ሃዋሬታ ኦሶ 13:7-27 in Gamo

⁷ ኢዚካ ኢሲ ሳርጎሳ ጳዉሎሳ ጌቴቲዛ ዎዝናማ ዴሬ ኣይሲዛይሳራ ኢሲፌ ዴስ። ሃ ዴሬ ኣይሲዛ ኣዴዚ ፆሳ ቃላ ሲያና ኮይዲ ባርናባሳኔ ሳዉሌ ፄይጊሲዴስ።

⁸ ማሮዚ ኤሊማሲ ባ ሱንꬃ ቢርሼꬃ ማላ ዴሬ ኣይሲዛይሲ ኣማኖንታ ማላ ꬉጳናስ ኮይዲ ኢስታራ ኤቄቲዴስ።

⁹ ጳዉሎሳ ጌቴቲዳ ሳዉሌይ ፂሎ ኣያናይ ኢዛን ኩሚን ማሮዛ ቲሺ ሂስቲ ፄሊዲ፥

¹⁰ “ኔኖ ፂሎቴꬃ ኡባስ ሞርኬዞ! ጌኔይኔ ኢታቴꬂ ኔናን ኩሚዳይሶ ሃይሶ ዳቡሎሳ ናዉ! ጎዳ ሱሬ ኦጌ ጌላሴꬃፌ ሼምፒኪ?

¹¹ ሄኮ ሃዒ ጎዳ ኩሼይ ኔ ቦላ ዴስ። ኔ ቆቃና፤ ሃኒፌ ጉዬ ኣዋ ኣርሼ ፖዖ ኢሲኖካ ቤያካ” ጊዴስ። ሄራካ ሻሩማይኔ ꬉማይ ኢዛ ቦላ ዎꬊዴስ። ኩሼ ኦይኪ ባና ካሌꬃናዴ ኮሺ ያኔ ሃኔ ጊዴስ።

¹² ዴሬ ኣይሲዛይሲ ሃ ሃኒዳ ዮዖዛ ቤዪዲ ጎዳ ጊሽ ሲዪዳ ቲሚርቴን ማላሌቲዲ ኣማኒዴስ።

¹³ ጳዉሎሲኔ ኢዛራ ዲዛይቲ ጳፋፔ ዴንዲዲ ጲንፊሊያ ጌቴቲዛሶን ዲዛ ጴርጌኔ ጌቴቲዛሶ ማርካቤን ጌሊ ቢዳ፤ ዮሃኒሲ ኢስታፌ ሻኬቲዲ ጉዬ ዬሩሳላሜ ሲሚዴስ።

¹⁴ ኢስቲ ጊዲኮ ጴርጌኔፔ ዴንዲዲ ጲሲዲያ ጊዶን ዲዛ ጌዴ ኣንፆኪያ ቢዳ፤ ሳምባታ ጋላስ ኣይሁዳታ ዎሳ ኬꬅ ጌሊ ኡቲዳ።

¹⁵ ሙሴ ዎጋ ማፃፋቲኔ ናቤታ ማፃፋቲ ናባቤቲዳፔ ጉዬ ኣይሁዳታ ዎሳ ኬꬃ ሃላቃቲ “ኑ ኢሻቶ! ኢንቴስ ሃይሳ ኣሳ ዞራና ቃላይ ዲኮ ሃሳይቴ” ጊዲ ኢስታኮ ኣሴ ዬዲዳ።

¹⁶ ጳዉሎሲካ ዴንዲ ኤቂዲ ባ ኩሼራ ማላቲዲ “ኢንቴኖ ኢስራዔሌ ኣሳቶ! ቃሴካ ኢንቴኖ ፆሳስ ያዪዛ ኣይዛቤቶ! ሲዪቴ።

¹⁷ ሃ ኢስራዔሌ ዴሬ ፆሳይ ካሴ ኑ ኣዋታ ዶሪዴስ፤ ኢስቲ ጊብፄ ዴሬን ዲሺን ኢስታ ꬎቁ ꬎቁ ሂስቲዴስ። ባ ዎልቃማ ቄሴራ ሄፔ ኢስታ ኬሲዴስ።

¹⁸ ኦይዱ ታሙ ላይꬅ ኩሜꬅ ኢስታ ባዞ ቢታን ዳንዳዪዴስ።

¹⁹ ካናኔ ቢታን ዲዛይታ ላፑን ካዎታ ꬋይሲዲ ኢስታ ቢታ ባ ዴሬታስ ጋዴ ሂስቲ ላቲሲዴስ።

²⁰ ሄሲ ዉሪ ፖሌቲዳይ ኦይዱ ፄታኔ ኢቻሹ ታሙ ላይꬃታ ጊዶና። ሄሳፌ ጉዬ ናቤ ሳሜላ ዎዴ ጋካናስ ኢስታ ፒርዲዛ ዳናታ ኢሚዴስ።

²¹ “ሄሳፌ ጉዬ ዴሬይ ባ ቦላ ካዎ ካዎꬃና ማላ ሳሜላ ዎሲዴስ፤ ፆሳይካ ቢኒያሜ ባጋፌ ቂሴ ና ሳዖሌ ኢስታስ ኢሚዴስ። ኢዚካ ኢስታ ኦይዱ ታሙ ላይꬅ ሃሪዴስ።

²² ሳዖሌ ሻሪዳፔ ጉዬ ዳዉቴ ካዎꬂዴስ፤ ኢዛ ጊሽ ‘ታ ዎዝና ማላ ሃኒዛይሳኔ ታ ኮዪዳይሳ ዉርሲ ኦꬂዛ ኢሴዬ ና ዳዉቴ ታ ዴማዲስ’ ጊዲ ዳዉቴ ጊሽ ፆሲ ማርካቲዴስ።

²³ ፆሲካ ባ ጫቆ ቃላꬆ ሃ ኣዴዛ ዜሬꬃፌ ኣስ ኣሺዛይሳ ዬሱሳ ኢስራዔሌስ ኤሂዴስ።

²⁴ ዬሱሲ ያናፔ ካሴ ዮሃኒሲ ኢስራዔሌ ዴሬይ ዉሪ ማሮቴꬃን ጌሊዲ ፃማቄታና ማላ ሳባኪዴስ።

²⁵ ዮሃኒሲ ባ ኪቴቲዳይሳ ፖሎ ቦላ ዲሼ ‘ታ ኢንቴስ ኦና ሚሳታዚና? ታ ኪቴቲዳይሳ ጊዲኬ ሃራይ ኣቶሺን ታ ኢዛስ ቶሆ ጫማ ኪሬ ቢርሻናስ ቤሶንታይሲ ታፔ ጉዬራ ያና’ ጊዴስ።

²⁶ “ኢንቴኖ ኣብራሃሜ ዜሬꬃፌ ዬሌቲዳ ኑ ኢሻቶ! ቃሴካ ኢንቴ ጊዶንካ ፆሳስ ያዪዛይቲ ዉሪ ሃይሲ ኣቶቴꬃ ኪታይ ኪቴቲዳይ ኑስ ኡባታሳ!

²⁷ ዬሩሳላሜ ኣሳቲኔ ኢስታ ሃላቃቲ ዬሱሳ ኤሪቤቴና፤ ጊዶ ኣቲን ኢስቲ ኢዛ ቦላ ፒርዲዳ፤ ሄሳንካ ሳምባታን ሳምባታን ናባቤቲዛ ካሴ ናቤታ ቃላይ ኢዛ ቦላ ፖሌቲዴስ።

⁷ Izikka issi Sargoosa Phawuloosa geetettiza woznama dere ayssizayssara issife dees. Ha dere ayssiza addezi Xoossa qaala siyana koydi Barnabaasanne Sawule xeygisides.

⁸ Marozi Ellimaassi ba suntha birsheththa mala dere ayssizayssi ammanonta mala dhuphanas koydi istara eqqetides.

⁹ Phawuloosa geetettida Sawuley Xillo Ayanay izan kumin maroza tishshi histi xeelidi,

¹⁰ “Neno xillotetha ubbas morkezo! Geneynne iitatethi nenan kumidaysso haysso dabuloosa nawu! Goda suure oge geellaseththafe shempikii?

¹¹ Hekko ha7i Goda kushey ne bolla dees. Ne qooqana; hannife guye awa arshe poo7o Issinokka beyakka” gides. Heerakka shaarumaynne dhumay iza bolla wodhdhides. Kushe oykki bana kaalethanade koshshi yaanne haanne gides.

¹² Dere ayssizayssi ha hanida yo7oza beyidi goda gish siyida timirten malaletidi ammanides.

¹³ Phawuloosinne izara dizayti Phaafappe dendidi Phinfiliya geetettizason diza Phergene geetettizaso markaben geli bida; Yohannisi istafe shaaketidi guye Yerusalame simmides.

¹⁴ Isti gidikko Phergeneppe dendidi Phissidiya giddon diza gede Anxokiya bida; Sambata gallas Ayhudata woossa keeth geli uttida.

¹⁵ Muse woga maxaafatinne nabeta maxaafati nababetidappe guye Ayhudata Woosa Keeththa halaqati “Nu ishato! Intes hayssa asa zorana qaalay diikko haasayte” giidi istako ase yeddida.

¹⁶ Phawuloosika dendi eqqidi ba kushera malatidi “Inteno Isra7eele asato! Qasseka inteno Xoossas yayyiza Ayzaabeto! siyite.

¹⁷ Ha Isra7eele dere Xoossay kase nu aawata doorides; isti Gibxe deren dishin ista dhoqu dhoqu histides. Ba wolqama qesera heeppe ista kessides.

¹⁸ Oyddu tammu layth kumeth ista bazzo biittan dandayides.

¹⁹ Kanaane biittan dizayta laapun kawota dhayssidi ista biitta ba deretas gade histi laattissides.

²⁰ Hessi wuri poletiday oyddu xeetanne ichashu tammu laythata giddonna. Hessafe guye nabe Sameela wode gakkanaas ista pirdiza daannata immides.

²¹ “Hessafe guye derey ba bolla kawo kawoththana mala Sameela woossides; Xoossayka Biniyaame baggafe Qiise naa Sa7oole istas immides. Izikka ista oyddu tammu layth haarides.

²² Sa7oole shaaridappe guye Dawute kawothides; iza gish ‘Ta wozna mala hanizayssanne ta koyidayssa wursi ooththiza Iseeye naa Dawute ta demmadis’ giidi Dawute gish Xoossi markattides.

²³ Xoossika ba caaqo qaalatho ha addeza zerethafe as ashshizayssa Yesusa Isra7eeles ehides.

²⁴ Yesusi yaanappe kase Yohannisi Isra7eele derey wuri maarotethan gelidi xammaqettana mala sabakides.

²⁵ Yohannisi ba kiitettidayssa polo bolla dishe ‘Ta intes oona misatazinaa? Ta kiitettidayssa gidikke haray attoshin ta izas toho caamma kire birshanas bessontayssi taappe guyera yaana’ gides.

²⁶ “Inteno Abrahaame zerethafe yeletida nu ishato! Qasseka inte giddonka Xoossas yayyizayti wuri hayssi atotetha kiitay kiitettiday nuus ubbatassa!

²⁷ Yerusalame asatinne ista halaqati Yesusa eribetenna; gido attin isti iza bolla pirdida; hessanka sambatan sambatan nababetiza kase nabeta qaalay iza bolla polettides.