ኦይኪዳ ዎዶሮዛ ቃንፂ ዬጊን ኢዛ ኣባ ቦላ ቶኬታና ማላ ዬዲ ኣጊዳ።

³³ ጋዴይ ዎንታና ጊሺን ዉሪካ ካꬅ ማና ማላ ጳዉሎሲ ኢስታ ሂዝጊ ዎሲዴስ “ኢንቴ ኣዚ ሃናኔሻ ጊዲ ሂርጋን ካꬅ ሞንታ ኣጊን ሃቺ ታማኔ ኦይዳንꬆ ጋላሳ።

³⁴ ሄሳ ጊሽ ኢንቴ ካꬅ ማና ማላ ታ ኢንቴና ዎሳይስ። ኢንቴ ሚኮ ሚናና፤ ሙሌካ ኣይኮ ቆሆይካ ኢንቴ ቦላ ጋኬና” ጊዴስ።

³⁵ ኢዚ ሄሳ ጊዳፔ ጉዬ ካꬅ ኤኪዲ ፆሴ ጋላቲዲ ኣሳ ኡባ ሲንꬃን ካꬂ ሙስ ኦይኪዴስ።

³⁶ ሄሳ ዎዴ ዉሪካ ሚኔቲዲ ካꬅ ሚዳ።

³⁷ ማርካቤዛ ጊዶን ዲዛ ኣሳይ ዉሪ ናምዑ ፄታኔ ላፑን ታማኔ ኡሱፑና።

³⁸ ዉሪካ ሚ ካሊዳፔ ጉዬ ማርካባን ጫኔቲዳ ጊስቴዛ ዱጌ ኣባ ጊዶ ዬጊዲ ማርካቤዛ ዴፆ ካዉሺዳ።

³⁹ ጋዴይ ዎንቲን ባ ዲዛሶ ኤሪቤቴና። ጊዶ ኣቲን ኣጬይ ዲዛሶ ኣባ ኩርቁንꬁ ዴሚዳ። ኢስታስ ዳንዳዬቲዛኮ ማርካቤዛ ሄ ሱጊ ሺሻና ቆፒዳ።

⁴⁰ ማርካቤዛ ኦይኪዛ ꬊሺኬ ቃንፂዲ ኣባ ጊዶ ዬጊዳ። ሄ ዎዴ ማርካቤ ላጊዛ ሚሻ ኦይኪዳ ዎዶሮታ ቢርሺዳ። ሃ ባጋራ ዲዛ ሻራ ጫርኮ ባጋ ꬎቁ ሂስቲዲ ኬዛና ኣባ ጋፃ ቢዳ።

⁴¹ ጊዶ ኣቲን ማርካቤዚ ዳሮ ኣጬይ ኮሬቲ ኡቲዳይሳራ ኢጬቲዲ ዱጌ ጉፋኒዴስ፤ ሲንꬃ ቦላ ዱጌ ጉፋኒ ꬊሺኬቲዲ ቃፆንታይሳ ጊዲዴስ። ቃስ ኣባ ዳምባላይ ዳሮፔ ዴንዲዳይሳን ጉዬ ባጋራ ሜቄሬቴꬅ ኦይኪዴስ።

⁴ Heeppe dendi nu bishin sintha baggara carkoy nu bolla carkiza gish abba giddon diza Qophiroose deren gemmetidi gede sinthe bidos.

⁵ Kilqiya gizasonne Phinfiliya geetettiza dere achchan diza abba pinnidi Looqiya deren diza Muura geetettiza katama gakkidos.

⁶ Heen mato halaqay Ixaaliya dere biza Iskindiriya dere markabe demmidi nuna izan gelthides.

⁷ Daro gallas loddu gi gi biidi daro waayetidi Qandoose geetettiza katama achchi gakkidos; carkoykka nu sinth boonta mala diggin Salmoona achchara aadhdhidi Qarxeese geetettiza abba giddon diza deren gemettidi bidos.

⁸ Daro waayetidi lanqe lanqe oykki nu aadhdhidappe guye Laasiya geetettiza katama achchan diza “Lo7o” geetettiza markabey eqqizaso gakkidos.

⁹ Nu biza oge bolla daro daaburan xooma wodey aadhdhida gish ha7i abba bolla baanas daro meto gidida gish Phawuloosi banara diza asay naagettana mala hizgides;

¹⁰ “Aso! Hayssafe nu kaallidi baana buussay daro metora dizayssi taas bettes; markabezan diza caanaaza bollanne markabeza bolla xalala gidonta asa shempo bollaka gita qohoy gakkana.”

¹¹ Mato halaqay qas Phawuloosa zoreppe bollara markabeza laaggiza waannazinne marakabeza goday gizayssa siydes.

¹² He markabey eqqizasoy balgoy aadhdhana gakkanaas markabes lo7o shemposo gidonta gish dariza bagga asay “Hammutha sinth gujjanas dandayettikko awa arshey wullizasoppe dugeha baggaranne pudeha baggara diza Finqe geetettizaso Qarxeese markabe shemposo nu gakkidi balgo heen aaththoos” giidi ba qofa shiishida.

¹³ Dugeha baggara guuththa carkoy carkishin beyidi isti qoppida mala hanana misatin baana kezida; markabey eqqizasoppe baana dendidi Qarxeese achchara lanqe lanqe oykkidi aadhdhi bida.

¹⁴ Gido attin guuththa wodeppe guye “Awa arshey mokizasoppe pudehappe yiza gote carko” geetettiza iita wolqama carkoy abba giddon diza dereyippe dendidi istako abba giddo yides.

¹⁵ Markabeza carkoy sugin carkara eqqeettanas dandayonta ixin nu co7u giidi carkoy efizaso bidos.

¹⁶ Qeedda geetettiza abba giddonko diza dere dizaarin geemettidi nu bishin daro waayetidi markabeza qeeri wogoloyin oykkidi essanas dandayidos.

¹⁷ Markabeza laagizayti qeeri wogoloyo markabezako goochchi kessidi markabeza wodorora xaaxida. Markabezikka Sirtise geetettiza abba accey dari dizason kundonta mala babbidi iza bolla diza shara woththidi carkon laageti bida.

¹⁸ Gote carkoy minni bida gish wontetha gallas markabezan caanettida miishata issa issa abba giddo yegeth oykkida.

¹⁹ Heedzdzantho gallas markabezas koshshiza miishataka ba kushera kessi kessi yeggida.

²⁰ Daro wode gakkanaas awa arsheka xoolinteka beyonta aggida gishshinne carkoyka kaseppe minni minni biza gish hayssafe guye nu attana dandayokko giza qofan ufays qanxidos.

²¹ Asay kath moonta daro gallas uttides. Hessa gish Phawuloosi asa giddon eqqidi “Ha asato! Inte ta gizayssa siydi Qarxeeseppe dendontakko ha qohoynne ha dhayoy inte bolla gakkenakkoshin.

²² Ha7ikka markabezi xalla qohettana attin intefe issade shempoykka dhayenna. Hessa gish aykkoy baawa; babbofte gaada intena zorays.

²³ Qamma omars ta izas gidida ta goynniza Xoossay kiittida kiitanchay ta achchan eqqidi

²⁴ ‘Phawuloosa! Babbofa! ne Qeesare sinthan eqqana bessees; hekko nenara issife bizayta wursi Xoossi ne gish hayqoppe ashshana’ giidi taas yootides.

²⁵ Hessa gish inteno ha asato aykkoy baawa; Xoossi taas hayssa yootidayssa polanayssa ta ammanays.

²⁶ Gidikkoka hayssi gote carkozi gede issi abba giddon diza dere achchi efidi nuna yeggana” gides.

²⁷ Tammanne oydantho qamma Andiriya Abba giddon carkoy nuna waayssishin bishe leela giddoth markabeza laaggizaytas abbafe biitta bolla gakkida misatides.

²⁸ Hessa gish abba ciimmateththi eranas abban yeggi xeelliza wodoro isti yeggi xeellishin; abba ciimmateththi oyddu tammu metre keena gidi beettides; gam7ishe Ha7ikka yeggin heedzdzu tammu metre keena ciimma gididayssa demmida.

²⁹ Nu diza markabey abba gaxan diza zaalla shuchchara icetonta mala babbidi markabezappe guye baggara markabey qaaxonta mala naagiza dhishikke duge abba giddo yeggida. Hessafe guye istas qamay wontana mala woossa oykkida.

³⁰ Markabeza laagizayti markabezappe kezidi baqatana koyda gish markabezappe sintha baggara markabe naagiza dhishikke yeggiza misatidi markabeza bolla diza qeeri wogoloyo duge abba giddo yeggida.

³¹ Hessa wode Phawuloosi mato halaqanne wotadarata “Hayti markabezan diza asati markabeza bolla shempidi uttonta aggikko inteka attana dandayekketa” gides.

³² Hessa gish wotadarati wogoloyo oykkida wodoroza qanxi yeggin iza abba bolla tokkettana mala yeddi aggida.

³³ Gadey wontana gishin wurikka kath maana mala Phawuloosi ista hizgi woossides “Inte aazi hananesha giidi hirgan kath moonta aggin hachchi tammanne oydantho gallasa.

³⁴ Hessa gish inte kath maana mala ta intena woossays. Inte miikko minnana; mulekka aykko qohoykka inte bolla gakkenna” gides.

³⁵ Izi hessa gidappe guye kath ekkidi Xoosse galatidi asa ubba sinthan kathi muus oykkides.

³⁶ Hessa wode wurikka minetidi kath mida.

³⁷ Markabeza giddon diza asay wuri nam7u xeetanne laapun tammanne usuppuna.

³⁸ Wurikka mi kaallidappe guye markaban caanettida gisteza duge abba giddo yeggidi markabeza deexo kawushshida.

³⁹ Gadey wontin ba dizaso eribeetenna. Gido attin accey dizaso abba kurqunthu demmida. Istas dandayettizakko markabeza he sugi shishshana qoppida.

⁴⁰ Markabeza oykkiza dhishikke qanxidi abba giddo yeggida. He wode markabe laggiza miisha oykkida wodorota birshida. Ha baggara diza shaara carko bagga dhoqu histidi kezana abba gaxa bida.

⁴¹ Gido attin markabezi daro accey koretti uttidayssara icetidi duge gufannides; sintha bolla duge gufanni dhishikketidi qaaxontayssa gidides. Qas abba dambalay daroppe dendidayssan guye baggara meqereteth oykkides.