ሃዋሬታ ኦሶ 19:1-11 in Gamo

¹ ኣጲሎሲ ቆሮንቶሴን ዲዛ ዎዴ ጳዉሎሲ ፑዴሃ ባጋ ዴሬራ ካንꬂዲ ኤፌሶኔ ዪዲ ሄን ዲዛ ኢሲ ኢሲ ኣማኒዛ ኣሳታ ዴሚዲ

² “ኢንቴ ኣማኒዳ ዎዴ ፂሎ ኣያና ኤኪዴቲ?” ጊዴስ፤ ኢስቲካ “ኤኪቤይኮ ሃራይ ኣቶሺን ፂሎ ኣያናይ ዲዛኮኔ ኑ ሲቤይኮ” ጊዳ።

³ ጳዉሎሲካ ኢስታ “ሂስቲን ኢንቴ ኣዛን ፃማቄቲዴቲ?” ጊዴስ፤ ኢስቲካ ኢዛስ “ዮሃኒሳ ፂንቃታን ፃማቄቲዶስ” ጊዳ።

⁴ ጳዉሎሲካ ኢስታስ “ዮሃኒሳ ፂንቃታይ ጊዲኮ ኣሳይ ማሮቴꬃን ሲሚዳይሳ ቤሲዛ ፂንቃታኮ! ዮሃኒሲ ባ ባጋራ ኣሳይ ኢዛፔ ጉዬራ ዪዛ ዬሱሳ ኣማናና ማላ ዮቲዴስ” ጊዴስ።

⁵ ኢስቲካ ሄሳ ሲዪዳፔ ጉዬ ጎዳ ዬሱሳ ሱንꬃን ፃማቄቲዳ።

⁶ ጳዉሎሲካ ኢስታ ቦላ ባ ኩሼ ዎꬂዳ ማላ ፂሎ ኣያናይ ኢስታ ቦላ ዎꬊን ኢስቲ ዱማ ዴሬታ ቃላራ ሃሳዪዳ፤ ቲንቢቴካ ዮቲዳ።

⁷ ሄ ኣሳቲ ዉሪካ ታማኔ ናምዑ ጊዲዛይታ።

⁸ ጳዉሎሲ ኣይሁዳታ ዎሳ ኬꬄ ጌሊዲ ፆሳ ካዎቴꬃ ጊሽ ሃሳዬቲሼኔ ኢስታ ኣማንꬂሼ ሄꬑ ኣጊና ኩሜꬅ ኦናስካ ባቦንታ ኣሳስ ቆንጪሲ ዮቲዴስ።

⁹ ኢሲ ኢሲ ኣሳይ ፓላማ ፂንዒ ጊዲ ኣማናናስ ኮይቤና፤ ጎዳ ኦጌ ቆንጬን ኢፂዳ፤ ሄሳ ጊሽ ጳዉሎሲ ኢስታ ኣጊዲ ሃራሶ ቢዴስ፤ ኣማኒዛይታካ ዱማ ሻኪ ኬሲዲ ፂራኖሴ ቲሚርቴ ኬꬃን ጋላስ ጋላስ ኢስታራ ሃሳዬቲዴስ።

¹⁰ ሄሳ ማላ ኦሶን ናምዑ ላይꬅ ጋምዒዳ ጊሽ ኢሲያ ኣዉራጃን ዲዛ ኣይሁዳቲኔ ጊሪኬ ኣሳይ ዉሪ ጎዳ ቃላ ሲያና ዳንዳዪዴስ።

¹¹ ፆሲ ጳዉሎሳ ባጋራ ዳሮ ማላሊሲዛ ማላታ ኦꬂዴስ።

¹ Aphilossi Qorontoosen diza wode Phawuloosi pudeha bagga derera kanthidi Efesoone yiidi heen diza issi issi ammaniza asata demmidi

² “Inte ammanida wode Xillo Ayana ekkideti?” gides; Istika “Ekkibeykko haray attoshin Xillo Ayanay dizaakkonne nu sibeykko” gida.

³ Phawuloosikka ista “Histin inte aazan xammaqetidetii?” gides; Istika izas “Yohannisa xinqatan xammaqetidos” gida.

⁴ Phawuloosikka istas “Yohannisa xinqatay gidikko asay maarotethan simmidayssa bessiza xinqatakko! Yohannisi ba baggara asay izappe guyera yiza Yesusa ammanana mala yootides” gides.

⁵ Istika hessa siyidappe guye Goda Yesusa sunthan xammaqetida.

⁶ Phawuloosikka ista bolla ba kushe woththida mala Xillo Ayanay ista bolla wodhdhin isti dumma dereta qaalara haasayida; tinbitekka yootida.

⁷ He asati wurikka tammanne nam7u gidizayta.

⁸ Phawuloosi Ayhudata Woosa Keeththe gelidi Xoossa Kawoteththa gish hasayettishenne ista ammanthishe heedzdzu agina kumeth oonaska babbonta asaas qoncisi yootides.

⁹ Issi issi asay palama xin7i giidi ammananas koybenna; Goda oge qonccen ixida; hessa gish Phawuloosi ista aggidi haraso bides; ammanizaytaka dumma shaakki kessidi Xiranoose timirte keeththan gallas gallas istara haasayettides.

¹⁰ Hessa mala ooson nam7u layth gam7ida gish Iisiya awurajjan diza Ayhudatinne Girike asay wuri Goda qaala siyana dandayides.

¹¹ Xoossi Phawuloosa baggara daro malalisiza malata ooththides.