ሃዋሬታ ኦሶ 17:1-25 in Gamo

¹ ጳዉሎሲኔ ሲላሲ ኣንፊጶላኔ ኣጶሎኒያ ጌቴቲዛ ዴሬራ ኣꬊዲ ታሶሎንቄ ጌቴቲዛ ዴሬ ቢዳ። ሄንካ ኣይሁዳታ ዎሳ ኬꬂ ዴስ።

² ጳዉሎሲካ ኢዛስ ዶሴ ጊዲዳ ማላ ኣይሁዳታ ዎሳ ኬꬄ ጌሊዴስ። ሄꬑ ሳሚንታ ኩሜꬅ ቃላፔ ኤኪ ኤኪ ኢስታራ ሃሳዬቲዴስ።

³ ኪርስቶሲ ዋዬ ኤካናሲኔ ሃይቂ ዴንዳናስ ቤሲዛይሳ ቆንጪሲ ኣማንꬆን “ሃይሲ ታ ሳባኪዛ ዬሱሲ ኢዚ ኪቴቲ ያና ጌቴቲዳይሳኮ!” ጊዴስ።

⁴ ኣይሁዳታፔ ኢሲ ኢሲ ኣሳይ ባ ሲዪዳይሳ ኣማኒዲ ጳዉሎሳራኔ ሲላሴራ ኢሲፌ ጊዲዴስ። ቃሴካ ዳሮ ዴሬይ ፆሴ ባቢዛ ጊሪኬታፔ ዳሮ ኤሬቲዳ ማጫሳቲ ባ ሲዪዳ ቃላን ኣማኒዲ ኢስታራ ኢሲኖ ጊዲዳ።

⁵ ኣይሁዳቲ ቃሴ ኢስታ ቃናቲዲ ጊያን ዲዛ ዎርዶ ኣሳታ ሺሺዲ ኩሜꬃ ዴሬዛ ኢስታ ቦላ ዴንꬄꬂዲ ካታማን ሺሮ ሜꬊዳ። ጳዉሎሳኔ ሲላሴ ሺሺዲ ዴራ ሲንꬃን ኤሳናስ ኢሲ ኢያሶኔ ጌቴቲዛይሳሶ ኮያናስ ኤሌሊ ቢዳ።

⁶ ጊዶ ኣቲን ኢስታ ኢያሶኔ ኬꬃን ዴሞንታ ኣጊዳ ጊሽ ኢያሶኔኔ ሃራ ኣማኒዛ ኣሳታ ካታማ ዳናታ ሲንꬃራ ጎቺሼ “ሃይቲ ኣሳቲ ዴሬ ዉርሲ ቡልዓኪ ካዒሼ ጋምዒዲ ቃሴ ሃዒ ሃ ዪዳ።

⁷ ኢያሶኔይካ ኢስታ ባ ኬꬃን ዎꬂዴስ። ሃይቲ ኣሳቲ ዉሪ ‘ዬሱሳ ጌቴቲዛ ሃራ ካዎይ ዴስ’ ጊዲ ቄሳሬ ዎጋ ኤኬቴና” ጊሼ ዋሲዳ።

⁸ ዴሬይኔ ሄ ካታማ ዳናቲ ሄሳ ሲይዲ ባ ጊዶን ቡቄቲዳ።

⁹ ኢያሶኔኔ ሃራታካ ዋሴ ፄይጊሲዲ ዬዲዳ።

¹⁰ ኣማኒዛይቲ ሄራካ ጳዉሎሳኔ ሲላሴ ቃማራ ቤሪያ ዬዲዳ። ኢስቲካ ሄ ጋኪዳ ማላ ኣይሁዳታ ዎሳ ኬꬄ ጌሊዳ።

¹¹ ቤሪያ ኣሳይ ታሶሎንቄ ኣሳፔ ኣꬊዲ ኣኬካራ ዲዛ ኣሳ። ጋሶይካ ሃይሲ ዮዖዚ ቱሜሻ? ጊ ጊዲ ጌኤሻ ማፃፋታ ቃላ ዎንቲን ዎንቲን ፒልጊ ፄሊዲ ኡፋይሳን ኤኪዴስ።

¹² ሄሳ ጊሽ ኢስታፌ ዳሮ ኣሳይ ኣማኒዴስ። ቃሴካ ኢስታራ ቆዳን ዳሮቲ ቦንቼቲዳ ጊሪኬ ዴሬ ማጫሳቲኔ ኣዴቲካ ኣማኒዳ።

¹³ ታሶሎንቄን ዲዛ ኣይሁዳ ኣሳቲ ጳዉሎሲ ፆሳ ቃላ ቤሪያንካ ሳባኪዛይሳ ኤሪዳ ማላ ዴሬዛ ዴንꬄꬃናስ ቃሴካ ጌዴ ኢስታኮ ቢዳ።

¹⁴ ሄ ዎዴ ኣማንዛይቲ ጳዉሎሳ ኤሌሲዲ ጌዴ ኣባ ኣቺ ዬዲዳ። ሲላሲኔ ፂምቶሲ ሄን ኣቲዳ።

¹⁵ ጳዉሎሳ ሞዪዚዳ ኣሳቲ ኢዛ ኣቴና ጋꬂዳ። ቃሴካ ሲላሲኔ ፂምቶሲ ኢዛኮ ኤሌሊ ጋካና ማላ ጊዛ ኪታ ጳዉሎሳፔ ኤኪዲ ሲሚዳ።

¹⁶ ጳዉሎሲ ኣቴናን ኢስታ ናጊሺን ኣቴና ካታማን ኤቃቲ ኩሚዳይሳ ቤዪዲ ዳሮ ሼኔቲዴስ።

¹⁷ ሄሳ ጊሽ ኣይሁዳታ ዎሳ ኬꬃን ኣይሁዳታራኔ ፆሳስ ያዪዛ ጊሪኬ ኣሳራ ቃሴካ ጊያይ ዲዛሶን ጋላስ ጋላስ ባናራ ጋጊዛ ኣሳራ ሃሳዬቲዴስ።

¹⁸ ኤፊቆሮሴኔ ኢስቶይኮ ጌቴቲዛ ኤራንቻታ ባጋ ጊዲዳይቲ ጳዉሎሳኮ ሺቂዲ ኢዛራ ሃሳዬቲዳ ኢስታፌ ኢሲ ኢሲ ኣሳቲ “ሃይሲ ሎምዑ ሎምዓይ ኣይ ጋና ኮዪዜ?” ጊዳ። ባጋቲ ቃሴ ዬሱሳ ጊሺኔ ሃይቆፔ ኢዛ ዴንꬃ ሚሺራቾ ኢዚ ሳባኪሺን ሲይዲ “ሄይሲ ሃራ ኦራꬃ ኤቃታ ጊሽ ዮቲዛ ሚሳቴስ” ጊዳ።

¹⁹ ኢዛ ኦይኪዲ ኣሪኦስፋጎሴ ጌቴቲዛ ዴሬ ዱላታ ሲንꬅ ኤፊዲ “ሃ ኔ ታማርሲዛ ኦራꬃ ቲሚርቴይ ኣዛኮኔ ኑ ኤራና ማላ ኔ ኮያይ?” ጊዳ።

²⁰ ቃሴ ኔ ኑና ኑ ሃይꬃን ሲሲዛ ዮዖይ ኑ ኤሮንታ ኦራꬅ ጊዲዳ ጊሽ ኢዚ ኣዛኮኔ ኑ ኤራና ኮዮስ።

²¹ ኣቴና ኣሳይ ኩሜꬅ ቃሴካ ሃን ዲዛ ሃራ ዴሬ ኣሳይካ ባስ ዎዴ ኣꬃናስ ኦራꬃ ዮዖ ሃሳያኒኔ ሲሳን ኣቲን ሃራ ሚሻን ኣꬄቴና።

²² ሄሳ ጊሽ ጳዉሎሲ ኣሪዮስፋጎሴ ጌቴቲዛ ዱላታን ሺቂዳ ዴሬዛ ሲንꬃን ኤቂዲ “ሃይቶ ኣቴና ኣሳቶ! ኢንቴ ቤቶ ሚሽ ዉርሲ ኣማኒዛይታ ጊዲዳይሳ ታ ቤያይስ።

²³ ታ ያኔ ሃ ዩዪሺን ኢንቴ ኢስታስ ጎይኒዛ ሚሻታ ታ ፄሊሺን ‘ኤሬቶንታ ፆሴ’ ጌቴቲ ፃፌቲዳይሳ ኢሲ ያርሾሶ ዴማዲስ፤ ሄሳ ጊሽ ሄሳ ኢንቴ ኤሮንታ ጎዪኒዛይሳ ታ ኢንቴና ኤሪሳና።

²⁴ ሃይሳ ኣላሜዛኔ ኢዛ ጊዶንካ ዲዛይሳ ዉርሲ ሜꬊዳ ፆሲ ኢዚ ሳሎኔ ሳዓ ጎዳ። ሄሳ ጊሽ ኢዚ ኣሳ ኩሼን ኬፄቲዳ ኬꬃን ዴና።

²⁵ ኢዚ ኣሳ ኡባስ ዴዖኔ ሼምፖ፤ ቃሴካ ሃራ ዉርሲ ኢሚዛይሳ ጊዲዳ ጊሽ ኢዛስ ፓጪዛዚ ዶንታ ጊሽ ኢዚ ኣሳ ኩሼፔ ማዶ ኤኬና።

¹ Phawuloosinne Sillassi Anfiphoolanne Apholooniya geetettiza derera aadhdhidi Tasolonqe geetettiza dere bida. Henka Ayhudata Woosa Keeththi dees.

² Phawuloosikka izas dose gidida mala Ayhudata Woosa Keeththe gelides. Heedzdzu saaminta kumeth qaalappe ekki ekki istara haasayettides.

³ Kirstoosi waaye ekkanassinne hayqqi dendanas bessizayssa qoncisi ammanthon “Hayssi ta sabakiza Yesusi izi kiitetti yaana geetettidayssakko!” gides.

⁴ Ayhudatappe issi issi asay ba siyidayssa ammanidi Phawuloosaranne Sillasera issife gidides. Qasseka daro derey Xoosse babbiza Giriketappe daro eretida macasati ba siyida qaalan ammanidi istara issino gidida.

⁵ Ayhudati qasse ista qanatidi giyan diza wordo asata shiishshidi kumetha dereza ista bolla dentheththidi kataman shiro medhdhida. Phawuloosanne Sillase shiishshidi deraa sinthan essanas issi Iyaasoone geetettizayssaso koyanas elleli bida.

⁶ Gido attin ista Iyasoone keeththan demmoonta aggida gish Iyaasoonenne hara ammaniza asata katama daannata sinthara goochchishe “Hayti asati dere wursi bul7akki ka7iishe gam7idi qasse ha7i ha yida.

⁷ Iyaasooneyka ista ba keeththan woththides. Hayti asati wuri ‘Yesusa geetettiza hara kawoy dees’ giidi Qeesare woga ekketenna” gishe waassida.

⁸ Dereynne he katama daannati hessa siydi ba giddon buqqettida.

⁹ Iyaasoonenne harataka waase xeygisidi yeddida.

¹⁰ Ammanizayti heerakka Phawuloosanne Sillase qammara Beeriya yeddida. Istika he gakkida mala Ayhudata Woosa Keeththe gelida.

¹¹ Beeriya asay Tasolonqe asaappe aadhdhidi akeekara diza asa. Gaasoyka hayssi yo7ozi tumeshaa? gi giidi Geeeshsha Maxaafata qaala wontin wontin pilgi xeelidi ufayssan ekkides.

¹² Hessa gish istafe daro asay ammanides. Qasseka istara qoodan daroti bonchettida Girike dere macasatinne addetikka ammanida.

¹³ Tasolonqen diza Ayhuda asati Phawuloosi Xoossa qaala Beeriyanka sabakizayssa erida mala dereza dentheththanas qasseka gede istako bida.

¹⁴ He wode ammanzayti Phawuloosa ellesidi gede abba achchi yeddida. Sillasinne Ximtoossi heen attida.

¹⁵ Phawuloosa moyizida asati iza Atena gaththida. Qasseka Sillassiinne Ximtoossi izakko elleeli gakkana mala giza kiita Phawuloosappe ekkidi simmida.

¹⁶ Phawuloosi Atenan ista naagishin Atena kataman eeqati kumidayssa beyidi daro shenetides.

¹⁷ Hessa gish Ayhudata Woosa Keeththan Ayhudataranne Xoossas yayyiza Girike asara qasseka giyay dizason gallas gallas banara gaggiza asara haasayettides.

¹⁸ Efiqoroosenne Istoykko geetettiza eranchata bagga gididayti Phawuloosakko shiiqidi izara haasayettida Istafe issi issi asati “Hayssi lom7u lom7ay ay gaana koyizee?” gida. Baggati qasse Yesusa gishshinne hayqoppe iza dentha mishiraachcho izi sabakishin siydi “Heyssi hara ooratha eeqata gish yootiza misatees” gida.

¹⁹ Iza oykkidi Ariosfaagoose geetettiza dere duulata sinth efidi “Ha ne tamarsiza ooratha timirtey azzakkonne nu erana mala ne koyay?” gida.

²⁰ Qasse ne nuna nu haythan sisiza yo7oy nu eronta oorath gidida gish izi azzakkonne nu erana koyoos.

²¹ Atena asay kumeth qasseka haan diza hara dere asaykka baas wode aaththanas ooratha yo7o haasayaninne sissan attin hara miishan aaththettenna.

²² Hessa gish Phawuloosi Ariyosfaagoose geetettiza duulatan shiiqida dereza sinthan eqqidi “Hayto Atena asato! Inte beetto miish wursi ammanizayta gididayssa ta beyays.

²³ Ta yaane ha yuuyishin inte istas gooynniza miishata ta xeellishin ‘Eretonta Xoosse’ geetetti xaafetidayssa issi yarshoso demmadis; hessa gish hessa inte eronta gooyinnizayssa ta intena erissana.

²⁴ Hayssa alamezanne iza giddonka dizayssa wursi medhdhida Xoossi izi salonne sa7a Goda. Hessa gish izi asa kushen keexxettida keeththan deenna.

²⁵ Izi asa ubbas de7onne shempo; qasseka hara wursi immizayssa gidida gish izas paccizazi doonta gish izi asa kusheppe maado ekkenna.