ሃዋሬታ ኦሶ 21:3-26 in Gamo

³ ኣባ ጊዶን ዲዛ ቆጲሮሴ ጌቴቲዛ ዴሬፔ ሃዲርሳ ባጋን ዬጊዲ ሶሪያ ጌቴቲዛ ዴሬ ቢዲ ፂሮሴ ጌቴቲዛ ኣባ ኣቻን ዲዛ ዴሬ ቢዶስ፤ ሄሳስ ጋሶይ ማርካቤያ ባ ጫኔቲዳ ጫና ሄን ዎꬃናስ ኮሺዛ ጊሻሳ።

⁴ ሄን ኣማንዛይታ ኮዪ ዴሚዲ ኢስታራ ላፑን ጋላስ ጋምዒዶስ፤ ኢስቲካ ፂሎ ኣያና ካሌꬆን ጳዉሎሳ “ዬሩሳላሜ ቦፓ” ጊዲ ዮቲዳ።

⁵ ኑ ሄን ጋምዓና ዎዴይ ዉሪን ኢስታፌ ሻኬቲዲ ኑ ኦጌ ቢዶስ። ኢስቲ ዉሪ ባ ማቼታራኔ ባ ናይታራ ኢሲፌ ካታማፔ ካሬ ኬዛና ጋካናስ ኑና ሞዪዚዳ፤ ኣባ ኣቻን ኑ ዉሪ ጉልባቲዲ ዎሲዳፔ ጉዬ ዴንዲዲ ኢሶይ ኢሳራ ሳሮኬቲዲ ሻኬቲዶስ።

⁶ ሄሳፌ ጉዬ ኑ ማርካቤን ጌሊን ኢስቲ ጌዴ ባሶ ሲሚዳ።

⁷ ኑ ፂሮሴፔ ዴንዲዲ ጌዴ ጲፂላማይሴ ጌቴቲዛሶ ጋኪዶስ። ሄንካ ኣማኒዛ ኣሳራ ጋጊዲ ሳሮኬቲዲ ሄን ኢስታ ኣቻን ኢሲ ጋላስ ጋምዒዶስ።

⁸ ዎንቴꬃ ጋላስ ሄፔ ኬዚዲ ቂሳሪያ ጌቴቲዛሶ ቢዶስ፤ ቂሳሪያን ላፑን ዳቆኔታፔ ኢሳ ዎንጌላዌ ጲልጶሳሶ ጌሊዲ ኢዛ ኣቻን ሼምፒዶስ።

⁹ ኢዛስ ናቤ ጊዲዳ ኦይዱ ጌሎንታ ጌላዖ ናይቲ ዴቴስ።

¹⁰ ዳሮ ጋላስ ኑ ሄን ጋምዒን ኢሲ ኣጋቦሳ ጌቴቲዛ ናቤይ ዩሁዳ ዴሬፔ ዪዴስ።

¹¹ ሄ ናቤይ ኑኮ ሺቂዲኔ ጳዉሎሳ ዳንጮ ኤኪዲ ባ ቶሆኔ ባ ኩሼ ቃቺዲ “ፂሎ ኣያናይ ሃይሳ ዳንጫ ጎዳ ዬሩሳላሜን ዲዛ ኣይሁዳ ኣሳቲ ሃይሳꬆ ቃቺዲ ኣይዛቤታስ ኣꬂ ኢማና ጌስ” ጊዴስ።

¹² ሄሳ ሲይዲ ኑካ ኑናራ ዲዛ ኣሳይካ ጳዉሎሲ ዬሩሳላሜ ቦንታ ማላ ዎሲዶስ።

¹³ ቃስ ጳዉሎሲ “ኢንቴ ኣይሲ ዬኪ ዬኪዲ ታ ዎዝና ኣዛስ ሜንꬄቲ? ታኒ ጎዳ ዬሱሳ ሱንꬃ ጊሽ ዬሩሳላሜን ቃሾ ፃላላ ጊዶንታ ሃይቃናስካ ጊጌታዲስ” ጊዴስ።

¹⁴ ኢዚ ኑ ዞሬ ኤኮንታ ኢፂን “ሂስቲኮ ጎዳ ሼኔይ ሃኖ” ጊዲ ኣጋጊዶስ።

¹⁵ ኑ ሄን ጉꬃ ጋላሳታ ጋምዒዳፔ ጉዬ ኑ ሚሼ ዉርሲ ጊጊሲዲ ኤኪ ዬሩሳላሜ ቢዶስ።

¹⁶ ቂሳሪያን ዲዛ ኢሲ ኢሲ ኣማንዛይቲ ኑናራ ኢሲፌ ዪዳ፤ ኢስቲካ ኑኒ ሚናሶኔ ኬꬃን ዳና ማላ ኑና ኢዛሶ ካሌꬂዳ፤ ሚናሶኒ ካሴቲዲ ኣማኒዳ ቆጲሮሴ ዴሬ ኣሳ።

¹⁷ ኑ ዬሩሳላሜ ጋኪዳ ማላ ኣማንዛይቲ ኑና ኡፋይሳን ሞኪ ኤኪዳ።

¹⁸ ዎንቴꬃ ጋላስ ጳዉሎሲ ኑናራ ያቆቤኮ ቢዴስ፤ ሄ ዎዴ ዎሳ ኬꬃ ጪማቲ ሄን ዴቴስ።

¹⁹ ጳዉሎሲ ኣሳ ዉርሲ ሳሮꬂዳፔ ጉዬ ፆሲ ኢዛ ባጋራ ኣይዛቤታ ጊዶን ኦꬂዳይሳ ዉርሲ ኢሲኖ ኣሾንታ ዮቲዴስ።

²⁰ ሄሳ ሲይዲ ኣሳይ ዉሪ ፆሴ ጋላቲዴስ፤ ጳዉሎሲካ “ኑ ኢሻዞ ዳሮ ሺያን ቆዴቲዛ ኣማኒዛይቲ ኣይሁዳታ ጊዶን ዲዛይሳኔ ዉሪካ ሙሴ ዎጋ ዎዝናፔ ናጊዛይታ ጊዲዳይሳ ኔካ ኤራሳ።

²¹ ኔኒ ኣይዛቤታ ጊዶን ዲዛ ኣይሁዳታ ‘ኢንቴ ናይታ ቃፃሮፒቴ ዎይኮ ዎጋታ ኦꬆፍቴ ጋዳ ኔ ታማርሲዳ ኣሳይ ሙሴ ዎጋ ሻራና ማላ ኦꬄስ ጊዛ ዎሬ ኣሳይ ሲይዴስ።

²² ሂስቲን ሃዒ ኣዜ ሎዖይ? ሃዒ ኔ ዩሳ ኣሳይ ሲዮንታ ኣጌና።

²³ ሄሳ ጊሽ ኑ ኔና ጊዛይሳ ኦꬃ፤ ኑ ኣቻን ታሳላ ጋꬃና ዪዳ ኦይዱ ኣሳቲ ዴቴስ።

²⁴ ኔ ኢስታ ኔናራ ኤካዳ ኢስታራ ጊዳዳ ኔና ጌሻ፤ ኣሳቲ ባ ሁዔ ሜዴታና ማላኔ ፆሳ ኬꬃን ኢሜቲዛ ሙፁዋታ ሚሻ ኔ ኢስታስ ቃንፃ፤ ኔ ሄሳꬆ ኦꬂኮ ኔ ቦላ ዎሬቲዳይሲ ዉሪ ሜላ ጊዲዳይሳኔ ኔካ ሙሴ ዎጋ ፖላ ናጊዛዴ ጊዲዳይሳ ኣሳይ ዉሪ ኤራና።

²⁵ ሂንኮ ኣይዛቤታፔ ኣማኒዳይታ ጊሽ ጊዲኮ ‘ኤቃስ ሹኬቲዲ ቱኒዳይሳ ሞፒቴ፥ ሱꬂካ ኡዮፒቴ፥ ባዉታ ሃይቂዳ ሜሄ ኣሾ ሞፒቴ፥ ላይማፌ ሃኪቴ’ ጊዲ ጪማቲ ቃቺዳ ቃላ ዳብዳቤ ፃፊዲ ኑ ኢስታስ ዬዲዶስ።”

²⁶ ሄሳፌ ጉዬ ጳዉሎሲ ሄ ኦይዱ ኣሳታ ባናራ ኤኪዲ ዎንቴꬃ ጋላስ ኢስታራ ባና ጌሺዴስ፤ ኢስቲ ጌዪዛ ጋላሳቲ ኣፑን ጋላሲኮኔ ኢሳዴ ኢሳዴ ጊሽ ኢሜቲዛ ሚሽ ኢሚዛ ዎዴይ ኣይዴኮኔ ኤሪሳናስ ፆሳ ኬꬄ ጌሊዴስ።

³ Abba giddon diza Qophiroose geetettiza dereppe hadirsa baggan yeggidi Sooriya geetettiza dere biidi Xiroose geetettiza abba achchan diza dere bidos; hessas gaasoy markabeya ba caanettida caana heen wothanas koshshiza gishassa.

⁴ Heen ammanzayta koyi demmidi istara laappun gallas gam7idos; istika Xillo Ayana kaalethon Phawuloosa “Yerusalame booppa” giidi yootida.

⁵ Nu heen gam7ana wodey wurin istafe shaaketidi nu oge bidos. Isti wuri ba machetaranne ba naytara issife katamappe kare kezana gakkanaas nuna moyizida; abba achchan nu wuri gulbatidi woossidappe guye dendidi issoy issara saroketidi shaaketidos.

⁶ Hessafe guye nu markaben gelin isti gede baso simmida.

⁷ Nu Xirooseppe dendidi gede Phixilamaysse geetettizaso gakkidos. Henka ammaniza asara gaggidi saroketidi heen ista achchan issi gallas gam7idos.

⁸ Wontetha gallas heeppe kezidi Qisaariya geetettizaso bidos; Qisaariyan laapun daaqonetappe issa wongelaawe Philphoosaso gelidi iza achchan shempidos.

⁹ Izas nabe gidida oyddu gelonta geella7o nayti deettes.

¹⁰ Daro gallas nu heen gam7in issi Agaboossa geetettiza nabey Yuhuda dereppe yides.

¹¹ He nabey nuukko shiiqidinne Phawuloosa danco ekkidi ba tohonne ba kushe qachidi “Xillo Ayanay hayssa dancaa goda Yerusalamen diza Ayhuda asati hayssatho qachidi Ayzaabetas aaththi immana gees” gides.

¹² Hessa siydi nukka nunara diza asaykka Phawuloosi Yerusalame boonta mala woossidos.

¹³ Qas Phawuloosi “Inte aysi yeekki yeekkidi ta wozna aazas menthetii? Tani Goda Yesusa suntha gish Yerusalamen qasho xalala gidonta hayqqanaska giigetadis” gides.

¹⁴ Izi nu zore ekkonta ixin “Histikko Goda sheney hano” giidi aggagidos.

¹⁵ Nu heen guuththa gallassata gam7idappe guye nu miishe wursi giigissidi ekki Yerusalame bidos.

¹⁶ Qisaariyan diza issi issi ammanzayti nunara issife yida; istika nuni Minasoone keeththan daana mala nuna izaso kaalethida; Minasooni kasetidi ammanida Qophiroose dere asa.

¹⁷ Nu Yerusalame gakkida mala ammanzayti nuna ufayssan mokki ekkida.

¹⁸ Wontetha gallas Phawuloosi nunara Yaqoobekko bides; he wode Woosa Keeththa cimati heen deettes.

¹⁹ Phawuloosi asa wursi sarothidappe guye Xoossi iza baggara Ayzaabeta giddon ooththidayssa wursi issino ashshonta yootides.

²⁰ Hessa siydi asay wuri Xoosse galatides; Phawuloosikka “Nu ishazo daro shiyan qoodetiza ammanizayti Ayhudata giddon dizayssanne wurikka Muse woga woznappe naagizayta gididayssa nekka eraasa.

²¹ Neni Ayzaabeta giddon diza Ayhudata Inte nayta qaxxaroppite woykko wogata ooththofte gaada ne tamarsida asay Muse woga shaarana mala ooththes giza wore asay siydes.

²² Histin ha7i aaze lo7oy? Ha7i ne yuussa asay siyonta aggenna.

²³ Hessa gish nu nena gizayssa ooththa; nu achchan tasala gaththana yida oyddu asati deettes.

²⁴ Ne ista nenara ekkada istara gidada nena geeshsha; asati ba hu7e meedettana malanne Xoossa Keeththan imettiza muxuwata miisha ne istas qanxa; ne hessatho ooththikko ne bolla woretidayssi wuri mela gididayssanne nekka Muse woga pola naagizade gididayssa asay wuri erana.

²⁵ Hinko Ayzaabetappe ammanidayta gish gidikko ‘Eeqqas shukettidi tunidayssa mooppite, suuthika uyoppite, bawuta hayqqida mehe asho mooppite, laymafe haakkite’ giidi cimati qachida qaala dabdaabe xaafidi nu istas yeddidos.”

²⁶ Hessafe guye Phawuloosi he oyddu asata banara ekkidi wontetha gallas istara bana geeshshides; isti geeyiza gallassati aapun gallassikkonne issade issade gish imettiza miish immiza wodey aydekkonne erisanas Xoossa Keeththe gelides.